ઋગ્વેદ · અધ્યાય 1.086

મરુતો યસ્ય હિ ક્ષયે પાથા દિવો વિમહસઃ ।
સ સુગોપાતમો જનઃ ॥

યજ્ઞૈર્ વા યજ્ઞવાહસો વિપ્રસ્ય વા મતીનામ્ ।
મરુતઃ શૃણુતા હવમ્ ॥

ઉત વા યસ્ય વાજિનો ઽનુ વિપ્રમ્ અતક્ષત ।
સ ગન્તા ગોમતિ વ્રજે ॥

અસ્ય વીરસ્ય બર્હિષિ સુતઃ સોમો દિવિષ્ટિષુ ।
ઉક્થમ્ મદશ્ ચ શસ્યતે ॥

અસ્ય શ્રોષન્ત્વ્ આ ભુવો વિશ્વા યશ્ ચર્ષણીર્ અભિ ।
સૂરં ચિત્ સસ્રુષીર્ ઇષઃ ॥

પૂર્વીભિર્ હિ દદાશિમ શરદ્ભિર્ મરુતો વયમ્ ।
અવોભિશ્ ચર્ષણીનામ્ ॥

સુભગઃ સ પ્રયજ્યવો મરુતો અસ્તુ મર્ત્યઃ ।
યસ્ય પ્રયાંસિ પર્ષથ ॥

શશમાનસ્ય વા નરઃ સ્વેદસ્ય સત્યશવસઃ ।
વિદા કામસ્ય વેનતઃ ॥

યૂયં તત્ સત્યશવસ આવિષ્ કર્ત મહિત્વના ।
વિધ્યતા વિદ્યુતા રક્ષઃ ॥

ગૂહતા ગુહ્યં તમો વિ યાત વિશ્વમ્ અત્રિણમ્ ।
જ્યોતિષ્ કર્તા યદ્ ઉશ્મસિ ॥