રામાયણ · અધ્યાય 7.090

કસ્ય ચિત્ ત્વ્ અથ કાલસ્ય યુધાજિત્ કેકયો નૃપઃ
સ્વગુરું પ્રેષયામ્ આસ રાઘવાય મહાત્મને

ગાર્ગ્યમ્ અઙ્ગિરસઃ પુત્રં બ્રહ્મર્ષિમ્ અમિતપ્રભમ્
દશ ચાશ્વસહસ્રાણિ પ્રીતિદાનમ્ અનુત્તમમ્

કમ્બલાનિ ચ રત્નાનિ ચિત્રવસ્ત્રમ્ અથોત્તમમ્
રામાય પ્રદદૌ રાજા બહૂન્ય્ આભરણાનિ ચ

શ્રુત્વા તુ રાઘવો ગાર્ગ્યં મહર્ષિં સમુપાગતમ્
માતુલસ્યાશ્વપતિનઃ પ્રિયં દૂતમ્ ઉપાગતમ્

પ્રત્યુદ્ગમ્ય ચ કાકુત્સ્થઃ ક્રોશમાત્રં સહાનુગઃ
ગાર્ગ્યં સંપૂજયામ્ આસ ધનં તત્ પ્રતિગૃહ્ય ચ

પૃષ્ટ્વા ચ પ્રીતિદં સર્વં કુશલં માતુલસ્ય ચ
ઉપવિષ્ટં મહાભાગં રામઃ પ્રષ્ટું પ્રચક્રમે

કિમ્ આહ મતુલો વાક્યં યદર્થં ભગવાન્ ઇહ
પ્રાપ્તો વાક્યવિદાં શ્રેષ્ઠ સાક્ષાદ્ ઇવ બૃહસ્પતિઃ

રામસ્ય ભાષિતં શ્રુત્વા બ્રહ્મર્ષિઃ કાર્યવિસ્તરમ્
વક્તુમ્ અદ્ભુતસંકાશં રાઘવાયોપચક્રમે

માતુલસ્ તે મહાબાહો વાક્યમ્ આહ નરર્ષભ
યુધાજિત્ પ્રીતિસંયુક્તં શ્રૂયતાં યદિ રોચતે

અયં ગન્ધર્વવિષયઃ ફલમૂલોપશોભિતઃ
સિન્ધોર્ ઉભયતઃ પાર્શ્વે દેશઃ પરમશોભનઃ

તં ચ રક્ષન્તિ ગન્ધર્વાઃ સાયુધા યુદ્ધકોવિદાઃ
શૈલૂષસ્ય સુતા વીરાસ્ તિસ્રઃ કોટ્યો મહાબલાઃ

તાન્ વિનિર્જિત્ય કાકુત્સ્થ ગન્ધર્વવિષયં શુભમ્
નિવેશય મહાબાહો દ્વે પુરે સુસમાહિતઃ

અન્યસ્ય ન ગતિસ્ તત્ર દેશશ્ ચાયં સુશોભનઃ
રોચતાં તે મહાબાહો નાહં ત્વામ્ અનૃતં વદે

તચ્ છ્રુત્વા રાઘવઃ પ્રીતો મહર્ષેર્ માતુલસ્ય ચ
ઉવાચ બાઢમ્ ઇત્ય્ એવં ભરતં ચાન્વવૈક્ષત

સો ઽબ્રવીદ્ રાઘવઃ પ્રીતઃ પ્રાઞ્જલિપ્રગ્રહો દ્વિજમ્
ઇમૌ કુમારૌ તં દેશં બ્રહ્મર્ષે વિજયિષ્યતઃ

ભરતસ્યાત્મજૌ વીરૌ તક્ષઃ પુષ્કલ એવ ચ
માતુલેન સુગુપ્તૌ તૌ ધર્મેણ ચ સમાહિતૌ

ભરતં ચાગ્રતઃ કૃત્વા કુમારૌ સબલાનુગૌ
નિહત્ય ગન્ધર્વસુતાન્ દ્વે પુરે વિભજિષ્યતઃ

નિવેશ્ય તે પુરવરે આત્માજૌ સંનિવેશ્ય ચ
આગમિષ્યતિ મે ભૂયઃ સકાશમ્ અતિધાર્મિકઃ

બ્રહ્મર્ષિમ્ એવમ્ ઉક્ત્વા તુ ભરતં સબલાનુગમ્
આજ્ઞાપયામ્ આસ તદા કુમારૌ ચાભ્યષેચયત્

નક્ષત્રેણ ચ સૌમ્યેન પુરસ્કૃત્યાઙ્ગિરઃ સુતમ્
ભરતઃ સહ સૈન્યેન કુમારાભ્યાં ચ નિર્યયૌ

સા સેના શક્રયુક્તેવ નરગાન્ નિર્યયાવ્ અથ
રાઘવાનુગતા દૂરં દુરાધર્ષા સુરાસુરૈઃ

માંસાશીનિ ચ સત્ત્વાનિ રક્ષાંસિ સુમહાન્તિ ચ
અનુજગ્મુશ્ ચ ભરતં રુધિરસ્ય પિપાસયા

ભૂતગ્રામાશ્ ચ બહવો માંસભક્ષાઃ સુદારુણાઃ
ગન્ધર્વપુત્રમાંસાનિ ભોક્તુકામાઃ સહસ્રશઃ

સિંહવ્યાઘ્રસૃગાલાનાં ખેચરાણાં ચ પક્ષિણામ્
બહૂનિ વૈ સહસ્રાણિ સેનાયા યયુર્ અગ્રતઃ

અધ્યર્ધમાસમ્ ઉષિતા પથિ સેના નિરામયા
હૃષ્ટપુષ્ટજનાકીર્ણા કેકયં સમુપાગમત્