ઋગ્વેદ · અધ્યાય 1.091

ત્વં સોમ પ્ર ચિકિતો મનીષા ત્વં રજિષ્ઠમ્ અનુ નેષિ પન્થામ્ ।
તવ પ્રણીતી પિતરો ન ઇન્દો દેવેષુ રત્નમ્ અભજન્ત ધીરાઃ ॥

ત્વં સોમ ક્રતુભિઃ સુક્રતુર્ ભૂસ્ ત્વં દક્ષૈઃ સુદક્ષો વિશ્વવેદાઃ ।
ત્વં વૃષા વૃષત્વેભિર્ મહિત્વા દ્યુમ્નેભિર્ દ્યુમ્ન્ય્ અભવો નૃચક્ષાઃ ॥

રાજ્ઞો નુ તે વરુણસ્ય વ્રતાનિ બૃહદ્ ગભીરં તવ સોમ ધામ ।
શુચિષ્ ટ્વમ્ અસિ પ્રિયો ન મિત્રો દક્ષાય્યો અર્યમેવાસિ સોમ ॥

યા તે ધામાનિ દિવિ યા પૃથિવ્યાં યા પર્વતેષ્વ્ ઓષધીષ્વ્ અપ્સુ ।
તેભિર્ નો વિશ્વૈઃ સુમના અહેળન્ રાજન્ સોમ પ્રતિ હવ્યા ગૃભાય ॥

ત્વં સોમાસિ સત્પતિસ્ ત્વં રાજોત વૃત્રહા ।
ત્વમ્ ભદ્રો અસિ ક્રતુઃ ॥

ત્વં ચ સોમ નો વશો જીવાતું ન મરામહે ।
પ્રિયસ્તોત્રો વનસ્પતિઃ ॥

ત્વં સોમ મહે ભગં ત્વં યૂન ઋતાયતે ।
દક્ષં દધાસિ જીવસે ॥

ત્વં નઃ સોમ વિશ્વતો રક્ષા રાજન્ન્ અઘાયતઃ ।
ન રિષ્યેત્ ત્વાવતઃ સખા ॥

સોમ યાસ્ તે મયોભુવ ઊતયઃ સન્તિ દાશુષે ।
તાભિર્ નો ઽવિતા ભવ ॥

ઇમં યજ્ઞમ્ ઇદં વચો જુજુષાણ ઉપાગહિ ।
સોમ ત્વં નો વૃધે ભવ ॥

સોમ ગીર્ભિષ્ ટ્વા વયં વર્ધયામો વચોવિદઃ ।
સુમૃળીકો ન આ વિશ ॥

ગયસ્ફાનો અમીવહા વસુવિત્ પુષ્ટિવર્ધનઃ ।
સુમિત્રઃ સોમ નો ભવ ॥

સોમ રારન્ધિ નો હૃદિ ગાવો ન યવસેષ્વ્ આ ।
મર્ય ઇવ સ્વ ઓક્યે ॥

યઃ સોમ સખ્યે તવ રારણદ્ દેવ મર્ત્યઃ ।
તં દક્ષઃ સચતે કવિઃ ॥

ઉરુષ્યા ણો અભિશસ્તેઃ સોમ નિ પાહ્ય્ અંહસઃ ।
સખા સુશેવ એધિ નઃ ॥

આ પ્યાયસ્વ સમ્ એતુ તે વિશ્વતઃ સોમ વૃષ્ણ્યમ્ ।
ભવા વાજસ્ય સંગથે ॥

આ પ્યાયસ્વ મદિન્તમ સોમ વિશ્વેભિર્ અંશુભિઃ ।
ભવા નઃ સુશ્રવસ્તમઃ સખા વૃધે ॥

સં તે પયાંસિ સમ્ ઉ યન્તુ વાજાઃ સં વૃષ્ણ્યાન્ય્ અભિમાતિષાહઃ ।
આપ્યાયમાનો અમૃતાય સોમ દિવિ શ્રવાંસ્ય્ ઉત્તમાનિ ધિષ્વ ॥

યા તે ધામાનિ હવિષા યજન્તિ તા તે વિશ્વા પરિભૂર્ અસ્તુ યજ્ઞમ્ ।
ગયસ્ફાનઃ પ્રતરણઃ સુવીરો ઽવીરહા પ્ર ચરા સોમ દુર્યાન્ ॥

સોમો ધેનું સોમો અર્વન્તમ્ આશું સોમો વીરં કર્મણ્યં દદાતિ ।
સાદન્યં વિદથ્યં સભેયમ્ પિતૃશ્રવણં યો દદાશદ્ અસ્મૈ ॥

અષાળ્હં યુત્સુ પૃતનાસુ પપ્રિં સ્વર્ષામ્ અપ્સાં વૃજનસ્ય ગોપામ્ ।
ભરેષુજાં સુક્ષિતિં સુશ્રવસં જયન્તં ત્વામ્ અનુ મદેમ સોમ ॥

ત્વમ્ ઇમા ઓષધીઃ સોમ વિશ્વાસ્ ત્વમ્ અપો અજનયસ્ ત્વં ગાઃ ।
ત્વમ્ આ તતન્થોર્વ્ અ1ન્તરિક્ષં ત્વં જ્યોતિષા વિ તમો વવર્થ ॥

દેવેન નો મનસા દેવ સોમ રાયો ભાગં સહસાવન્ન્ અભિ યુધ્ય ।
મા ત્વા તનદ્ ઈશિષે વીર્યસ્યોભયેભ્યઃ પ્ર ચિકિત્સા ગવિષ્ટૌ ॥