રામાયણ · અધ્યાય 7.082

એતદ્ આખ્યાય કાકુત્સ્થો ભ્રાતૃહ્યામ્ અમિતપ્રભઃ
લક્ષ્મણં પુનાર્ એવાહ ધર્મયુક્તમ્ ઇદં વચઃ

વસિષ્ઠં વામદેવં ચ જાબાલિમ્ અથ કશ્યપમ્
દ્વિજાંશ્ ચ સર્વપ્રવરાન્ અશ્વમેધપુરસ્કૃતાન્

એતાન્ સર્વાન્ સમાહૂય મન્ત્રયિત્વા ચ લક્ષ્મણ
હયં લક્ષ્મણસંપન્નં વિમોક્ષ્યામિ સમાધિના

તદ્ વાક્યં રાઘવેણોક્તં શ્રુત્વા ત્વરિતવિક્રમઃ
દ્વિજાન્ સર્વાન્ સમાહૂય દર્શયામ્ આસ રાઘવમ્

તે દૃષ્ટ્વા દેવસંકાશં કૃતપાદાભિવન્દનમ્
રાઘવં સુદુરાધર્ષમ્ આશીર્ભિઃ સમપૂજયન્

પ્રાઞ્જલિસ્ તુ તતો ભૂત્વા રાઘવો દ્વિજસાત્તમાન્
ઉવાચ ધર્મસંયુક્તમ્ અશ્વમેધાશ્રિતં વચઃ

સ તેષાં દ્વિજમુખ્યાનાં વાક્યમ્ અદ્ભુતદર્શનમ્
અશ્વમેધાશ્રિતં શ્રુત્વા ભૃશં પ્રીતો ઽભવત્ તદા

વિજ્ઞાય તુ મતં તેષાં રામો લક્ષ્મણમ્ અબ્રવીત્
પ્રેષયસ્વ મહાબાહો સુગ્રીવાય મહાત્મને

શીઘ્રં મહદ્ભિર્ હરિભિર્ બહિભિશ્ ચ તદાશ્રયૈઃ
સાર્ધમ્ આગચ્છ ભદ્રં તે અનુભોક્તું મખોત્તમમ્

વિભીષણશ્ ચ રક્ષોભિઃ કામગૈર્ બહુભિર્ વૃતઃ
અશ્વમેધં મહાબાહુઃ પ્રાપ્નોતુ લઘુવિક્રમઃ

રાજાનશ્ ચ નરવ્યાઘ્ર યે મે પ્રિયચિકીર્ષવઃ
સાનુગાઃ ક્ષિપ્રમ્ આયાન્તુ યજ્ઞભૂમિમ્ અનુત્તમામ્

દેશાન્તરગતા યે ચ દ્વિજા ધર્મપરાયણાઃ
નિમન્ત્રયસ્વ તાન્ સર્વાન્ અશ્વમેધાય લક્ષ્મણ

ઋષયશ્ ચા મહાબાહો આહૂયન્તાં તપોધનાઃ
દેશાન્તરગતા યે ચ સદારાશ્ ચ મહર્ષયઃ

યજ્ઞવાટશ્ ચ સુમહાન્ ગોમત્યા નૈમિષે વને
આજ્ઞાપ્યતાં મહાબાહો તદ્ ધિ પુણ્યમ્ અનુત્તમમ્

શતં વાહસહસ્રાણાં તણ્ડુલાનાં વપુષ્મતામ્
અયુતં તિલમુદ્ગસ્ય પ્રયાત્વ્ અગ્રે મહાબલ

સુવર્ણકોટ્યો બહુલા હિરણ્યસ્ય શતોત્તરાઃ
અગ્રતો ભરતઃ કૃત્વા ગચ્છત્વ્ અગ્રે મહામતિઃ

અન્તરાપણવીથ્યશ્ ચ સર્વાંશ્ ચ નટનર્તકાન્
નૈગમાન્ બાલવૃદ્ધાંશ્ ચ દ્વિજાંશ્ ચ સુસમાહિતાન્

કર્માન્તિકાંશ્ ચ કુશલાઞ્ શિલ્પિનશ્ ચ સુપણ્ડિતાન્
માતરશ્ ચૈવ મે સર્વાઃ કુમારાન્તઃપુરાણિ ચ

કાઞ્ચનીં મમ પત્નીં ચ દીક્ષાર્હાં યજ્ઞકર્મણિ
અગ્રતો ભરતઃ કૃત્વા ગચ્છત્વ્ અગ્રે મહામતિઃ