રામાયણ · અધ્યાય 7.089

તદાવસાને યજ્ઞસ્ય રામઃ પરમદુર્મનાઃ
અપશ્યમાનો વૈદેહીં મેને શૂન્યમ્ ઇદં જગત્
શોકેન પરમાયત્તો ન શાન્તિં મનસાગમત્

વિસૃજ્ય પાર્થિવાન્ સર્વાન્ ઋક્ષવાનરરાક્ષસાન્
જનૌઘં બ્રહ્મમુખ્યાનાં વિત્તપૂર્ણં વ્યસર્જયત્

તતો વિસૃજ્ય તાન્ સર્વાન્ રામો રાજીવલોચનઃ
હૃદિ કૃત્વા તદા સીતામ્ અયોધ્યાં પ્રવિવેશ સઃ

ન સીતાયાઃ પરાં ભાર્યાં વવ્રે સ રઘુનન્દનઃ
યજ્ઞે યજ્ઞે ચ પત્ન્યર્થં જાનકી કાઞ્ચની ભવત્

દશવર્ષસહસ્રાણિ વાજિમેધમ્ ઉપાકરોત્
વાજપેયાન્ દશગુણાંસ્ તથા બહુસુવર્ણકાન્

અગ્નિષ્ટોમાતિરાત્રાભ્યાં ગોસવૈશ્ ચ મહાધનૈઃ
ઈજે ક્રતુભિર્ અન્યૈશ્ ચ સ શ્રીમાન્ આપ્તદક્ષિણૈઃ

એવં સ કાલઃ સુમહાન્ રાજ્યસ્થસ્ય મહાત્મનઃ
ધર્મે પ્રયતમાનસ્ય વ્યતીયાદ્ રાઘવસ્ય તુ

ઋક્ષવાનરરક્ષાંસિ સ્થિતા રામસ્ય શાસને
અનુરજ્યન્તિ રાજાનો અહન્ય્ અહનિ રાઘવમ્

કાલે વર્ષતિ પર્જન્યઃ સુભિક્ષં વિમલા દિશઃ
હૃષ્ટપુષ્ટજનાકીર્ણં પુરં જનપદસ્ તથા

નાકાલે મ્રિયતે કશ્ ચિન્ ન વ્યાધિઃ પ્રાણિનાં તદા
નાધર્મશ્ ચાભવત્ કશ્ ચિદ્ રામે રાજ્યં પ્રશાસતિ

અથ દીર્ઘસ્ય કાલસ્ય રામમાતા યશસ્વિની
પુત્રપૌત્રૈઃ પરિવૃતા કાલધર્મમ્ ઉપાગમત્

અન્વિયાય સુમિત્રાપિ કૈકેયી ચ યશસ્વિની
ધર્મં કૃત્વા બહુવિધં ત્રિદિવે પર્યવસ્થિતા

સર્વાઃ પ્રતિષ્ઠિતાઃ સ્વર્ગે રાજ્ઞા દશરથેન ચ
સમાગતા મહાભાગાઃ સહ ધર્મં ચ લેભિરે

તાસાં રામો મહાદાનં કાલે કાલે પ્રયચ્છતિ
માતૄણામ્ અવિશેષેણ બ્રાહ્મણેષુ તપસ્વિષુ

પિત્ર્યાણિ બહુરત્નાનિ યજ્ઞાન્ પરમદુસ્તરાન્
ચકાર રામો ધર્માત્મા પિતૄન્ દેવાન્ વિવર્ધયન્