ઋગ્વેદ · અધ્યાય 1.085

પ્ર યે શુમ્ભન્તે જનયો ન સપ્તયો યામન્ રુદ્રસ્ય સૂનવઃ સુદંસસઃ ।
રોદસી હિ મરુતશ્ ચક્રિરે વૃધે મદન્તિ વીરા વિદથેષુ ઘૃષ્વયઃ ॥

ત ઉક્ષિતાસો મહિમાનમ્ આશત દિવિ રુદ્રાસો અધિ ચક્રિરે સદઃ ।
અર્ચન્તો અર્કં જનયન્ત ઇન્દ્રિયમ્ અધિ શ્રિયો દધિરે પૃશ્નિમાતરઃ ॥

ગોમાતરો યચ્ છુભયન્તે અઞ્જિભિસ્ તનૂષુ શુભ્રા દધિરે વિરુક્મતઃ ।
બાધન્તે વિશ્વમ્ અભિમાતિનમ્ અપ વર્ત્માન્ય્ એષામ્ અનુ રીયતે ઘૃતમ્ ॥

વિ યે ભ્રાજન્તે સુમખાસ ઋષ્ટિભિઃ પ્રચ્યાવયન્તો અચ્યુતા ચિદ્ ઓજસા ।
મનોજુવો યન્ મરુતો રથેષ્વ્ આ વૃષવ્રાતાસઃ પૃષતીર્ અયુગ્ધ્વમ્ ॥

પ્ર યદ્ રથેષુ પૃષતીર્ અયુગ્ધ્વં વાજે અદ્રિમ્ મરુતો રંહયન્તઃ ।
ઉતારુષસ્ય વિ ષ્યન્તિ ધારાશ્ ચર્મેવોદભિર્ વ્ય્ ઉન્દન્તિ ભૂમ ॥

આ વો વહન્તુ સપ્તયો રઘુષ્યદો રઘુપત્વાનઃ પ્ર જિગાત બાહુભિઃ ।
સીદતા બર્હિર્ ઉરુ વઃ સદસ્ કૃતમ્ માદયધ્વમ્ મરુતો મધ્વો અન્ધસઃ ॥

તે ઽવર્ધન્ત સ્વતવસો મહિત્વના નાકં તસ્થુર્ ઉરુ ચક્રિરે સદઃ ।
વિષ્ણુર્ યદ્ ધાવદ્ વૃષણમ્ મદચ્યુતં વયો ન સીદન્ન્ અધિ બર્હિષિ પ્રિયે ॥

શૂરા ઇવેદ્ યુયુધયો ન જગ્મયઃ શ્રવસ્યવો ન પૃતનાસુ યેતિરે ।
ભયન્તે વિશ્વા ભુવના મરુદ્ભ્યો રાજાન ઇવ ત્વેષસંદૃશો નરઃ ॥

ત્વષ્ટા યદ્ વજ્રં સુકૃતં હિરણ્યયં સહસ્રભૃષ્ટિં સ્વપા અવર્તયત્ ।
ધત્ત ઇન્દ્રો નર્ય્ અપાંસિ કર્તવે ઽહન્ વૃત્રં નિર્ અપામ્ ઔબ્જદ્ અર્ણવમ્ ॥

ઊર્ધ્વં નુનુદ્રે ઽવતં ત ઓજસા દાદૃહાણં ચિદ્ બિભિદુર્ વિ પર્વતમ્ ।
ધમન્તો વાણમ્ મરુતઃ સુદાનવો મદે સોમસ્ય રણ્યાનિ ચક્રિરે ॥

જિહ્મં નુનુદ્રે ઽવતં તયા દિશાસિઞ્ચન્ન્ ઉત્સં ગોતમાય તૃષ્ણજે ।
આ ગચ્છન્તીમ્ અવસા ચિત્રભાનવઃ કામં વિપ્રસ્ય તર્પયન્ત ધામભિઃ ॥

યા વઃ શર્મ શશમાનાય સન્તિ ત્રિધાતૂનિ દાશુષે યચ્છતાધિ ।
અસ્મભ્યં તાનિ મરુતો વિ યન્ત રયિં નો ધત્ત વૃષણઃ સુવીરમ્ ॥