ઋગ્વેદ · અધ્યાય 1.035

હ્વયામ્ય્ અગ્નિમ્ પ્રથમં સ્વસ્તયે હ્વયામિ મિત્રાવરુણાવ્ ઇહાવસે ।
હ્વયામિ રાત્રીં જગતો નિવેશનીં હ્વયામિ દેવં સવિતારમ્ ઊતયે ॥

આ કૃષ્ણેન રજસા વર્તમાનો નિવેશયન્ન્ અમૃતમ્ મર્ત્યં ચ ।
હિરણ્યયેન સવિતા રથેના દેવો યાતિ ભુવનાનિ પશ્યન્ ॥

યાતિ દેવઃ પ્રવતા યાત્ય્ ઉદ્વતા યાતિ શુભ્રાભ્યાં યજતો હરિભ્યામ્ ।
આ દેવો યાતિ સવિતા પરાવતો ઽપ વિશ્વા દુરિતા બાધમાનઃ ॥

અભીવૃતં કૃશનૈર્ વિશ્વરૂપં હિરણ્યશમ્યં યજતો બૃહન્તમ્ ।
આસ્થાદ્ રથં સવિતા ચિત્રભાનુઃ કૃષ્ણા રજાંસિ તવિષીં દધાનઃ ॥

વિ જનાઞ્ છ્યાવાઃ શિતિપાદો અખ્યન્ રથં હિરણ્યપ્રüગં વહન્તઃ ।
શશ્વદ્ વિશઃ સવિતુર્ દૈવ્યસ્યોપસ્થે વિશ્વા ભુવનાનિ તસ્થુઃ ॥

તિસ્રો દ્યાવઃ સવિતુર્ દ્વા ઉપસ્થાઁ એકા યમસ્ય ભુવને વિરાષાટ્ ।
આણિં ન રથ્યમ્ અમૃતાધિ તસ્થુર્ ઇહ બ્રવીતુ ય ઉ તચ્ ચિકેતત્ ॥

વિ સુપર્ણો અન્તરિક્ષાણ્ય્ અખ્યદ્ ગભીરવેપા અસુરઃ સુનીથઃ ।
ક્વે3દાનીં સૂર્યઃ કશ્ ચિકેત કતમાં દ્યાં રશ્મિર્ અસ્યા તતાન ॥

અષ્ટૌ વ્ય્ અખ્યત્ કકુભઃ પૃથિવ્યાસ્ ત્રી ધન્વ યોજના સપ્ત સિન્ધૂન્ ।
હિરણ્યાક્ષઃ સવિતા દેવ આગાદ્ દધદ્ રત્ના દાશુષે વાર્યાણિ ॥

હિરણ્યપાણિઃ સવિતા વિચર્ષણિર્ ઉભે દ્યાવાપૃથિવી અન્તર્ ઈયતે ।
અપામીવામ્ બાધતે વેતિ સૂર્યમ્ અભિ કૃષ્ણેન રજસા દ્યામ્ ઋણોતિ ॥

હિરણ્યહસ્તો અસુરઃ સુનીથઃ સુમૃળીકઃ સ્વવાઁ યાત્વ્ અર્વાઙ્ ।
અપસેધન્ રક્ષસો યાતુધાનાન્ અસ્થાદ્ દેવઃ પ્રતિદોષં ગૃણાનઃ ॥

યે તે પન્થાઃ સવિતઃ પૂર્વ્યાસો ઽરેણવઃ સુકૃતા અન્તરિક્ષે ।
તેભિર્ નો અદ્ય પથિભિઃ સુગેભી રક્ષા ચ નો અધિ ચ બ્રૂહિ દેવ ॥