રામાયણ · અધ્યાય 7.074

તચ્ છ્રુત્વા ભાષિતં તસ્ય રામસ્યાક્લિષ્ટકર્મણઃ
દ્વાઃસ્થઃ કુમારાવ્ આહૂય રાઘવાય ન્યવેદયત્

દૃષ્ટ્વા તુ રાઘવઃ પ્રાપ્તૌ પ્રિયૌ ભરતલક્ષ્મણૌ
પરિષ્વજ્ય તતો રામો વાક્યમ્ એતદ્ ઉવાચ હ

કૃતં મયા યથાતથ્યં દ્વિજકાર્યમ્ અનુત્તમમ્
ધર્મસેતુમતો ભૂયઃ કર્તુમ્ ઇચ્છામિ રાઘવૌ

યુવાભ્યામ્ આત્મભૂતાભ્યાં રાજસૂયમ્ અનુત્તમમ્
સહિતો યષ્ટુમ્ ઇચ્છામિ તત્ર ધર્મો હિ શાશ્વતઃ

ઇષ્ટ્વા તુ રાજસૂયેન મિત્રઃ શત્રુનિબર્હણઃ
સુહુતેન સુયજ્ઞેન વરુણત્વમ્ ઉપાગમત્

સોમશ્ ચ રાજસૂયેન ઇષ્ટ્વા ધર્મેણ ધર્મવિત્
પ્રાપ્તશ્ ચ સર્વલોકાનાં કીર્તિં સ્થાનં ચ શાશ્વતમ્

અસ્મિન્ન્ અહનિ યચ્ છ્રેયશ્ ચિન્ત્યતાં તન્ મયા સહ
હિતં ચાયતિ યુક્તં ચ પ્રયતૌ વક્તુમ્ અર્હથ

શ્રુતા તુ રાઘવસ્યૈતદ્ વાક્યં વાક્યવિશારદઃ
ભરતઃ પ્રાઞ્જલિર્ ભૂત્વા વાક્યમ્ એતદ્ ઉવાચ હ

ત્વયિ ધર્મઃ પરઃ સાધો ત્વયિ સર્વા વસુંધરા
પ્રતિષ્ઠિતા મહાબાહો યશશ્ ચામિતવિક્રમ

મહીપાલાશ્ ચ સર્વે ત્વાં પ્રજાપતિમ્ ઇવામરાઃ
નિરીક્ષન્તે મહાત્માનો લોકનાથં યથા વયમ્

પ્રજાશ્ ચ પિતૃવદ્ રાજન્ પશ્યન્તિ ત્વાં મહાબલ
પૃથિવ્યાં ગતિભૂતો ઽસિ પ્રાણિનામ્ અપિ રાઘવ

સ ત્વમ્ એવંવિધં યજ્ઞમ્ આહર્તાસિ કથં નૃપ
પૃથિવ્યાં રાજવંશાનાં વિનાશો યત્ર દૃશ્યતે

પૃથિવ્યાં યે ચ પુરુષા રાજન્ પૌરુષમ્ આગતાઃ
સર્વેષાં ભવિતા તત્ર ક્ષયઃ સર્વાન્તકોપમઃ

સ ત્વં પુરુષશાર્દૂલ ગુણૈર્ અતુલવિક્રમ
પૃથિવીં નાર્હસે હન્તું વશે હિ તવ વર્તતે

ભરતસ્ય તુ તદ્ વાક્યં શ્રુત્વામૃતમયં યથા
પ્રહર્ષમ્ અતુલં લેભે રામઃ સત્યપરાક્રમઃ

ઉવાચ ચ શુભાં વાણીં કૈકેય્યા નન્દિવર્ધનમ્
પ્રીતો ઽસ્મિ પરિતુષ્ટો ઽસ્મિ તવાદ્ય વચનેન હિ

ઇદં વચનમ્ અક્લીબં ત્વયા ધર્મસમાહિતમ્
વ્યાહૃતં પુરુષવ્યાઘ્ર પૃથિવ્યાઃ પરિપાલનમ્

એષ તસ્માદ્ અભિપ્રાયાદ્ રાજસૂયાત્ ક્રતૂત્તમાન્
નિવર્તયામિ ધર્મજ્ઞ તવ સુવ્યાહૃતેન વૈ

પ્રજાનાં પાલનં ધર્મો રાજ્ઞાં યજ્ઞેન સંમિતઃ
તસ્માચ્ છૃણોમિ તે વાક્યં સાધૂક્તં સુસમાહિતમ્