રામાયણ · અધ્યાય 7.086

રામો બહૂન્ય્ અહાન્ય્ એવ તદ્ ગીતં પરમાદ્ભુતમ્
શુશ્રાવ મુનિભિઃ સાર્ધં રાજભિઃ સહ વાનરૈઃ

તસ્મિન્ ગીતે તુ વિજ્ઞાય સીતાપુત્રૌ કુશીલવૌ
તસ્યાઃ પરિષદો મધ્યે રામો વચનમ્ અબ્રવીત્

મદ્વચો બ્રૂત ગચ્છધ્વમ્ ઇતિ ભગવતો ઽન્તિકમ્

યદિ શુદ્ધસમાચારા યદિ વા વીતકલ્મષા
કરોત્વ્ ઇહાત્મનઃ શુદ્ધિમ્ અનુમાન્ય મહામુનિમ્

છન્દં મુનેસ્ તુ વિજ્ઞાય સીતાયાશ્ ચ મનોગતમ્
પ્રત્યયં દાતુકામાયાસ્ તતઃ શંસત મે લઘુ

શ્વઃ પ્રભાતે તુ શપથં મૈથિલી જનકાત્મજા
કરોતુ પરિષન્મધ્યે શોધનાર્થં મમેહ ચ

શ્રુત્વા તુ રાઘવસ્યૈતદ્ વચઃ પરમમ્ અદ્ભુતમ્
દૂતાઃ સંપ્રયયુર્ વાટં યત્રાસ્તે મુનિપુંગવઃ

તે પ્રણમ્ય મહાત્માનં જ્વલન્તમ્ અમિતપ્રભમ્
ઊચુસ્ તે રામ વાક્યાનિ મૃદૂનિ મધુરાણિ ચ

તેષાં તદ્ ભાષિતં શ્રુત્વા રામસ્ય ચ મનોગતમ્
વિજ્ઞાય સુમહાતેજા મુનિર્ વાક્યમ્ અથાબ્રવીત્

એવં ભવતુ ભદ્રં વો યથા તુષ્યતિ રાઘવઃ
તથા કરિષ્યતે સીતા દૈવતં હિ પતિઃ સ્ત્રિયાઃ

તથોક્તા મુનિના સર્વે રામદૂતા મહૌજસઃ
પ્રત્યેત્ય રાઘવં સર્વે મુનિવાક્યં બભાષિરે

તતઃ પ્રહૃષ્ટઃ કાકુત્સ્થઃ શ્રુત્વા વાક્યં મહાત્મનઃ
ઋષીંસ્ તત્ર સમેતાંશ્ ચ રાજ્ઞશ્ ચૈવાભ્યભાષત

ભગવન્તઃ સશિષ્યા વૈ સાનુગશ્ ચ નરાધિપાઃ
પશ્યન્તુ સીતાશપથં યશ્ ચૈવાન્યો ઽભિકાઙ્ક્ષતે

તસ્ય તદ્ વચનં શ્રુત્વા રાઘવસ્ય મહાત્મનઃ
સર્વેષમ્ ઋષિમુખ્યાનાં સાધુવાદો મહાન્ અભૂત્

રાજાનશ્ ચ મહાત્માનઃ પ્રશંસન્તિ સ્મ રાઘવમ્
ઉપપન્નં નરશ્રેષ્ઠ ત્વય્ય્ એવ ભુવિ નાન્યતઃ

એવં વિનિશ્ચયં કૃત્વા શ્વોભૂત ઇતિ રાઘવઃ
વિસર્જયામ્ આસ તદા સર્વાંસ્ તાઞ્ શત્રુસૂદનઃ