ઋગ્વેદ · અધ્યાય 10.015

ઉદ્ ઈરતામ્ અવર ઉત્ પરાસ ઉન્ મધ્યમાઃ પિતરઃ સોમ્યાસઃ ।
અસું ય ઈયુર્ અવૃકા ઋતજ્ઞાસ્ તે નો ઽવન્તુ પિતરો હવેષુ ॥

ઇદમ્ પિતૃભ્યો નમો અસ્ત્વ્ અદ્ય યે પૂર્વાસો ય ઉપરાસ ઈયુઃ ।
યે પાર્થિવે રજસ્ય્ આ નિષત્તા યે વા નૂનં સુવૃજનાસુ વિક્ષુ ॥

આહમ્ પિતૄન્ સુવિદત્રાઁ અવિત્સિ નપાતં ચ વિક્રમણં ચ વિષ્ણોઃ ।
બર્હિષદો યે સ્વધયા સુતસ્ય ભજન્ત પિત્વસ્ ત ઇહાગમિષ્ઠાઃ ॥

બર્હિષદઃ પિતર ઊત્ય્ અ1ર્વાગ્ ઇમા વો હવ્યા ચકૃમા જુષધ્વમ્ ।
ત આ ગતાવસા શંતમેનાથા નઃ શં યોર્ અરપો દધાત ॥

ઉપહૂતાઃ પિતરઃ સોમ્યાસો બર્હિષ્યેષુ નિધિષુ પ્રિયેષુ ।
ત આ ગમન્તુ ત ઇહ શ્રુવન્ત્વ્ અધિ બ્રુવન્તુ તે ઽવન્ત્વ્ અસ્માન્ ॥

આચ્યા જાનુ દક્ષિણતો નિષદ્યેમં યજ્ઞમ્ અભિ ગૃણીત વિશ્વે ।
મા હિંસિષ્ટ પિતરઃ કેન ચિન્ નો યદ્ વ આગઃ પુરુષતા કરામ ॥

આસીનાસો અરુણીનામ્ ઉપસ્થે રયિં ધત્ત દાશુષે મર્ત્યાય ।
પુત્રેભ્યઃ પિતરસ્ તસ્ય વસ્વઃ પ્ર યચ્છત ત ઇહોર્જં દધાત ॥

યે નઃ પૂર્વે પિતરઃ સોમ્યાસો ઽનૂહિરે સોમપીથં વસિષ્ઠાઃ ।
તેભિર્ યમઃ સંરરાણો હવીંષ્ય્ ઉશન્ન્ ઉશદ્ભિઃ પ્રતિકામમ્ અત્તુ ॥

યે તાતૃષુર્ દેવત્રા જેહમાના હોત્રાવિદઃ સ્તોમતષ્ટાસો અર્કૈઃ ।
આગ્ને યાહિ સુવિદત્રેભિર્ અર્વાઙ્ સત્યૈઃ કવ્યૈઃ પિતૃભિર્ ઘર્મસદ્ભિઃ ॥

યે સત્યાસો હવિરદો હવિષ્પા ઇન્દ્રેણ દેવૈઃ સરથં દધાનાઃ ।
આગ્ને યાહિ સહસ્રં દેવવન્દૈઃ પરૈઃ પૂર્વૈઃ પિતૃભિર્ ઘર્મસદ્ભિઃ ॥

અગ્નિષ્વાત્તાઃ પિતર એહ ગચ્છત સદઃ-સદઃ સદત સુપ્રણીતયઃ ।
અત્તા હવીંષિ પ્રયતાનિ બર્હિષ્ય્ અથા રયિં સર્વવીરં દધાતન ॥

ત્વમ્ અગ્ન ઈળિતો જાતવેદો ઽવાડ્ ઢવ્યાનિ સુરભીણિ કૃત્વી ।
પ્રાદાઃ પિતૃભ્યઃ સ્વધયા તે અક્ષન્ન્ અદ્ધિ ત્વં દેવ પ્રયતા હવીંષિ ॥

યે ચેહ પિતરો યે ચ નેહ યાઁશ્ ચ વિદ્મ યાઁ ઉ ચ ન પ્રવિદ્મ ।
ત્વં વેત્થ યતિ તે જાતવેદઃ સ્વધાભિર્ યજ્ઞં સુકૃતં જુષસ્વ ॥

યે અગ્નિદગ્ધા યે અનગ્નિદગ્ધા મધ્યે દિવઃ સ્વધયા માદયન્તે ।
તેભિઃ સ્વરાળ્ અસુનીતિમ્ એતાં યથાવશં તન્વં કલ્પયસ્વ ॥