રામાયણ · અધ્યાય 7.087

તસ્યાં રજન્યાં વ્યુષ્ટાયાં યજ્ઞવાટગતો નૃપઃ
ઋષીન્ સર્વાન્ મહાતેજાઃ શબ્દાપયતિ રાઘવઃ

વસિષ્ઠો વામદેવશ્ ચ જાબાલિર્ અથ કાશ્યપઃ
વિશ્વામિત્રો દીર્ઘતપા દુર્વાસાશ્ ચ મહાતપાઃ

અગસ્ત્યો ઽથ તથાશક્તિર્ ભાર્ગવશ્ ચૈવ વામનઃ
માર્કણ્ડેયશ્ ચ દીર્ઘાયુર્ મૌદ્ગલ્યશ્ ચ મહાતપાઃ

ભાર્ગવશ્ ચ્યવનશ્ ચૈવ શતાનન્દશ્ ચ ધર્મવિત્
ભરદ્વાજશ્ ચ તેજસ્વી અગ્નિપુત્રશ્ ચ સુપ્રભઃ

એતે ચાન્યે ચ મુનયો બહવઃ સંશિતવ્રતાઃ
રાજાનશ્ ચ નરવ્યાઘ્રાઃ સર્વ એવ સમાગતાઃ

રાક્ષસાશ્ ચ મહાવીર્યા વાનરાશ્ ચ મહાબલાઃ
સમાજગ્મુર્ મહાત્માનઃ સર્વ એવ કુતૂહલાત્

ક્ષત્રિયાશ્ ચૈવ વૈશ્યાશ્ ચ શૂદ્રાશ્ ચૈવ સહસ્રશઃ
સીતાશપથવીક્ષાર્થં સર્વ એવ સમાગતાઃ

તથા સમાગતં સર્વમ્ અશ્વભૂતમ્ ઇવાચલમ્
શ્રુત્વા મુનિવરસ્ તૂર્ણં સસીતઃ સમુપાગમત્

તમ્ ઋષિં પૃષ્ઠતઃ સીતા સાન્વગચ્છદ્ અવાઙ્મુખી
કૃતાઞ્જલિર્ બાષ્પગલા કૃત્વા રામં મનોગતમ્

તાં દૃષ્ટ્વા શ્રીમ્ ઇવાયાન્તીં બ્રહ્માણમ્ અનુગામિનીમ્
વાલ્મીકેઃ પૃષ્ઠતઃ સીતાં સાધુકારો મહાન્ અભૂત્

તતો હલહલા શબ્દઃ સર્વેષામ્ એવમ્ આબભૌ
દુઃખજેન વિશાલેન શોકેનાકુલિતાત્મનામ્

સાધુ સીતેતિ કે ચિત્ તુ સાધુ રામેતિ ચાપરે
ઉભાવ્ એવ તુ તત્રાન્યે સાધુ સાધ્વ્ ઇતિ ચાબ્રુવન્

તતો મધ્યં જનૌઘાનાં પ્રવિશ્ય મુનિપુંગવઃ
સીતાસહાયો વાલ્મીકિર્ ઇતિ હોવાચ રાઘવમ્

ઇયં દાશરથે સીતા સુવ્રતા ધર્મચારિણી
અપાપા તે પરિત્યક્તા મમાશ્રમસમીપતઃ

લોકાપવાદભીતસ્ય તવ રામ મહાવ્રત
પ્રત્યયં દાસ્યતે સીતા તામ્ અનુજ્ઞાતુમ્ અર્હસિ

ઇમૌ ચ જાનકી પુત્રાવ્ ઉભૌ ચ યમજાતકૌ
સુતૌ તવૈવ દુર્ધર્ષો સત્યમ્ એતદ્ બ્રવીમિ તે

પ્રચેતસો ઽહં દશમઃ પુત્રો રાઘવનન્દન
ન સ્મરામ્ય્ અનૃતં વાક્યં તથેમૌ તવ પુત્રકૌ

બહુવર્ષસહસ્રાણિ તપશ્ચર્યા મયા કૃતા
તસ્યાઃ ફલમ્ ઉપાશ્નીયામ્ અપાપા મૈથિલી યથા

અહં પઞ્ચસુ ભૂતેષુ મનઃષષ્ઠેષુ રાઘવ
વિચિન્ત્ય સીતાં શુદ્ધેતિ ન્યગૃહ્ણાં વનનિર્ઝરે

ઇયં શુદ્ધસમાચારા અપાપા પતિદેવતા
લોકાપવાદભીતસ્ય દાસ્યતિ પ્રત્યયં તવ