રામાયણ · અધ્યાય 7.099

પ્રભાતાયાં તુ શર્વર્યાં પૃથુવક્ષા મહાયશાઃ
રામઃ કમલપત્રાક્ષઃ પુરોધસમ્ અથાબ્રવીત્

અગ્નિહોત્રં વ્રજત્વ્ અગ્રે સર્પિર્ જ્વલિતપાવકમ્
વાજપેયાતપત્રં ચ શોભયાનં મહાપથમ્

તતો વસિષ્ઠસ્ તેજસ્વી સર્વં નિરવશેષતઃ
ચકાર વિધિવદ્ ધર્મ્યં મહાપ્રાસ્થાનિકં વિધિમ્

તતઃ ક્ષૌમામ્બરધરો બ્રહ્મ ચાવર્તયન્ પરમ્
કુશાન્ ગૃહીત્વા પાણિભ્યાં પ્રસજ્ય પ્રયયાવ્ અથ

અવ્યાહરન્ ક્વ ચિત્ કિં ચિન્ નિશ્ચેષ્ટો નિઃસુખઃ પથિ
નિર્જગામ ગૃહાત્ તસ્માદ્ દીપ્યમાનો યથાંશુમાન્

રામસ્ય પાર્શ્વે સવ્યે તુ પદ્મા શ્રીઃ સુસમાહિતા
દક્ષિણે હ્રીર્ વિશાલાક્ષી વ્યવસાયસ્ તથાગ્રતઃ

શરા નાનાવિધાશ્ ચાપિ ધનુર્ આયતવિગ્રહમ્
અનુવ્રજન્તિ કાકુત્સ્થં સર્વે પુરુષવિગ્રહાઃ

વેદા બ્રાહ્મણરૂપેણ સાવિત્રી સર્વરક્ષિણી
ઓંકારો ઽથ વષટ્કારઃ સર્વે રામમ્ અનુવ્રતાઃ

ઋષયશ્ ચ મહાત્માનઃ સર્વ એવ મહીસુરાઃ
અન્વગચ્છન્ત કાકુત્સ્થં સ્વર્ગદ્વારમ્ ઉપાગતમ્

તં યાન્તમ્ અનુયાન્તિ સ્મ અન્તઃપુરચરાઃ સ્ત્રિયઃ
સવૃદ્ધબાલદાસીકાઃ સવર્ષવરકિંકરાઃ

સાન્તઃપુરશ્ ચ ભરતઃ શત્રુઘ્નસહિતો યયૌ
રામવ્રતમ્ ઉપાગમ્ય રાઘવં સમનુવ્રતાઃ

તતો વિપ્રા મહાત્માનઃ સાગ્નિહોત્રાઃ સમાહિતાઃ
સપુત્રદારાઃ કાકુત્સ્થમ્ અન્વગચ્છન્ મહામતિમ્

મન્ત્રિણો ભૃત્યવર્ગાશ્ ચ સપુત્રાઃ સહબાન્ધવાઃ
સાનુગા રાઘવં સર્વે અન્વગચ્છન્ પ્રહૃષ્ટવત્

તતઃ સર્વાઃ પ્રકૃતયો હૃષ્ટપુષ્ટજનાવૃતાઃ
અનુજગ્મુઃ પ્રગચ્છન્તં રાઘવં ગુણરઞ્જિતાઃ

સ્નાતં પ્રમુદિતં સર્વં હૃષ્ટપુષ્પમ્ અનુત્તમમ્
દૃપ્તં કિલિકિલાશબ્દૈઃ સર્વં રામમ્ અનુવ્રતમ્

ન તત્ર કશ્ ચિદ્ દીનો ઽભૂદ્ વ્રીડિતો વાપિ દુઃખિતઃ
હૃષ્ટં પ્રમુદિતં સર્વં બભૂવ પરમાદ્ભુતમ્

દ્રષ્ટુકામો ઽથ નિર્યાણં રાજ્ઞો જાનપદો જનઃ
સંપ્રાપ્તઃ સો ઽપિ દૃષ્ટ્વૈવ સહ સર્વૈર્ અનુવ્રતઃ

ઋક્ષવાનરરક્ષાંસિ જનાશ્ ચ પુરવાસિનઃ
અગછન્ પરયા ભક્ત્યા પૃષ્ઠતઃ સુસમાહિતાઃ