રામાયણ · અધ્યાય 7.094

શૃણુ રામ મહાબાહો યદર્થમ્ અહમ્ આહતઃ
પિતામહેન દેવેન પ્રેષિતો ઽસ્મિ મહાબલ

તવાહં પૂર્વકે ભાવે પુત્રઃ પરપુરંજય
માયાસંભાવિતો વીર કાલઃ સર્વસમાહરઃ

પિતામહશ્ ચ ભગવાન્ આહ લોકપતિઃ પ્રભુઃ
સમયસ્ તે મહાબાહો સ્વર્લોકાન્ પરિરક્ષિતુમ્

સંક્ષિપ્ય ચ પુરા લોકાન્ માયયા સ્વયમ્ એવ હિ
મહાર્ણવે શયાનો ઽપ્સુ માં ત્વં પૂર્વમ્ અજીજનઃ

ભોગવન્તં તતો નાગમ્ અનન્તમ્ ઉદકે શયમ્
માયયા જનયિત્વા ત્વં દ્વૌ ચ સત્ત્વૌ મહાબલૌ

મધું ચ કૈટભં ચૈવ યયોર્ અસ્થિચયૈર્ વૃતા
ઇયં પર્વતસંબાધા મેદિની ચાભવન્ મહી

પદ્મે દિવ્યાર્કસંકાશે નાભ્યામ્ ઉત્પાદ્ય મામ્ અપિ
પ્રાજાપત્યં ત્વયા કર્મ સર્વં મયિ નિવેશિતમ્

સો ઽહં સંન્યસ્તભારો હિ ત્વામ્ ઉપાસે જગત્પતિમ્
રક્ષાં વિધત્સ્વ ભૂતેષુ મમ તેજઃ કરો ભવાન્

તતસ્ ત્વમ્ અપિ દુર્ધર્ષસ્ તસ્માદ્ ભાવાત્ સનાતનાત્
રક્ષાર્થં સર્વભૂતાનાં વિષ્ણુત્વમ્ ઉપજગ્મિવાન્

અદિત્યાં વીર્યવાન્ પુત્રો ભ્રાતૄણાં હર્ષવર્ધનઃ
સમુત્પન્નેષુ કૃત્યેષુ લોકસાહ્યાય કલ્પસે

સ ત્વં વિત્રાસ્યમાનાસુ પ્રજાસુ જગતાં વર
રાવણસ્ય વધાકાઙ્ક્ષી માનુષેષુ મનો ઽદધાઃ

દશવર્ષસહસ્રાણિ દશવર્ષશતાનિ ચ
કૃત્વા વાસસ્ય નિયતિં સ્વયમ્ એવાત્મનઃ પુરા

સ ત્વં મનોમયઃ પુત્રઃ પૂર્ણાયુર્ માનુષેષ્વ્ ઇહ
કાલો નરવરશ્રેષ્ઠ સમીપમ્ ઉપવર્તિતુમ્

યદિ ભૂયો મહારાજ પ્રજા ઇચ્છસ્ય્ ઉપાસિતુમ્
વસ વા વીર ભદ્રં તે એવમ્ આહ પિતામહઃ

અથ વા વિજિગીષા તે સુરલોકાય રાઘવ
સનાથા વિષ્ણુના દેવા ભવન્તુ વિગતજ્વરાઃ

શ્રુત્વા પિતામહેનોક્તં વાક્યં કાલસમીરિતમ્
રાઘવઃ પ્રહસન્ વાક્યં સર્વસંહારમ્ અબ્રવીત્

શ્રુતં મે દેવદેવસ્ય વાક્યં પરમમ્ અદ્ભુતમ્
પ્રીતિર્ હિ મહતી જાતા તવાગમનસંભવા

ભદ્રં તે ઽસ્તુ ગમિષ્યામિ યત એવાહમ્ આગતઃ
હૃદ્ ગતો હ્ય્ અસિ સંપ્રાપ્તો ન મે ઽસ્ત્ય્ અત્ર વિચારણા

મયા હિ સર્વકૃત્યેષુ દેવાનાં વશવર્તિનામ્
સ્થાતવ્યં સર્વસંહારે યથા હ્ય્ આહ પિતામહઃ