ઋગ્વેદ · અધ્યાય 1.128

અયં જાયત મનુષો ધરીમણિ હોતા યજિષ્ઠ ઉશિજામ્ અનુ વ્રતમ્ અગ્નિઃ સ્વમ્ અનુ વ્રતમ્ ।
વિશ્વશ્રુષ્ટિઃ સખીયતે રયિર્ ઇવ શ્રવસ્યતે ।
અદબ્ધો હોતા નિ ષદદ્ ઇળસ્ પદે પરિવીત ઇળસ્ પદે ॥

તં યજ્ઞસાધમ્ અપિ વાતયામસ્ય્ ઋતસ્ય પથા નમસા હવિષ્મતા દેવતાતા હવિષ્મતા ।
સ ન ઊર્જામ્ ઉપાભૃત્ય્ અયા કૃપા ન જૂર્યતિ ।
યમ્ માતરિશ્વા મનવે પરાવતો દેવમ્ ભાઃ પરાવતઃ ॥

એવેન સદ્યઃ પર્ય્ એતિ પાર્થિવમ્ મુહુર્ગી રેતો વૃષભઃ કનિક્રદદ્ દધદ્ રેતઃ કનિક્રદત્ ।
શતં ચક્ષાણો અક્ષભિર્ દેવો વનેષુ તુર્વણિઃ ।
સદો દધાન ઉપરેષુ સાનુષ્વ્ અગ્નિઃ પરેષુ સાનુષુ ॥

સ સુક્રતુઃ પુરોહિતો દમે-દમે ઽગ્નિર્ યજ્ઞસ્યાધ્વરસ્ય ચેતતિ ક્રત્વા યજ્ઞસ્ય ચેતતિ ।
ક્રત્વા વેધા ઇષૂયતે વિશ્વા જાતાનિ પસ્પશે ।
યતો ઘૃતશ્રીર્ અતિથિર્ અજાયત વહ્નિર્ વેધા અજાયત ॥

ક્રત્વા યદ્ અસ્ય તવિષીષુ પૃઞ્ચતે ઽગ્નેર્ અવેણ મરુતાં ન ભોજ્યેષિરાય ન ભોજ્યા ।
સ હિ ષ્મા દાનમ્ ઇન્વતિ વસૂનાં ચ મજ્મના ।
સ નસ્ ત્રાસતે દુરિતાદ્ અભિહ્રુતઃ શંસાદ્ અઘાદ્ અભિહ્રુતઃ ॥

વિશ્વો વિહાયા અરતિર્ વસુર્ દધે હસ્તે દક્ષિણે તરણિર્ ન શિશ્રથચ્ છ્રવસ્યયા ન શિશ્રથત્ ।
વિશ્વસ્મા ઇદ્ ઇષુધ્યતે દેવત્રા હવ્યમ્ ઓહિષે ।
વિશ્વસ્મા ઇત્ સુકૃતે વારમ્ ઋણ્વત્ય્ અગ્નિર્ દ્વારા વ્ય્ ઋણ્વતિ ॥

સ માનુષે વૃજને શંતમો હિતો3 ઽગ્નિર્ યજ્ઞેષુ જેન્યો ન વિશ્પતિઃ પ્રિયો યજ્ઞેષુ વિશ્પતિઃ ।
સ હવ્યા માનુષાણામ્ ઇળા કૃતાનિ પત્યતે ।
સ નસ્ ત્રાસતે વરુણસ્ય ધૂર્તેર્ મહો દેવસ્ય ધૂર્તેઃ ॥

અગ્નિં હોતારમ્ ઈળતે વસુધિતિમ્ પ્રિયં ચેતિષ્ઠમ્ અરતિં ન્ય્ એરિરે હવ્યવાહં ન્ય્ એરિરે ।
વિશ્વાયું વિશ્વવેદસં હોતારં યજતં કવિમ્ ।
દેવાસો રણ્વમ્ અવસે વસૂયવો ગીર્ભી રણ્વં વસૂયવઃ ॥