રામાયણ · અધ્યાય 7.092

તચ્ છ્રુત્વા હર્ષમ્ આપેદે રાઘવો ભ્રાતૃભિઃ સહ
વાક્યં ચાદ્ભુતસંકાશં ભ્રાતૄન્ પ્રોવાચ રાઘવઃ

ઇમૌ કુમારૌ સૌમિત્રે તવ ધર્મવિશારદૌ
અઙ્ગદશ્ ચન્દ્રકેતુશ્ ચ રાજ્યાર્હૌ દૃઢધન્વિનૌ

ઇમૌ રાજ્યે ઽભિષેક્ષ્યામિ દેશઃ સાધુ વિધીયતામ્
રમણીયો હ્ય્ અસંબાધો રમેતાં યત્ર ધન્વિનૌ

ન રાજ્ઞાં યત્ર પીદા સ્યાન્ નાશ્રમાણાં વિનાશનમ્
સ દેશો દૃશ્યતાં સૌમ્ય નાપરાધ્યામહે યથા

તથોક્તવતિ રામે તુ ભરતઃ પ્રત્યુવાચ હ
અયં કારાપથો દેશઃ સુરમણ્યો નિરામયઃ

નિવેશ્યતાં તત્ર પુરમ્ અઙ્ગદસ્ય મહાત્મનઃ
ચન્દ્રકેતોશ્ ચ રુચિરં ચન્દ્રકાન્તં નિરામયમ્

તદ્ વાક્યં ભરતેનોક્તં પ્રતિજગ્રાહ રાઘવઃ
તં ચ કૃતા વશે દેશમ્ અઙ્ગદસ્ય ન્યવેશયત્

અઙ્ગદીયા પુરી રમ્યા અઙ્ગદસ્ય નિવેશિતા
રમણીયા સુગુપ્તા ચ રામેણાક્લિષ્ટકર્મણા

ચન્દ્રકેતુસ્ તુ મલ્લસ્ય મલ્લભૂમ્યાં નિવેશિતા
ચન્દ્રકાન્તેતિ વિખ્યાતા દિવ્યા સ્વર્ગપુરી યથા

તતો રામઃ પરાં પ્રીતિં ભરતો લક્ષ્મણસ્ તથા
યયુર્ યુધિ દુરાધર્ષા અભિષેકં ચ ચક્રિરે

અભિષિચ્ય કુમારૌ દ્વૌ પ્રસ્થાપ્ય સબલાનુગૌ
અઙ્ગદં પશ્ચિમા ભૂમિં ચન્દ્રકેતુમ્ ઉદઙ્મુખમ્

અઙ્ગદં ચાપિ સૌમિત્રિર્ લક્ષ્મણો ઽનુજગામ હ
ચન્દ્રકેતોસ્ તુ ભરતઃ પાર્ષ્ણિગ્રાહો બભૂવ હ

લક્ષ્મણસ્ ત્વ્ અઙ્ગદીયાયાં સંવત્સરમ્ અથોષિતઃ
પુત્રે સ્થિતે દુરાધર્ષે અયોધ્યાં પુનર્ આગમત્

ભરતો ઽપિ તથૈવોષ્ય સંવત્સરમ્ અથાધિકમ્
અયોધ્યાં પુનર્ અગમ્ય રામપાદાવ્ ઉપાગમત્

ઉભૌ સૌમિત્રિભરતૌ રામપાદાવ્ અનુવ્રતૌ
કાલં ગતમ્ અપિ સ્નેહાન્ ન જજ્ઞાતે ઽતિધાર્મિકૌ

એવં વર્ષસહસ્રાણિ દશતેષાં યયુસ્ તદા
ધર્મે પ્રયતમાનાનાં પૌરકાર્યેષુ નિત્યદા

વિહૃત્ય લાકં પરિપૂર્ણમાનસાઃ શ્રિયા વૃતા ધર્મપથે પરે સ્થિતાઃ
ત્રયઃ સમિદ્ધા ઇવ દીપ્તતેજસા હુતાગ્નયઃ સાધુ મહાધ્વરે ત્રયઃ