રત્નત્રયપરીક્ષા · શ્લોક 178-197

તથૈકદેશતો બિન્દુઃ શક્તેર્વ્યાપ્નોતિ ચાખિલમ્
એવં માયૈકદેશેન વિકરોતિ તથાખિલમ્ ॥

વ્યાપ્નોતિ કાર્યમાત્મીયં તથૈવાવ્યક્તમિષ્યતે
તત્રાક્ષુબ્ધે ભવેદ્ભોગો બિન્દાવાનન્દરૂપિણિ ॥

ક્ષુબ્ધે ઽધિકારો દેવસ્ય લયો ઽતિક્રાન્તબિન્દુકઃ
એકૈવ ખલુ ચિચ્છક્તિઃ શિવસ્ય સમવાયિની ॥

ત્રિવિધોપાધિસમ્ભેદાલ્ લયભોગાધિકારિણી
તયૈતયાભિસમ્બન્ધાદ્ એકો દેવસ્ત્રિધા ભવેત્ ॥

શિવઃ સદાશિવો ઽધીશો લયભોગાધિકારવાન્
શક્તિરપ્રતિઘોદાર મરીચિનિચયાત્મિકા ॥

નિત્યોદિતાનવચ્છિન્ના નિર્વિકલ્પસ્વરૂપિણી
નિરાવરણવિર્દ્વન્દ્વ નિરુપાદાનવૈભવા ॥

વિવિધોપાધિસમ્બન્ધ વિવર્તભિદુરોદયા
શાન્તોદિતપ્રપઞ્ચાદિ બિન્દુવ્યાપ્તિપટીયસી ॥

પરાનપેક્ષાનન્યાત્મ પ્રકાશ્યા સર્વતોમુખી
આદિમધ્યાન્તરહિતા રહિતા સર્વબન્ધનૈઃ ॥

નિષ્ઠા કાષ્ઠા પરા સૂક્ષ્મા વસ્તુમાત્રાતિલાલસા
ચિતિરેવ મતામ્લાન મહિમા પરમેષ્ઠિનઃ ॥

શિવસ્યાનાહિતાપૂર્વ વિશેષસ્યૈવ સન્નિધૌ
તયૈતયાભિસમ્બન્ધ વિશેષાન્નિત્યરૂપયા ॥

વિકરોતિ વિચિત્રાભિર્ વૃત્તિભિઃ સ્થગયન્નિવ
બિન્દુરાપૂરયન્નાદૈર્ આણવં ચિન્નભો મુહુઃ ॥

સરિદ્વાનભિસમ્બન્ધાદ્ ઇન્દુનાર્કસ્ય સન્નિધૌ
વિકરોતિ યથા લોલૈઃ કલ્લોલૈર્નાદયન્નભઃ ॥

સૈષા શિવાશ્રયા શક્તિર્ અમોઘા બલશાલિની
એકાનેકવિભાગેવ કાર્યભેદાદ્ વિભાવ્યતે ॥

યથૈકા સવિતુઃ શક્તિર્ દાનાદાનાદિકર્મભિઃ
ઇચ્છાકાર્યમનિચ્છાપિ કુર્વાણેચ્છા ચિદવ્યયા ॥

જ્ઞાનમજ્ઞાનરૂપૈવમ્ અક્રિયાપિ ક્રિયા તથા
યદ્ યસ્યાઃ કાર્યમામ્નાય લોકાભ્યામવધારિતમ્ ॥

તદેતદ્રૂપિણી શક્તિઃ કુરુતે ઽચિન્ત્યવૈભવા
કામાનપિ બહૂનેકઃ કલ્પવૃક્ષઃ પ્રયચ્છતિ ॥

ચિન્તામણિશ્ચ વિવિધાન્ અચિન્ત્યમહિમા યથા
તથાનાહિતસંસ્કાર વિશેષૈકસ્વરૂપિણી ॥

ચિદચિન્ત્યા વિભોઃ શક્તિર્ અશેષાર્થક્રિયાવિધૌ
ન જાયતે ન મ્રિયતે ક્ષીયતે ન ચ વર્ધતે ॥

ચિતિઃ શક્તિઃ પ્રકાશત્વાદ્ અજડત્વાચ્ચ યત્ પુનઃ
ઉત્પદ્યતે નશ્યતિ વા ચિનોત્યપચિનોતિ ચ ॥

તદપ્રકાશરૂપં વા જડં વા દૃશ્યતે યથા
શરીરાદિ તથા નાસૌ તસ્માન્નૈષા વિકારિણી ॥