ઋગ્વેદ · અધ્યાય 1.062

પ્ર મન્મહે શવસાનાય શૂષમ્ આઙ્ગૂષં ગિર્વણસે અઙ્ગિરસ્વત્ ।
સુવૃક્તિભિઃ સ્તુવત ઋગ્મિયાયાર્ચામાર્કં નરે વિશ્રુતાય ॥

પ્ર વો મહે મહિ નમો ભરધ્વમ્ આઙ્ગૂષ્યં શવસાનાય સામ ।
યેના નઃ પૂર્વે પિતરઃ પદજ્ઞા અર્ચન્તો અઙ્ગિરસો ગા અવિન્દન્ ॥

ઇન્દ્રસ્યાઙ્ગિરસાં ચેષ્ટૌ વિદત્ સરમા તનયાય ધાસિમ્ ।
બૃહસ્પતિર્ ભિનદ્ અદ્રિં વિદદ્ ગાઃ સમ્ ઉસ્રિયાભિર્ વાવશન્ત નરઃ ॥

સ સુષ્ટુભા સ સ્તુભા સપ્ત વિપ્રૈઃ સ્વરેણાદ્રિં સ્વર્યો3 નવગ્વૈઃ ।
સરણ્યુભિઃ ફલિગમ્ ઇન્દ્ર શક્ર વલં રવેણ દરયો દશગ્વૈઃ ॥

ગૃણાનો અઙ્ગિરોભિર્ દસ્મ વિ વર્ ઉષસા સૂર્યેણ ગોભિર્ અન્ધઃ ।
વિ ભૂમ્યા અપ્રથય ઇન્દ્ર સાનુ દિવો રજ ઉપરમ્ અસ્તભાયઃ ॥

તદ્ ઉ પ્રયક્ષતમમ્ અસ્ય કર્મ દસ્મસ્ય ચારુતમમ્ અસ્તિ દંસઃ ।
ઉપહ્વરે યદ્ ઉપરા અપિન્વન્ મધ્વર્ણસો નદ્ય1શ્ ચતસ્રઃ ॥

દ્વિતા વિ વવ્રે સનજા સનીળે અયાસ્યઃ સ્તવમાનેભિર્ અર્કૈઃ ।
ભગો ન મેને પરમે વ્યોમન્ન્ અધારયદ્ રોદસી સુદંસાઃ ॥

સનાદ્ દિવમ્ પરિ ભૂમા વિરૂપે પુનર્ભુવા યુવતી સ્વેભિર્ એવૈઃ ।
કૃષ્ણેભિર્ અક્તોષા રુશદ્ભિર્ વપુર્ભિર્ આ ચરતો અન્યાન્યા ॥

સનેમિ સખ્યં સ્વપસ્યમાનઃ સૂનુર્ દાધાર શવસા સુદંસાઃ ।
આમાસુ ચિદ્ દધિષે પક્વમ્ અન્તઃ પયઃ કૃષ્ણાસુ રુશદ્ રોહિણીષુ ॥

સનાત્ સનીળા અવનીર્ અવાતા વ્રતા રક્ષન્તે અમૃતાઃ સહોભિઃ ।
પુરૂ સહસ્રા જનયો ન પત્નીર્ દુવસ્યન્તિ સ્વસારો અહ્રયાણમ્ ॥

સનાયુવો નમસા નવ્યો અર્કૈર્ વસૂયવો મતયો દસ્મ દદ્રુઃ ।
પતિં ન પત્નીર્ ઉશતીર્ ઉશન્તં સ્પૃશન્તિ ત્વા શવસાવન્ મનીષાઃ ॥

સનાદ્ એવ તવ રાયો ગભસ્તૌ ન ક્ષીયન્તે નોપ દસ્યન્તિ દસ્મ ।
દ્યુમાઁ અસિ ક્રતુમાઁ ઇન્દ્ર ધીરઃ શિક્ષા શચીવસ્ તવ નઃ શચીભિઃ ॥

સનાયતે ગોતમ ઇન્દ્ર નવ્યમ્ અતક્ષદ્ બ્રહ્મ હરિયોજનાય ।
સુનીથાય નઃ શવસાન નોધાઃ પ્રાતર્ મક્ષૂ ધિયાવસુર્ જગમ્યાત્ ॥