રેવાખાણ્ડ (સંશોધિત પાઠ) · અધ્યાય 226

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે રેવાસાગરસઙ્ગમે ઽલિકેશ્વરતીર્થમાહાત્મ્યવર્ણનં નામ પઞ્ચવિંશત્યધિકદ્વિશતતમો ઽધ્યાયઃ ॥
ર્ક્વ્ અધ્યાય 226
માર્કણ્ડેય ઉવાચ:
તતઃ ક્રોશાન્તરે પુણ્યં તીર્થં તદ્વિમલેશ્વરમ્ ।
યત્ર સ્નાનેન દાનેન જપહોમાર્ચનાદિભિઃ

વિમલેશ્વરમારાધ્ય યો યદિચ્છેત્સ તલ્લભેત્ ।
સ્વર્ગલાભાદિકં વાપિ પાર્થિવં વા યથેપ્સિતમ્

પુરા ત્રિશિરસં હત્વા ત્વષ્ટુઃ પુત્રં શતક્રતુઃ ।
યસ્ય તીર્થસ્ય માહાત્મ્યાદ્વૈમલ્યં પરમં ગતઃ

યત્ર વેદનિધિર્વિપ્રો મહત્તપ્ત્વા તપઃ પુરા ।
નાનાકર્મમલૈઃ ક્ષીણૈર્ વિમલો ઽભવદ્ અર્કવત્

મહાદેવપ્રસાદેન સોમવત્ પ્રિયદર્શનઃ ।
પુરા ભાનુમતીં ભાનુઃ સુતાં સ્મરશરાર્દિતઃ

ચકમે તેન દોષેણ કુષ્ઠરોગાર્દિતો ઽભવત્ ।
સ ચાપ્યત્ર તપસ્તપ્ત્વા વિમલત્વમ્ ઉપાગતઃ

મહાદેવેન તુષ્ટેન સ્વસ્થાનં મુદિતો ઽભજત્ ।
તથૈવ ચ પુરા પાર્થ વિભાણ્ડકસુતો મુનિઃ

યોગિસઙ્ગં વને પ્રાપ્ય પુરે ચ નૃપતેસ્ તથા ।
રાજસંસર્ગદોષાદ્વૈ માલિન્યં પરમાત્મનઃ

વિચારયન્નભ્યુપેત્ય રેવાસાગરસઙ્ગમમ્ ।
શાન્તયા ભાર્યયા સાર્દ્ધં તપ્ત્વા દ્વાદશવત્સરાન્

કૃચ્છ્રચાન્દ્રાયણૈર્ દેવં તોષયંસ્ત્ર્યમ્બકં મુનિઃ ।
મહાદેવેન તુષ્ટેન સો ઽપિ વૈમલ્યમાપ્તવાન્

શર્વાણ્યા પ્રેરિતઃ શર્વઃ પુરા દારુવને નૃપ ।
મોહનાન્મુનિપત્નીનાં સ્વં દીક્ષ્ય વિમલં કિલ

વિચાર્ય પરમસ્થાનં નર્મદોદધિસઙ્ગમમ્ ।
તત્ર સ્થિત્વા મહારાજ તપસ્તપ્ત્વા સહોમયા

વિમલો ઽસૌ યતો જાતસ્તેનાસૌ વિમલેશ્વરઃ ।
તેન નામ્ના સ્વયં તસ્થૌ લોકાનાં હિતકામ્યયા

તતસ્તિલોત્તમાં સૃષ્ટ્વા બ્રહ્મા લોકપિતામહઃ ।
પ્રજાનાથો ઽપિ તાં સૃષ્ટ્વા દૃષ્ટ્વાગ્રે સુમનોહરામ્

ભાવિયોગબલાક્રાન્તઃ સ તસ્યામભિકો ઽભવત્ ।
તેન વીક્ષ્ય સદોષત્વં રેવાતીરદ્વયં શ્રિતઃ

તીર્થાન્યનુસરન્મૌની ત્રિસ્નાયી સંસ્મરઞ્છિવમ્ ।
રેવાર્ણવસમાયોગે સ્નાત્વા સમ્પૂજ્ય શઙ્કરમ્ ।
કાલેનાલ્પેન રાજર્ષે બ્રહ્માપ્યમલતાં ગતઃ

એવમન્યે ઽપિ બહુશો દેવર્ષિનૃપસત્તમાઃ ।
ત્યક્ત્વા દોષમલં તત્ર વિમલા બહવો ઽભવન્

તથા ત્વમપિ રાજેન્દ્ર તત્ર સ્નાત્વા શિવાર્ચનાત્ ।
અમલો ઽપિ વિશેષેણ વૈમલ્યં પ્રાપ્સ્યસે પરમ્

તત્ર સ્નાત્વા નરો નારી પૂજયિત્વા મહેશ્વરમ્ ।
પાપદોષવિનિર્મુક્તો બ્રહ્મલોકે મહીયતે

તત્રોપવાસં યઃ કૃત્વા પશ્યેત વિમલેશ્વરમ્ ।
અષ્ટમ્યાં ચ ચતુર્દશ્યાં સર્વપર્વસુ પાર્થિવ

સપ્તજન્મકૃતં પાપં હિત્વા યાતિ શિવાલયમ્ ।
શ્રાદ્ધં કૃત્વા વિધાનેન પિત્ઃણામ્ અનૃણી ભવેત્ ।
બ્રાહ્મણાન્ ભોજયેચ્છક્ત્યા તેભ્યો દદ્યાચ્ચ દક્ષિણામ્

યદ્યદિષ્ટતમં લોકે યચ્ચૈવાત્મહિતં ગૃહે ।
તત્તદ્ગુણવતે દેયં તત્રૈવાક્ષયમિચ્છતા ।
સ્વર્ણધાન્યાનિ વાસાંસિ છત્રોપાનત્કમણ્ડલુમ્

ગૃહં દેવસ્ય વૈ શક્ત્યા કૃત્વા સ્યાદ્ ભુવિ ભૂપતિઃ ।
ગીતનૃત્યકથાભિશ્ચ તોષયેત્ પરમેશ્વરમ્