ઋગ્વેદ · અધ્યાય 1.089

આ નો ભદ્રાઃ ક્રતવો યન્તુ વિશ્વતો ઽદબ્ધાસો અપરીતાસ ઉદ્ભિદઃ ।
દેવા નો યથા સદમ્ ઇદ્ વૃધે અસન્ન્ અપ્રાયુવો રક્ષિતારો દિવે-દિવે ॥

દેવાનામ્ ભદ્રા સુમતિર્ ઋજૂયતાં દેવાનાં રાતિર્ અભિ નો નિ વર્તતામ્ ।
દેવાનાં સખ્યમ્ ઉપ સેદિમા વયં દેવા ન આયુઃ પ્ર તિરન્તુ જીવસે ॥

તાન્ પૂર્વયા નિવિદા હૂમહે વયમ્ ભગમ્ મિત્રમ્ અદિતિં દક્ષમ્ અસ્રિધમ્ ।
અર્યમણં વરુણં સોમમ્ અશ્વિના સરસ્વતી નઃ સુભગા મયસ્ કરત્ ॥

તન્ નો વાતો મયોભુ વાતુ ભેષજં તન્ માતા પૃથિવી તત્ પિતા દ્યૌઃ ।
તદ્ ગ્રાવાણઃ સોમસુતો મયોભુવસ્ તદ્ અશ્વિના શૃણુતં ધિષ્ણ્યા યુવમ્ ॥

તમ્ ઈશાનં જગતસ્ તસ્થુષસ્ પતિં ધિયંજિન્વમ્ અવસે હૂમહે વયમ્ ।
પૂષા નો યથા વેદસામ્ અસદ્ વૃધે રક્ષિતા પાયુર્ અદબ્ધઃ સ્વસ્તયે ॥

સ્વસ્તિ ન ઇન્દ્રો વૃદ્ધશ્રવાઃ સ્વસ્તિ નઃ પૂષા વિશ્વવેદાઃ ।
સ્વસ્તિ નસ્ તાર્ક્ષ્યો અરિષ્ટનેમિઃ સ્વસ્તિ નો બૃહસ્પતિર્ દધાતુ ॥

પૃષદશ્વા મરુતઃ પૃશ્નિમાતરઃ શુભંયાવાનો વિદથેષુ જગ્મયઃ ।
અગ્નિજિહ્વા મનવઃ સૂરચક્ષસો વિશ્વે નો દેવા અવસા ગમન્ન્ ઇહ ॥

ભદ્રં કર્ણેભિઃ શૃણુયામ દેવા ભદ્રમ્ પશ્યેમાક્ષભિર્ યજત્રાઃ ।
સ્થિરૈર્ અઙ્ગૈસ્ તુષ્ટુવાંસસ્ તનૂભિર્ વ્ય્ અશેમ દેવહિતં યદ્ આયુઃ ॥

શતમ્ ઇન્ નુ શરદો અન્તિ દેવા યત્રા નશ્ ચક્રા જરસં તનૂનામ્ ।
પુત્રાસો યત્ર પિતરો ભવન્તિ મા નો મધ્યા રીરિષતાયુર્ ગન્તોઃ ॥

અદિતિર્ દ્યૌર્ અદિતિર્ અન્તરિક્ષમ્ અદિતિર્ માતા સ પિતા સ પુત્રઃ ।
વિશ્વે દેવા અદિતિઃ પઞ્ચ જના અદિતિર્ જાતમ્ અદિતિર્ જનિત્વમ્ ॥