ઋગ્વેદ · અધ્યાય 1.135

સ્તીર્ણમ્ બર્હિર્ ઉપ નો યાહિ વીતયે સહસ્રેણ નિયુતા નિયુત્વતે શતિનીભિર્ નિયુત્વતે ।
તુભ્યં હિ પૂર્વપીતયે દેવા દેવાય યેમિરે ।
પ્ર તે સુતાસો મધુમન્તો અસ્થિરન્ મદાય ક્રત્વે અસ્થિરન્ ॥

તુભ્યાયં સોમઃ પરિપૂતો અદ્રિભિઃ સ્પાર્હા વસાનઃ પરિ કોશમ્ અર્ષતિ શુક્રા વસાનો અર્ષતિ ।
તવાયમ્ ભાગ આયુષુ સોમો દેવેષુ હૂયતે ।
વહ વાયો નિયુતો યાહ્ય્ અસ્મયુર્ જુષાણો યાહ્ય્ અસ્મયુઃ ॥

આ નો નિયુદ્ભિઃ શતિનીભિર્ અધ્વરં સહસ્રિણીભિર્ ઉપ યાહિ વીતયે વાયો હવ્યાનિ વીતયે ।
તવાયમ્ ભાગ ઋત્વિયઃ સરશ્મિઃ સૂર્યે સચા ।
અધ્વર્યુભિર્ ભરમાણા અયંસત વાયો શુક્રા અયંસત ॥

આ વાં રથો નિયુત્વાન્ વક્ષદ્ અવસે ઽભિ પ્રયાંસિ સુધિતાનિ વીતયે વાયો હવ્યાનિ વીતયે ।
પિબતમ્ મધ્વો અન્ધસઃ પૂર્વપેયં હિ વાં હિતમ્ ।
વાયવ્ આ ચન્દ્રેણ રાધસા ગતમ્ ઇન્દ્રશ્ ચ રાધસા ગતમ્ ॥

આ વાં ધિયો વવૃત્યુર્ અધ્વરાઁ ઉપેમમ્ ઇન્દુમ્ મર્મૃજન્ત વાજિનમ્ આશુમ્ અત્યં ન વાજિનમ્ ।
તેષામ્ પિબતમ્ અસ્મયૂ આ નો ગન્તમ્ ઇહોત્યા ।
ઇન્દ્રવાયૂ સુતાનામ્ અદ્રિભિર્ યુવમ્ મદાય વાજદા યુવમ્ ॥

ઇમે વાં સોમા અપ્સ્વ્ આ સુતા ઇહાધ્વર્યુભિર્ ભરમાણા અયંસત વાયો શુક્રા અયંસત ।
એતે વામ્ અભ્ય્ અસૃક્ષત તિરઃ પવિત્રમ્ આશવઃ ।
યુવાયવો ઽતિ રોમાણ્ય્ અવ્યયા સોમાસો અત્ય્ અવ્યયા ॥

અતિ વાયો સસતો યાહિ શશ્વતો યત્ર ગ્રાવા વદતિ તત્ર ગચ્છતં ગૃહમ્ ઇન્દ્રશ્ ચ ગચ્છતમ્ ।
વિ સૂનૃતા દદૃશે રીયતે ઘૃતમ્ આ પૂર્ણયા નિયુતા યાથો અધ્વરમ્ ઇન્દ્રશ્ ચ યાથો અધ્વરમ્ ॥

અત્રાહ તદ્ વહેથે મધ્વ આહુતિં યમ્ અશ્વત્થમ્ ઉપતિષ્ઠન્ત જાયવો ઽસ્મે તે સન્તુ જાયવઃ ।
સાકં ગાવઃ સુવતે પચ્યતે યવો ન તે વાય ઉપ દસ્યન્તિ ધેનવો નાપ દસ્યન્તિ ધેનવઃ ॥

ઇમે યે તે સુ વાયો બાહ્વોજસો ઽન્તર્ નદી તે પતયન્ત્ય્ ઉક્ષણો મહિ વ્રાધન્ત ઉક્ષણઃ ।
ધન્વઞ્ ચિદ્ યે અનાશવો જીરાશ્ ચિદ્ અગિરૌકસઃ ।
સૂર્યસ્યેવ રશ્મયો દુર્નિયન્તવો હસ્તયોર્ દુર્નિયન્તવઃ ॥