રામાયણ · અધ્યાય 7.091

શ્રુત્વા સેનાપતિં પ્રાપ્તં ભરતં કેકયાધિપઃ
યુધાજિદ્ ગાર્ગ્યસહિતં પરાં પ્રીતિમ્ ઉપાગમત્

સ નિર્યયૌ જનૌઘેન મહતા કેકયાધિપઃ
ત્વરમાણો ઽભિચક્રામ ગન્ધર્વાન્ દેવરૂપિણઃ

ભરતશ્ ચ યુધાજિચ્ ચ સમેતૌ લઘુવિક્રમૌ
ગન્ધર્વનગરં પ્રાપ્તૌ સબલૌ સપદાનુગૌ

શ્રુત્વા તુ ભરતં પ્રાપ્તં ગન્ધર્વાસ્ તે સમાગતાઃ
યોદ્ધુકામા મહાવીર્યા વિનદન્તઃ સમન્તતઃ

તતઃ સમભવદ્ યુદ્ધં તુમુલં લોમહર્ષણમ્
સપ્તરાત્રં મહાભીમં ન ચાન્યતરયોર્ જયઃ

તતો રામાનુજઃ ક્રુદ્ધઃ કાલસ્યાસ્ત્રં સુદારુણમ્
સંવર્તં નામ ભરતો ગન્ધર્વેષ્વ્ અભ્યયોજયત્

તે બદ્ધાઃ કાલપાશેન સંવર્તેન વિદારિતાઃ
ક્ષણેનાભિહતાસ્ તિસ્રસ્ તત્ર કોટ્યો મહાત્મના

તં ઘાતં ઘોરસંકાશં ન સ્મરન્તિ દિવૌકસઃ
નિમેષાન્તરમાત્રેણ તાદૃશાનાં મહાત્મનામ્

હતેષુ તેષુ વીરેષુ ભરતઃ કૈકયીસુતઃ
નિવેશયામ્ આસ તદા સમૃદ્ધે દ્વે પુરોત્તમે
તક્ષં તક્ષશિલાયાં તુ પુષ્કરં પુષ્કરાવતૌ

ગન્ધર્વદેશો રુચિરો ગાન્ધારવિષયશ્ ચ સઃ
વર્ષૈઃ પઞ્ચભિર્ આકીર્ણો વિષયૈર્ નાગરૈસ્ તથા

ધનરત્નૌઘસંપૂર્ણો કાનનૈર્ ઉપશોભિતે
અન્યોન્યસંઘર્ષકૃતે સ્પર્ધયા ગુણવિસ્તરે

ઉભે સુરુચિરપ્રખ્યે વ્યવહારૈર્ અકલ્મષૈઃ
ઉદ્યાનયાનૌઘવૃતે સુવિભક્તાન્તરાપણે

ઉભે પુરવરે રમ્યે વિસ્તરૈર્ ઉપશોભિતે
ગૃહમુખ્યૈઃ સુરુચિરૈર્ વિમાનૈઃ સમવર્ણિભિઃ

શોભિતે શોભનીયૈશ્ ચ દેવાયતનવિસ્તરૈઃ
નિવેશ્ય પઞ્ચભિર્ વર્ષૈર્ ભરતો રાઘવાનુજઃ
પુનર્ આયાન્ મહાબાહુર્ અયોધ્યાં કૈકયીસુતઃ

સો ઽભિવાદ્ય મહાત્માનં સાક્ષાદ્ ધર્મમ્ ઇવાપરમ્
રાઘવં ભરતઃ શ્રીમાન્ બ્રહ્માણમ્ ઇવ વાસવઃ

શશંસ ચ યથાવૃત્તં ગન્ધર્વવધમ્ ઉત્તમમ્
નિવેશનં ચ દેશસ્ય શ્રુત્વા પ્રીતો ઽસ્ય રાઘવઃ