રામાયણ · અધ્યાય 7.077

તથા વૃત્રવધં સર્વમ્ અખિલેન સ લક્ષ્મણઃ
કથયિત્વા નરશ્રેષ્ઠઃ કથાશેષમ્ ઉપાક્રમત્

તતો હતે મહાવીર્યે વૃત્રે દેવભયંકરે
બ્રહ્મહત્યાવૃતઃ શક્રઃ સંજ્ઞાં લેભે ન વૃત્રહા

સો ઽન્તમ્ આશ્રિત્ય લોકાનાં નષ્ટસંજ્ઞો વિચેતનઃ
કાલં તત્રાવસત્ કં ચિદ્ વેષ્ટમાનો યથોરગઃ

અથ નષ્ટે સહસ્રાક્ષે ઉદ્વિગ્નમ્ અભવજ્ જગત્
ભૂમિશ્ ચ ધ્વસ્તસંકાશા નિઃસ્નેહા શુષ્કકાનના

નિઃસ્રોતસશ્ ચામ્બુવાહા હ્રદાશ્ ચ સરિતસ્ તથા
સંક્ષોભશ્ ચૈવ સત્ત્વાનામ્ અનાવૃષ્ટિકૃતો ઽભવત્

ક્ષીયમાણે તુ લોકે ઽસ્મિન્ સંભ્રાન્તમનસઃ સુરાઃ
યદ્ ઉક્તં વિષ્ણુના પૂર્વં તં યજ્ઞં સમુપાનયન્

તતઃ સર્વે સુરગણાઃ સોપાધ્યાયાઃ સહર્ષિભિઃ
તં દેશં સહિતા જગ્મુર્ યત્રેન્દ્રો ભયમોહિતઃ

તે તુ દૃષ્ટ્વા સહસ્રાક્ષં મોહિતં બ્રહ્મહત્યયા
તં પુરસ્કૃત્ય દેવેશમ્ અશ્વમેધં પ્રચક્રિરે

તતો ઽશ્વમેધઃ સુમહાન્ મહેન્દ્રસ્ય મહાત્મનઃ
વવૃધે બ્રહ્મહત્યાયાઃ પાવનાર્થં નરેશ્વર

તતો યજ્ઞસમાપ્તૌ તુ બ્રહ્મહત્યા મહાત્મનઃ
અભિગમ્યાબ્રવીદ્ વાક્યં ક્વ મે સ્થાનં વિધાસ્યથ

તે તામ્ ઊચુસ્ તતો દેવાસ્ તુષ્ટાઃ પ્રીતિસમન્વિતાઃ
ચતુર્ધા વિભજાત્માનમ્ આત્મનૈવ દુરાસદે

દેવાનાં ભાષિતં શ્રુત્વા બ્રહ્મહત્યા મહાત્મનામ્
સંનિધૌ સ્થાનમ્ અન્યત્ર વરયામ્ આસ દુર્વસા

એકેનાંશેન વત્સ્યામિ પૂર્ણોદાસુ નદીષુ વૈ
દ્વિતીયેન તુ વૃક્ષેષુ સત્યમ્ એતદ્ બ્રવીમિ વઃ

યો ઽયમ્ અંશસ્ તૃતીયો મે સ્ત્રીષુ યૌવનશાલિષુ
ત્રિરાત્રં દર્પપર્ણાસુ વસિષ્યે દર્પઘાતિની

હન્તારો બ્રાહ્મણાન્ યે તુ પ્રેક્ષાપૂર્વમ્ અદૂષકાન્
તાંશ્ ચતુર્થેન ભાગેન સંશ્રયિષ્યે સુરર્ષભાઃ

પ્રત્યૂચુસ્ તાં તતો દેવા યથા વદસિ દુર્વસે
તથા ભવતુ તત્ સર્વં સાધયસ્વ યથેપ્સિતમ્

તતઃ પ્રીત્યાન્વિતા દેવાઃ સહસ્રાક્ષં વવન્દિરે
વિજ્વરઃ પૂતપાપ્મા ચ વાસવઃ સમપદ્યત

પ્રશાન્તં ચ જગત્ સર્વં સહસ્રાક્ષે પ્રતિષ્ઠતે
યજ્ઞં ચાદ્ભુતસંકાશં તદા શક્રો ઽભ્યપૂજયત્

ઈદૃશો હ્ય્ અશ્વમેધસ્ય પ્રભાવો રઘુનન્દન
યજસ્વ સુમહાભાગ હયમેધેન પાર્થિવ