ઋગ્વેદ · અધ્યાય 10.066

દેવાન્ હુવે બૃહચ્છ્રવસઃ સ્વસ્તયે જ્યોતિષ્કૃતો અધ્વરસ્ય પ્રચેતસઃ ।
યે વાવૃધુઃ પ્રતરં વિશ્વવેદસ ઇન્દ્રજ્યેષ્ઠાસો અમૃતા ઋતાવૃધઃ ॥

ઇન્દ્રપ્રસૂતા વરુણપ્રશિષ્ટા યે સૂર્યસ્ય જ્યોતિષો ભાગમ્ આનશુઃ ।
મરુદ્ગણે વૃજને મન્મ ધીમહિ માઘોને યજ્ઞં જનયન્ત સૂરયઃ ॥

ઇન્દ્રો વસુભિઃ પરિ પાતુ નો ગયમ્ આદિત્યૈર્ નો અદિતિઃ શર્મ યચ્છતુ ।
રુદ્રો રુદ્રેભિર્ દેવો મૃળયાતિ નસ્ ત્વષ્ટા નો ગ્નાભિઃ સુવિતાય જિન્વતુ ॥

અદિતિર્ દ્યાવાપૃથિવી ઋતમ્ મહદ્ ઇન્દ્રાવિષ્ણૂ મરુતઃ સ્વર્ બૃહત્ ।
દેવાઁ આદિત્યાઁ અવસે હવામહે વસૂન્ રુદ્રાન્ સવિતારં સુદંસસમ્ ॥

સરસ્વાન્ ધીભિર્ વરુણો ધૃતવ્રતઃ પૂષા વિષ્ણુર્ મહિમા વાયુર્ અશ્વિના ।
બ્રહ્મકૃતો અમૃતા વિશ્વવેદસઃ શર્મ નો યંસન્ ત્રિવરૂથમ્ અંહસઃ ॥

વૃષા યજ્ઞો વૃષણઃ સન્તુ યજ્ઞિયા વૃષણો દેવા વૃષણો હવિષ્કૃતઃ ।
વૃષણા દ્યાવાપૃથિવી ઋતાવરી વૃષા પર્જન્યો વૃષણો વૃષસ્તુભઃ ॥

અગ્નીષોમા વૃષણા વાજસાતયે પુરુપ્રશસ્તા વૃષણા ઉપ બ્રુવે ।
યાવ્ ઈજિરે વૃષણો દેવયજ્યયા તા નઃ શર્મ ત્રિવરૂથં વિ યંસતઃ ॥

ધૃતવ્રતાઃ ક્ષત્રિયા યજ્ઞનિષ્કૃતો બૃહદ્દિવા અધ્વરાણામ્ અભિશ્રિયઃ ।
અગ્નિહોતાર ઋતસાપો અદ્રુહો ઽપો અસૃજન્ન્ અનુ વૃત્રતૂર્યે ॥

દ્યાવાપૃથિવી જનયન્ન્ અભિ વ્રતાપ ઓષધીર્ વનિનાનિ યજ્ઞિયા ।
અન્તરિક્ષં સ્વ1ર્ આ પપ્રુર્ ઊતયે વશં દેવાસસ્ તન્વી3 નિ મામૃજુઃ ॥

ધર્તારો દિવ ઋભવઃ સુહસ્તા વાતાપર્જન્યા મહિષસ્ય તન્યતોઃ ।
આપ ઓષધીઃ પ્ર તિરન્તુ નો ગિરો ભગો રાતિર્ વાજિનો યન્તુ મે હવમ્ ॥

સમુદ્રઃ સિન્ધૂ રજો અન્તરિક્ષમ્ અજ એકપાત્ તનયિત્નુર્ અર્ણવઃ ।
અહિર્ બુધ્ન્યઃ શૃણવદ્ વચાંસિ મે વિશ્વે દેવાસ ઉત સૂરયો મમ ॥

સ્યામ વો મનવો દેવવીતયે પ્રાઞ્ચં નો યજ્ઞમ્ પ્ર ણયત સાધુયા ।
આદિત્યા રુદ્રા વસવઃ સુદાનવ ઇમા બ્રહ્મ શસ્યમાનાનિ જિન્વત ॥

દૈવ્યા હોતારા પ્રથમા પુરોહિત ઋતસ્ય પન્થામ્ અન્વ્ એમિ સાધુયા ।
ક્ષેત્રસ્ય પતિમ્ પ્રતિવેશમ્ ઈમહે વિશ્વાન્ દેવાઁ અમૃતાઁ અપ્રયુચ્છતઃ ॥

વસિષ્ઠાસઃ પિતૃવદ્ વાચમ્ અક્રત દેવાઁ ઈળાના ઋષિવત્ સ્વસ્તયે ।
પ્રીતા ઇવ જ્ઞાતયઃ કામમ્ એત્યાસ્મે દેવાસો ઽવ ધૂનુતા વસુ ॥

દેવાન્ વસિષ્ઠો અમૃતાન્ વવન્દે યે વિશ્વા ભુવનાભિ પ્રતસ્થુઃ ।
તે નો રાસન્તામ્ ઉરુગાયમ્ અદ્ય યૂયમ્ પાત સ્વસ્તિભિઃ સદા નઃ ॥