રામાયણ · અધ્યાય 7.072

સ મુહૂર્તાદ્ ઉપશ્રુત્ય દેવર્ષિર્ અમિતપ્રભઃ
સ્વમ્ આશ્રમં શિષ્ય વૃતઃ ક્ષુધાર્તઃ સંન્યવર્તત

સો ઽપશ્યદ્ અરજાં દીનાં રજસા સમભિપ્લુતામ્
જ્યોત્સ્નામ્ ઇવારુણગ્રસ્તાં પ્રત્યૂષે ન વિરાજતીમ્

તસ્ય રોષઃ સમભવત્ ક્ષુધાર્તસ્ય વિશેષતઃ
નિર્દહન્ન્ ઇવ લોકાંસ્ ત્રીઞ્ શિષ્યાંશ્ ચેદમ્ ઉવાચ હ

પશ્યધ્વં વિપરીતસ્ય દણ્ડસ્યાવિદિતાત્મનઃ
વિપત્તિં ઘોરસંકાશાં ક્રુદ્ધામ્ અગ્નિશિખામ્ ઇવ

ક્ષયો ઽસ્ય દુર્મતેઃ પ્રાપ્તઃ સાનુગસ્ય દુરાત્મનઃ
યઃ પ્રદીપ્તાં હુતાશસ્ય શિખાં વૈ સ્પ્રષ્ટુમ્ ઇચ્છતિ

યસ્માત્ સ કૃતવાન્ પાપમ્ ઈદૃશં ઘોરદર્શનમ્
તસ્માત્ પ્રાપ્સ્યતિ દુર્મેધાઃ ફલં પાપસ્ય કર્મણઃ

સપ્તરાત્રેણ રાજાસૌ સભૃત્યબલવાહનઃ
પાપકર્મસમાચારો વધં પ્રાપ્સ્યતિ દુર્મતિઃ

સમન્તાદ્ યોજનશતં વિષયં ચાસ્ય દુર્મતેઃ
ધક્ષ્યતે પાંસુવર્ષેણ મહતા પાકશાસનઃ

સર્વસત્ત્વાનિ યાનીહ સ્થાવરાણિ ચરાણિ ચ
મહતા પાંસુવર્ષેણ નાશં યાસ્યન્તિ સર્વશઃ

દણ્ડસ્ય વિષયો યાવત્ તાવત્ સર્વસમુચ્છ્રયઃ
પાંસુભુત ઇવાલક્ષ્યઃ સપ્તરાત્રાદ્ ભવિષ્યતિ

ઇત્ય્ ઉક્ત્વા ક્રોધસંતપસ્ તમ્ આશ્રમનિવાસિનમ્
જનં જનપદાન્તેષુ સ્થીયતામ્ ઇતિ ચાબ્રવીત્

શ્રુત્વા તૂશસનો વાક્યં સ આશ્રમાવસથો જનઃ
નિષ્ક્રાન્તો વિષયાત્ તસ્ય સ્થાનં ચક્રે ઽથ બાહ્યતઃ

સ તથોક્ત્વા મુનિજનમ્ અરજામ્ ઇદમ્ અબ્રવીત્
ઇહૈવ વસ દુર્મેધે આશ્રમે સુસમાહિતા

ઇદં યોજનપર્યન્તં સરઃ સુરુચિરપ્રભમ્
અરજે વિજ્વરા ભુઙ્ક્ષ્વ કાલશ્ ચાત્ર પ્રતીક્ષ્યતામ્

ત્વત્સમીપે તુ યે સત્ત્વા વાસમ્ એષ્યન્તિ તાં નિશામ્
અવધ્યાઃ પાંસુવર્ષેણ તે ભવિષ્યન્તિ નિત્યદા

ઇત્ય્ ઉક્ત્વા ભાર્ગવો વાસમ્ અન્યત્ર સમુપાક્રમત્
સપ્તાહાદ્ ભસ્મસાદ્ભૂતં યથોક્તં બ્રહ્મવાદિના

તસ્યાસૌ દણ્ડવિષયો વિન્ધ્યશૈવલસાનુષુ
શપ્તો બ્રહ્મર્ષિણા તેન પુરા વૈધર્મકે કૃતે

તતઃ પ્રભૃતિ કાકુત્સ્થ દણ્ડકારણ્યમ્ ઉચ્યતે
તપસ્વિનઃ સ્થિતા યત્ર જનસ્થાનમ્ અથો ઽભવત્

એતત્ તે સર્વમ્ આખ્યાતં યન્ માં પૃચ્છસિ રાઘવ
સંધ્યામ્ ઉપાસિતું વીર સમયો હ્ય્ અતિવર્તતે

એતે મહર્ષયઃ સર્વે પૂર્ણકુમ્ભાઃ સમન્તતઃ
કૃતોદકો નરવ્યાઘ્ર આદિત્યં પર્યુપાસતે

સ તૈર્ ઋષિભિર્ અભ્યસ્તઃ સહિતૈર્ બ્રહ્મસત્તમૈઃ
રવિર્ અસ્તં ગતો રામ ગચ્છોદકમ્ ઉપસ્પૃશ