ઋગ્વેદ · અધ્યાય 1.180

યુવો રજાંસિ સુયમાસો અશ્વા રથો યદ્ વામ્ પર્ય્ અર્ણાંસિ દીયત્ ।
હિરણ્યયા વામ્ પવયઃ પ્રુષાયન્ મધ્વઃ પિબન્તા ઉષસઃ સચેથે ॥

યુવમ્ અત્યસ્યાવ નક્ષથો યદ્ વિપત્મનો નર્યસ્ય પ્રયજ્યોઃ ।
સ્વસા યદ્ વાં વિશ્વગૂર્તી ભરાતિ વાજાયેટ્ટે મધુપાવ્ ઇષે ચ ॥

યુવમ્ પય ઉસ્રિયાયામ્ અધત્તમ્ પક્વમ્ આમાયામ્ અવ પૂર્વ્યં ગોઃ ।
અન્તર્ યદ્ વનિનો વામ્ ઋતપ્સૂ હ્વારો ન શુચિર્ યજતે હવિષ્માન્ ॥

યુવં હ ઘર્મમ્ મધુમન્તમ્ અત્રયે ઽપો ન ક્ષોદો ઽવૃણીતમ્ એષે ।
તદ્ વાં નરાવ્ અશ્વિના પશ્વïષ્ટી રથ્યેવ ચક્રા પ્રતિ યન્તિ મધ્વઃ ॥

આ વાં દાનાય વવૃતીય દસ્રા ગોર્ ઓહેણ તૌગ્ર્યો ન જિવ્રિઃ ।
અપઃ ક્ષોણી સચતે માહિના વાં જૂર્ણો વામ્ અક્ષુર્ અંહસો યજત્રા ॥

નિ યદ્ યુવેથે નિયુતઃ સુદાનૂ ઉપ સ્વધાભિઃ સૃજથઃ પુરંધિમ્ ।
પ્રેષદ્ વેષદ્ વાતો ન સૂરિર્ આ મહે દદે સુવ્રતો ન વાજમ્ ॥

વયં ચિદ્ ધિ વાં જરિતારઃ સત્યા વિપન્યામહે વિ પણિર્ હિતાવાન્ ।
અધા ચિદ્ ધિ ષ્માશ્વિનાવ્ અનિન્દ્યા પાથો હિ ષ્મા વૃષણાવ્ અન્તિદેવમ્ ॥

યુવાં ચિદ્ ધિ ષ્માશ્વિનાવ્ અનુ દ્યૂન્ વિરુદ્રસ્ય પ્રસ્રવણસ્ય સાતૌ ।
અગસ્ત્યો નરાં નૃષુ પ્રશસ્તઃ કારાધુનીવ ચિતયત્ સહસ્રૈઃ ॥

પ્ર યદ્ વહેથે મહિના રથસ્ય પ્ર સ્યન્દ્રા યાથો મનુષો ન હોતા ।
ધત્તં સૂરિભ્ય ઉત વા સ્વશ્વ્યં નાસત્યા રયિષાચઃ સ્યામ ॥

તં વાં રથં વયમ્ અદ્યા હુવેમ સ્તોમૈર્ અશ્વિના સુવિતાય નવ્યમ્ ।
અરિષ્ટનેમિમ્ પરિ દ્યામ્ ઇયાનં વિદ્યામેષં વૃજનં જીરદાનુમ્ ॥