રામાયણ · અધ્યાય 7.093

કસ્ય ચિત્ ત્વ્ અથ કાલસ્ય રામે ધર્મપથે સ્થિતે
કાલસ્ તાપસરૂપેણ રાજદ્વારમ્ ઉપાગમત્

સો ઽબ્રવીલ્ લક્ષ્મણં વાક્યં ધૃતિમન્તં યશસ્વિનમ્
માં નિવેદય રામાય સંપ્રાપ્તં કાર્યગૌરવાત્

દૂતો હ્ય્ અતિબલસ્યાહં મહર્ષેર્ અમિતૌજસઃ
રામં દિદૃક્ષુર્ આયાતઃ કાર્યેણ હિ મહાબલ

તસ્ય તદ્ વચનં શ્રુત્વા સૌમિત્રિસ્ ત્વરયાન્વિતઃ
ન્યવેદયત રામાય તાપસસ્ય વિવક્ષિતમ્

જયસ્વ રાજન્ ધર્મેણ ઉભૌ લોકૌ મહાદ્યુતે
દૂતસ્ ત્વાં દ્રષ્ટુમ્ આયાતસ્ તપસ્વી ભાસ્કરપ્રભઃ

તદ્ વાક્યં લક્ષ્મણેનોક્તં શ્રુત્વા રામ ઉવાચ હ
પ્રવેશ્યતાં મુનિસ્ તાત મહૌજાસ્ તસ્ય વાક્યધૃક્

સૌમિત્રિસ્ તુ તથેત્ય્ ઉક્ત્વા પ્રાવેશયત તં મુનિમ્
જ્વલન્તમ્ ઇવ તેજોભિઃ પ્રદહન્તમ્ ઇવાંશુભિઃ

સો ઽભિગમ્ય રઘુશ્રેષ્ઠં દીપ્યમાનં સ્વતેજસા
ઋષિર્ મધુરયા વાચા વર્ધસ્વેત્ય્ આહ રાઘવમ્

તસ્મૈ રામો મહાતેજાઃ પૂજામ્ અર્ઘ્ય પુરોગમામ્
દદૌ કુશલમ્ અવ્યગ્રં પ્રષ્ટું ચૈવોપચક્રમે

પૃષ્ઠશ્ ચ કુશલં તેન રામેણ વદતાં વરઃ
આસને કાઞ્ચને દિવ્યે નિષસાદ મહાયશાઃ

તમ્ ઉવાચ તતો રામઃ સ્વાગતં તે મહામુને
પ્રાપયસ્વ ચ વાક્યાનિ યતો દૂતસ્ ત્વમ્ આગતઃ

ચોદિતો રાજસિંહેન મુનિર્ વાક્યમ્ ઉદીરયત્
દ્વન્દ્વમ્ એતત્ પ્રવક્તવ્યં ન ચ ચક્ષુર્ હતં વચઃ

યઃ શૃણોતિ નિરીક્ષેદ્ વા સ વધ્યસ્ તવ રાઘવ
ભવેદ્ વૈ મુનિમુખ્યસ્ય વચનં યદ્ય્ અવેક્ષસે

તથેતિ ચ પ્રતિજ્ઞાય રામો લક્ષ્મણમ્ અબ્રવીત્
દ્વારિ તિષ્ઠ મહાબાહો પ્રતિહારં વિસર્જય

સ મે વધ્યઃ ખલુ ભવેત્ કથાં દ્વન્દ્વસમીરિતામ્
ઋષેર્ મમ ચ સૌમિત્રે પશ્યેદ્ વા શૃણુયા ચ યઃ

તતો નિક્ષિપ્ય કાકુત્સ્થો લક્ષ્મણં દ્વારસંગ્રહે
તમ્ ઉવાચ મુનિં વાક્યં કથયસ્વેતિ રાઘવઃ

યત્ તે મનીષિતં વાક્યં યેન વાસિ સમાહિતઃ
કથયસ્વ વિશઙ્કસ્ ત્વં મમાપિ હૃદિ વર્તતે