રામાયણ · અધ્યાય 7.083

તત્ સર્વમ્ અખિલેનાશુ પ્રસ્થાપ્ય ભરતાગ્રજઃ
હયં લક્ષ્મણસંપન્નં કૃષ્ણસારં મુમોચ હ

ઋત્વિગ્ભિર્ લક્ષ્મણં સાર્ધમ્ અશ્વે ચ વિનિયુજ્ય સઃ
તતો ઽભ્યગચ્છત્ કાકુત્સ્થઃ સહ સૈન્યેન નૈમિષમ્

યજ્ઞવાટં મહાબાહુર્ દૃષ્ટ્વા પરમમ્ અદ્ભુતમ્
પ્રહર્ષમ્ અતુલં લેભે શ્રીમાન્ ઇતિ ચ સો ઽબ્રવીત્

નૈમિષે વસતસ્ તસ્ય સર્વ એવ નરાધિપાઃ
આજગ્મુઃ સર્વરાષ્ટ્રેભ્યસ્ તાન્ રામઃ પ્રત્યપૂજયત્

ઉપકાર્યાન્ મહાર્હાંશ્ ચ પાર્થિવાનાં મહાત્મનામ્
સાનુગાનાં નરશ્રેષ્ઠો વ્યાદિદેશ મહાદ્યુતિઃ

અન્નપાનાનિ વસ્ત્રાણિ સાનુગાનાં મહાત્મનામ્
ભરતઃ સંદદાવ્ આશુ શત્રુઘ્નસહિતસ્ તદા

વાનરાશ્ ચ મહાત્માનઃ સુગ્રીવસહિતાસ્ તદા
વિપ્રાણાં પ્રણતાઃ સર્વે ચક્રિરે પરિવેષણમ્

વિભીષણશ્ ચ રક્ષોભિઃ સ્રગ્વિભિર્ બહુભિર્ વૃતઃ
ઋષીણામ્ ઉગ્રતપસાં કિંકરઃ પર્યુપસ્થિતઃ

એવં સુવિહિતો યજ્ઞો હયમેધો ઽભ્યવર્તત
લક્ષ્મણેનાભિગુપ્તા ચ હયચર્યા પ્રવર્તિતા

નાન્યઃ શબ્દો ઽભવત્ તત્ર હયમેધે મહાત્મનઃ
છન્દતો દેહિ વિસ્રબ્ધો યાવત્ તુષ્યન્તિ યાચકાઃ
તાવદ્ વાનરરક્ષોભિર્ દત્તમ્ એવાભ્યદૃશ્યત

ન કશ્ ચિન્ મલિનસ્ તત્ર દીનો વાપ્ય્ અથ વા કૃશઃ
તસ્મિન્ યજ્ઞવરે રાજ્ઞો હૃષ્ટપુષ્ટજનાવૃતે

યે ચ તત્ર મહાત્માનો મુનયશ્ ચિરજીવિનઃ
નાસ્મરંસ્ તાદૃશં યજ્ઞં દાનૌઘસમલંકૃતમ્

રજતાનાં સુવર્ણાનાં રત્નાનામ્ અથ વાસસામ્
અનિશં દીયમાનાનાં નાન્તઃ સમુપદૃશ્યતે

ન શક્રસ્ય ન સોમસ્ય યમસ્ય વરુણસ્ય વા
ઈદૃશો દૃષ્ટપૂર્વો ન એવમ્ ઊચુસ્ તપોધનાઃ

સર્વત્ર વાનરાસ્ તસ્થુઃ સર્વત્રૈવ ચ રાક્ષસાઃ
વાસો ધનાનિ કામિભ્યઃ પૂર્ણહસ્તા દદુર્ ભૃશમ્

ઈદૃશો રાજસિંહસ્ય યજ્ઞઃ સર્વગુણાન્વિતઃ
સંવત્સરમ્ અથો સાગ્રં વર્તતે ન ચ હીયતે