રામાયણ · અધ્યાય 7.088

વાલ્મીકિનૈવમ્ ઉક્તસ્ તુ રાઘવઃ પ્રત્યભાષત
પ્રાઞ્જલિર્ જગતો મધ્યે દૃષ્ટ્વા તાં દેવવર્ણિનીમ્

એવમ્ એતન્ મહાભાગ યથા વદસિ ધર્મવિત્
પ્રત્યયો હિ મમ બ્રહ્મંસ્ તવ વાક્યૈર્ અકલ્મષૈઃ

પ્રત્યયો હિ પુરા દત્તો વૈદેહ્યા સુરસંનિધૌ
સેયં લોકભયાદ્ બ્રહ્મન્ન્ અપાપેત્ય્ અભિજાનતા
પરિત્યક્તા મયા સીતા તદ્ ભવાન્ ક્ષન્તુમ્ અર્હતિ

જાનામિ ચેમૌ પુત્રૌ મે યમજાતૌ કુશીલવૌ
શુદ્ધાયાં જગતો મધ્યે મૈથિલ્યાં પ્રીતિર્ અસ્તુ મે

અભિપ્રાયં તુ વિજ્ઞાય રામસ્ય સુરસત્તમાઃ
પિતામહં પુરસ્કૃત્ય સર્વ એવ સમાગતાઃ

આદિત્યા વસવો રુદ્રા વિશ્વે દેશા મરુદ્ગણાઃ
અશ્વિનાવ્ ઋષિગન્ધર્વા અપ્સરાણાં ગણાસ્ તથા
સાધ્યાશ્ ચ દેવાઃ સર્વે તે સર્વે ચ પરમર્ષયઃ

તતો વાયુઃ શુભઃ પુણ્યો દિવ્યગન્ધો મનોરમઃ
તં જનૌઘં સુરશ્રેષ્ઠો હ્લાદયામ્ આસ સર્વતઃ

તદ્ અદ્ભુતમ્ ઇવાચિન્ત્યં નિરીક્ષન્તે સમાહિતાઃ
માનવાઃ સર્વરાષ્ટ્રેભ્યઃ પૂર્વં કૃતયુગે યથા

સર્વાન્ સમાગતાન્ દૃષ્ટ્વા સીતા કાષાયવાસિની
અબ્રવીત્ પ્રાઞ્જલિર્ વાક્યમ્ અધોદૃષ્ટિર્ અવાન્મુખી

યથાહં રાઘવાદ્ અન્યં મનસાપિ ન ચિન્તયે
તથા મે માધવી દેવી વિવરં દાતુમ્ અર્હતિ

તથા શપન્ત્યાં વૈદેહ્યાં પ્રાદુરાસીત્ તદ્ અદ્ભુતમ્
ભૂતલાદ્ ઉત્થિતં દિવ્યં સિંહાસનમ્ અનુત્તમમ્

ધ્રિયમાણં શિરોભિસ્ તન્ નાગૈર્ અમિતવિક્રમૈઃ
દિવ્યં દિવ્યેન વપુષા સર્વરત્નવિભૂષિતમ્

તસ્મિંસ્ તુ ધરણી દેવી બાહુભ્યાં ગૃહ્ય મૈથિલીમ્
સ્વાગતેનાભિનન્દ્યૈનામ્ આસને ચોપવેષયત્

તામ્ આસનગતાં દૃષ્ટ્વા પ્રવિશન્તીં રસાતલમ્
પુણ્યવૃષ્ટિર્ અવિચ્છિન્ના દિવ્યા સીતામ્ અવાકિરત્

સાધુકારશ્ ચ સુમહાન્ દેવાનાં સહસોત્થિતઃ
સાધુ સાધ્વ્ ઇતિ વૈ સીતે યસ્યાસ્ તે શીલમ્ ઈદૃશમ્

એવં બહુવિધા વાચો હ્ય્ અન્તરિક્ષગતાઃ સુરાઃ
વ્યાજહ્રુર્ હૃષ્ટમનસો દૃષ્ટ્વા સીતાપ્રવેશનમ્

યજ્ઞવાટગતાશ્ ચાપિ મુનયઃ સર્વ એવ તે
રાજાનશ્ ચ નરવ્યાઘ્રા વિસ્મયાન્ નોપરેમિરે

અન્તરિક્ષે ચ ભૂમૌ ચ સર્વે સ્થાવરજઙ્ગમાઃ
દાનવાશ્ ચ મહાકાયાઃ પાતાલે પન્નગાધિપાઃ

કે ચિદ્ વિનેદુઃ સંહૃષ્ટાઃ કે ચિદ્ ધ્યાનપરાયણાઃ
કે ચિદ્ રામં નિરીક્ષન્તે કે ચિત્ સીતામ્ અચેતનાઃ

સીતાપ્રવેશનં દૃષ્ટ્વા તેષામ્ આસીત્ સમાગમઃ
તં મુહૂર્તમ્ ઇવાત્યર્થં સર્વં સંમોહિતં જગત્