ઋગ્વેદ · અધ્યાય 1.064

વૃષ્ણે શર્ધાય સુમખાય વેધસે નોધઃ સુવૃક્તિમ્ પ્ર ભરા મરુદ્ભ્યઃ ।
અપો ન ધીરો મનસા સુહસ્ત્યો ગિરઃ સમ્ અઞ્જે વિદથેષ્વ્ આભુવઃ ॥

તે જજ્ઞિરે દિવ ઋષ્વાસ ઉક્ષણો રુદ્રસ્ય મર્યા અસુરા અરેપસઃ ।
પાવકાસઃ શુચયઃ સૂર્યા ઇવ સત્વાનો ન દ્રપ્સિનો ઘોરવર્પસઃ ॥

યુવાનો રુદ્રા અજરા અભોગ્ઘનો વવક્ષુર્ અધ્રિગાવઃ પર્વતા ઇવ ।
દૃળ્હા ચિદ્ વિશ્વા ભુવનાનિ પાર્થિવા પ્ર ચ્યાવયન્તિ દિવ્યાનિ મજ્મના ॥

ચિત્રૈર્ અઞ્જિભિર્ વપુષે વ્ય્ અઞ્જતે વક્ષઃસુ રુક્માઁ અધિ યેતિરે શુભે ।
અંસેષ્વ્ એષાં નિ મિમૃક્ષુર્ ઋષ્ટયઃ સાકં જજ્ઞિરે સ્વધયા દિવો નરઃ ॥

ઈશાનકૃતો ધુનયો રિશાદસો વાતાન્ વિદ્યુતસ્ તવિષીભિર્ અક્રત ।
દુહન્ત્ય્ ઊધર્ દિવ્યાનિ ધૂતયો ભૂમિમ્ પિન્વન્તિ પયસા પરિજ્રયઃ ॥

પિન્વન્ત્ય્ અપો મરુતઃ સુદાનવઃ પયો ઘૃતવદ્ વિદથેષ્વ્ આભુવઃ ।
અત્યં ન મિહે વિ નયન્તિ વાજિનમ્ ઉત્સં દુહન્તિ સ્તનયન્તમ્ અક્ષિતમ્ ॥

મહિષાસો માયિનશ્ ચિત્રભાનવો ગિરયો ન સ્વતવસો રઘુષ્યદઃ ।
મૃગા ઇવ હસ્તિનઃ ખાદથા વના યદ્ આરુણીષુ તવિષીર્ અયુગ્ધ્વમ્ ॥

સિંહા ઇવ નાનદતિ પ્રચેતસઃ પિશા ઇવ સુપિશો વિશ્વવેદસઃ ।
ક્ષપો જિન્વન્તઃ પૃષતીભિર્ ઋષ્ટિભિઃ સમ્ ઇત્ સબાધઃ શવસાહિમન્યવઃ ॥

રોદસી આ વદતા ગણશ્રિયો નૃષાચઃ શૂરાઃ શવસાહિમન્યવઃ ।
આ વન્ધુરેષ્વ્ અમતિર્ ન દર્શતા વિદ્યુન્ ન તસ્થૌ મરુતો રથેષુ વઃ ॥

વિશ્વવેદસો રયિભિઃ સમોકસઃ સમ્મિશ્લાસસ્ તવિષીભિર્ વિરપ્શિનઃ ।
અસ્તાર ઇષું દધિરે ગભસ્ત્યોર્ અનન્તશુષ્મા વૃષખાદયો નરઃ ॥

હિરણ્યયેભિઃ પવિભિઃ પયોવૃધ ઉજ્જિઘ્નન્ત આપથ્યો3 ન પર્વતાન્ ।
મખા અયાસઃ સ્વસૃતો ધ્રુવચ્યુતો દુધ્રકૃતો મરુતો ભ્રાજદૃષ્ટયઃ ॥

ઘૃષુમ્ પાવકં વનિનં વિચર્ષણિં રુદ્રસ્ય સૂનું હવસા ગૃણીમસિ ।
રજસ્તુરં તવસમ્ મારુતં ગણમ્ ઋજીષિણં વૃષણં સશ્ચત શ્રિયે ॥

પ્ર નૂ સ મર્તઃ શવસા જનાઁ અતિ તસ્થૌ વ ઊતી મરુતો યમ્ આવત ।
અર્વદ્ભિર્ વાજમ્ ભરતે ધના નૃભિર્ આપૃચ્છ્યં ક્રતુમ્ આ ક્ષેતિ પુષ્યતિ ॥

ચર્કૃત્યમ્ મરુતઃ પૃત્સુ દુષ્ટરં દ્યુમન્તં શુષ્મમ્ મઘવત્સુ ધત્તન ।
ધનસ્પૃતમ્ ઉક્થ્યં વિશ્વચર્ષણિં તોકમ્ પુષ્યેમ તનયં શતં હિમાઃ ॥

નૂ ષ્ઠિરમ્ મરુતો વીરવન્તમ્ ઋતીષાહં રયિમ્ અસ્માસુ ધત્ત ।
સહસ્રિણં શતિનં શૂશુવાંસમ્ પ્રાતર્ મક્ષૂ ધિયાવસુર્ જગમ્યાત્ ॥