ઋગ્વેદ · અધ્યાય 10.014

પરેયિવાંસમ્ પ્રવતો મહીર્ અનુ બહુભ્યઃ પન્થામ્ અનુપસ્પશાનમ્ ।
વૈવસ્વતં સંગમનં જનાનાં યમં રાજાનં હવિષા દુવસ્ય ॥

યમો નો ગાતુમ્ પ્રથમો વિવેદ નૈષા ગવ્યૂતિર્ અપભર્તવા ઉ ।
યત્રા નઃ પૂર્વે પિતરઃ પરેયુર્ એના જજ્ઞાનાઃ પથ્યા3 અનુ સ્વાઃ ॥

માતલી કવ્યૈર્ યમો અઙ્ગિરોભિર્ બૃહસ્પતિર્ ઋક્વભિર્ વાવૃધાનઃ ।
યાઁશ્ ચ દેવા વાવૃધુર્ યે ચ દેવાન્ સ્વાહાન્યે સ્વધયાન્યે મદન્તિ ॥

ઇમં યમ પ્રસ્તરમ્ આ હિ સીદાઙ્ગિરોભિઃ પિતૃભિઃ સંવિદાનઃ ।
આ ત્વા મન્ત્રાઃ કવિશસ્તા વહન્ત્વ્ એના રાજન્ હવિષા માદયસ્વ ॥

અઙ્ગિરોભિર્ આ ગહિ યજ્ઞિયેભિર્ યમ વૈરૂપૈર્ ઇહ માદયસ્વ ।
વિવસ્વન્તં હુવે યઃ પિતા તે ઽસ્મિન્ યજ્ઞે બર્હિષ્ય્ આ નિષદ્ય ॥

અઙ્ગિરસો નઃ પિતરો નવગ્વા અથર્વાણો ભૃગવઃ સોમ્યાસઃ ।
તેષાં વયં સુમતૌ યજ્ઞિયાનામ્ અપિ ભદ્રે સૌમનસે સ્યામ ॥

પ્રેહિ પ્રેહિ પથિભિઃ પૂર્વ્યેભિર્ યત્રા નઃ પૂર્વે પિતરઃ પરેયુઃ ।
ઉભા રાજાના સ્વધયા મદન્તા યમમ્ પશ્યાસિ વરુણં ચ દેવમ્ ॥

સં ગચ્છસ્વ પિતૃભિઃ સં યમેનેષ્ટાપૂર્તેન પરમે વ્યોમન્ ।
હિત્વાયાવદ્યમ્ પુનર્ અસ્તમ્ એહિ સં ગચ્છસ્વ તન્વા સુવર્ચાઃ ॥

અપેત વીત વિ ચ સર્પતાતો ઽસ્મા એતમ્ પિતરો લોકમ્ અક્રન્ ।
અહોભિર્ અદ્ભિર્ અક્તુભિર્ વ્યક્તં યમો દદાત્ય્ અવસાનમ્ અસ્મૈ ॥

અતિ દ્રવ સારમેયૌ શ્વાનૌ ચતુરક્ષૌ શબલૌ સાધુના પથા ।
અથા પિતૄન્ સુવિદત્રાઁ ઉપેહિ યમેન યે સધમાદમ્ મદન્તિ ॥

યૌ તે શ્વાનૌ યમ રક્ષિતારૌ ચતુરક્ષૌ પથિરક્ષી નૃચક્ષસૌ ।
તાભ્યામ્ એનમ્ પરિ દેહિ રાજન્ સ્વસ્તિ ચાસ્મા અનમીવં ચ ધેહિ ॥

ઉરૂણસાવ્ અસુતૃપા ઉદુમ્બલૌ યમસ્ય દૂતૌ ચરતો જનાઁ અનુ ।
તાવ્ અસ્મભ્યં દૃશયે સૂર્યાય પુનર્ દાતામ્ અસુમ્ અદ્યેહ ભદ્રમ્ ॥

યમાય સોમં સુનુત યમાય જુહુતા હવિઃ ।
યમં હ યજ્ઞો ગચ્છત્ય્ અગ્નિદૂતો અરંકૃતઃ ॥

યમાય ઘૃતવદ્ ધવિર્ જુહોત પ્ર ચ તિષ્ઠત ।
સ નો દેવેષ્વ્ આ યમદ્ દીર્ઘમ્ આયુઃ પ્ર જીવસે ॥

યમાય મધુમત્તમં રાજ્ઞે હવ્યં જુહોતન ।
ઇદં નમ ઋષિભ્યઃ પૂર્વજેભ્યઃ પૂર્વેભ્યઃ પથિકૃદ્ભ્યઃ ॥

ત્રિકદ્રુકેભિઃ પતતિ ષળ્ ઉર્વીર્ એકમ્ ઇદ્ બૃહત્ ।
ત્રિષ્ટુબ્ ગાયત્રી છન્દાંસિ સર્વા તા યમ આહિતા ॥