રામાયણ · અધ્યાય 7.098

તે દૂતા રામવાક્યેન ચોદિતા લઘુવિક્રમાઃ
પ્રજગ્મુર્ મધુરાં શીઘ્રં ચક્રુર્ વાસં ન ચાધ્વનિ

તતસ્ ત્રિભિર્ અહો રાત્રૈઃ સંપ્રાપ્ય મધુરામ્ અથ
શત્રુઘ્નાય યથાવૃત્તમ્ આચખ્યુઃ સર્વમ્ એવ તત્

લક્ષ્મણસ્ય પરિત્યાગં પ્રતિજ્ઞાં રાઘવસ્ય ચ
પુત્રયોર્ અભિષેકં ચ પૌરાનુગમનં તથા

કુશસ્ય નગરી રમ્યા વિન્ધ્યપર્વતરોધસિ
કુશાવતીતિ નામ્ના સા કૃતા રામેણ ધીમતા

શ્રાવિતા ચ પુરી રમ્યા શ્રાવતીતિ લવસ્ય ચ
અયોધ્યાં વિજનાં ચૈવ ભરતં રાઘવાનુગમ્

એવં સર્વં નિવેદ્યાશુ શત્રુઘ્નાય મહાત્મને
વિરેમુસ્ તે તતો દૂતાસ્ ત્વર રાજન્ન્ ઇતિ બ્રુવન્

શ્રુત્વા તં ઘોરસંકાશં કુલક્ષયમ્ ઉપસ્થિતમ્
પ્રકૃતીસ્ તુ સમાનીય કાઞ્ચનં ચ પુરોહિતમ્

તેષાં સર્વં યથાવૃત્તમ્ આખ્યાય રઘુનન્દનઃ
આત્મનશ્ ચ વિપર્યાસં ભવિષ્યં ભ્રાતૃભિઃ સહ

તતઃ પુત્રદ્વયં વીરઃ સો ઽભ્યષિઞ્ચન્ નરાધિપઃ
સુબાહુર્ મધુરાં લેભે શત્રુઘાતી ચ વૈદિશમ્

દ્વિધાકૃત્વા તુ તાં સેનાં માધુરીં પુત્રયોર્ દ્વયોઃ
ધનધાન્યસમાયુક્તૌ સ્થાપયામ્ આસ પાર્થિવૌ

તતો વિસૃજ્ય રાજાનં વૈદિશે શત્રુઘાતિનમ્
જગામ ત્વરિતો ઽયોધ્યાં રથેનૈકેન રાઘવઃ

સ દદર્શ મહાત્માનં જ્વલન્તમ્ ઇવ પાવકમ્
ક્ષૌમસૂક્ષ્મામ્બરધરં મુનિભિઃ સાર્ધમ્ અક્ષયૈઃ

સો ઽભિવાદ્ય તતો રામં પ્રાઞ્જલિઃ પ્રયતેન્દ્રિયઃ
ઉવાચ વાક્યં ધર્મજ્ઞો ધર્મમ્ એવાનુચિન્તયન્

કૃત્વાભિષેકં સુતયોર્ યુક્તં રાઘવયોર્ ધનૈઃ
તવાનુગમને રાજન્ વિદ્ધિ માં કૃતનિશ્ચયમ્

ન ચાન્યદ્ અત્ર વક્તવ્યં દુસ્તરં તવ શાસનમ્
ત્યક્તું નાર્હસિ માં વીર ભક્તિમન્તં વિશેષતઃ

તસ્ય તાં બુદ્ધિમ્ અક્લીબાં વિજ્ઞાય રઘુનન્દનઃ
બાઢમ્ ઇત્ય્ એવ શત્રુઘ્નં રામો વચનમ્ અબ્રવીત્

તસ્ય વાક્યસ્ય વાક્યાન્તે વાનરાઃ કામરૂપિણઃ
ઋક્ષરાક્ષસસંઘાશ્ ચ સમાપેતુર્ અનેકશઃ

દેવપુત્રા ઋષિસુતા ગન્ધર્વાણાં સુતાસ્ તથા
રામ ક્ષયં વિદિત્વા તે સર્વ એવ સમાગતાઃ

તે રામમ્ અભિવાદ્યાહુઃ સર્વ એવ સમાગતાઃ
તવાનુગમને રાજન્ સંપ્રાપ્તાઃ સ્મ મહાયશઃ

યદિ રામ વિનાસ્માભિર્ ગચ્છેસ્ ત્વં પુરુષર્ષભ
યમદણ્ડમ્ ઇવોદ્યમ્ય ત્વયા સ્મ વિનિપાતિતાઃ

એવં તેષાં વચઃ શ્રુત્વા ઋષ્કવાનરરક્ષસામ્
વિભીષણમ્ અથોવાચ મધુરં શ્લક્ષ્ણયા ગિરા

યાવત્ પ્રજા ધરિષ્યન્તિ તાવત્ ત્વં વૈ વિભીષણ
રાક્ષસેન્દ્ર મહાવીર્ય લઙ્કાસ્થઃ સ્વં ધરિષ્યસિ

પ્રજાઃ સંરક્ષ ધર્મેણ નોત્તરં વક્તુમ્ અર્હસિ

તમ્ એવમ્ ઉક્ત્વા કાકુત્સ્થો હનૂમન્તમ્ અથાબ્રવીત્
જીવિતે કૃતબુદ્ધિસ્ ત્વં મા પ્રતિજ્ઞાં વિલોપય

મત્કથાઃ પ્રચરિષ્યન્તિ યાવલ્ લોકે હરીશ્વર
તાવત્ ત્વં ધારયન્ પ્રાણાન્ પ્રતિજ્ઞામ્ અનુપાલય

તથૈવમ્ ઉક્ત્વા કાકુત્સ્થઃ સર્વાંસ્ તાન્ ઋક્ષવાનરાન્
મયા સાર્ધં પ્રયાતેતિ તદા તાન્ રાઘવો ઽબ્રવીત્