ઋગ્વેદ · અધ્યાય 1.124

ઉષા ઉચ્છન્તી સમિધાને અગ્ના ઉદ્યન્ સૂર્ય ઉર્વિયા જ્યોતિર્ અશ્રેત્ ।
દેવો નો અત્ર સવિતા ન્વ્ અર્થમ્ પ્રાસાવીદ્ દ્વિપત્ પ્ર ચતુષ્પદ્ ઇત્યૈ ॥

અમિનતી દૈવ્યાનિ વ્રતાનિ પ્રમિનતી મનુષ્યા યુગાનિ ।
ઈયુષીણામ્ ઉપમા શશ્વતીનામ્ આયતીનામ્ પ્રથમોષા વ્ય્ અદ્યૌત્ ॥

એષા દિવો દુહિતા પ્રત્ય્ અદર્શિ જ્યોતિર્ વસાના સમના પુરસ્તાત્ ।
ઋતસ્ય પન્થામ્ અન્વ્ એતિ સાધુ પ્રજાનતીવ ન દિશો મિનાતિ ॥

ઉપો અદર્શિ શુન્ધ્યુવો ન વક્ષો નોધા ઇવાવિર્ અકૃત પ્રિયાણિ ।
અદ્મસન્ ન સસતો બોધયન્તી શશ્વત્તમાગાત્ પુનર્ એયુષીણામ્ ॥

પૂર્વે અર્ધે રજસો અપ્ત્યસ્ય ગવાં જનિત્ર્ય્ અકૃત પ્ર કેતુમ્ ।
વ્ય્ ઉ પ્રથતે વિતરં વરીય ઓભા પૃણન્તી પિત્રોર્ ઉપસ્થા ॥

એવેદ્ એષા પુરુતમા દૃશે કં નાજામિં ન પરિ વૃણક્તિ જામિમ્ ।
અરેપસા તન્વા3 શાશદાના નાર્ભાદ્ ઈષતે ન મહો વિભાતી ॥

અભ્રાતેવ પુંસ એતિ પ્રતીચી ગર્તારુગ્ ઇવ સનયે ધનાનામ્ ।
જાયેવ પત્ય ઉશતી સુવાસા ઉષા હસ્રેવ નિ રિણીતે અપ્સઃ ॥

સ્વસા સ્વસ્રે જ્યાયસ્યૈ યોનિમ્ આરૈગ્ અપૈત્ય્ અસ્યાઃ પ્રતિચક્ષ્યેવ ।
વ્યુચ્છન્તી રશ્મિભિઃ સૂર્યસ્યાઞ્જ્ય્ અઙ્ક્તે સમનગા ઇવ વ્રાઃ ॥

આસામ્ પૂર્વાસામ્ અહસુ સ્વસૄણામ્ અપરા પૂર્વામ્ અભ્ય્ એતિ પશ્ચાત્ ।
તાઃ પ્રત્નવન્ નવ્યસીર્ નૂનમ્ અસ્મે રેવદ્ ઉચ્છન્તુ સુદિના ઉષાસઃ ॥

પ્ર બોધયોષઃ પૃણતો મઘોન્ય્ અબુધ્યમાનાઃ પણયઃ સસન્તુ ।
રેવદ્ ઉચ્છ મઘવદ્ભ્યો મઘોનિ રેવત્ સ્તોત્રે સૂનૃતે જારયન્તી ॥

અવેયમ્ અશ્વૈદ્ યુવતિઃ પુરસ્તાદ્ યુઙ્ક્તે ગવામ્ અરુણાનામ્ અનીકમ્ ।
વિ નૂનમ્ ઉચ્છાદ્ અસતિ પ્ર કેતુર્ ગૃહં-ગૃહમ્ ઉપ તિષ્ઠાતે અગ્નિઃ ॥

ઉત્ તે વયશ્ ચિદ્ વસતેર્ અપપ્તન્ નરશ્ ચ યે પિતુભાજો વ્યુષ્ટૌ ।
અમા સતે વહસિ ભૂરિ વામમ્ ઉષો દેવિ દાશુષે મર્ત્યાય ॥

અસ્તોઢ્વં સ્તોમ્યા બ્રહ્મણા મે ઽવીવૃધધ્વમ્ ઉશતીર્ ઉષાસઃ ।
યુષ્માકં દેવીર્ અવસા સનેમ સહસ્રિણં ચ શતિનં ચ વાજમ્ ॥