રામાયણ · અધ્યાય 7.064

પ્રસ્થાપ્ય તુ સ શત્રુઘ્નં ભ્રાતૃભ્યાં સહ રાઘવઃ
પ્રમુમોદ સુખી રાજ્યં ધર્મેણ પરિપાલયન્

તતઃ કતિપયાહઃસુ વૃદ્ધો જાનપદો દ્વિજઃ
શવં બાલમ્ ઉપાદાય રાજદ્વારમ્ ઉપાગમત્

રુદન્ બહુવિધા વાચઃ સ્નેહાક્ષરસમન્વિતાઃ
અસકૃત્ પુત્રપુત્રેતિ વાક્યમ્ એતદ્ ઉવાચ હ

કિં નુ મે દુષ્કૃતં કર્મ પૂર્વં દેહાન્તરે કૃતમ્
યદ્ અહં પુત્રમ્ એકં ત્વાં પશ્યામિ નિધનં ગતમ્

અપ્રાપ્તયૌવનં બાલં પઞ્ચવર્ષસમન્વિતમ્
અકાલે કાલમ્ આપન્નં દુઃખાય મમ પુત્રક

અલ્પૈર્ અહોભિર્ નિધનં ગમિષ્યામિ ન સંશયઃ
અહં ચ જનની ચૈવ તવ શોકેન પુત્રક

ન સ્મરામ્ય્ અનૃતં હ્ય્ ઉક્તં ન ચ હિંસાં સ્મરામ્ય્ અહમ્
કેન મે દુષ્કૃતેનાદ્ય બાલ એવ મમાત્મજઃ
અકૃત્વા પિતૃકાર્યાણિ નીતો વૈવસ્વતક્ષયમ્

નેદૃશં દૃષ્ટપૂર્વં મે શ્રુતં વા ઘોરદર્શનમ્
મૃત્યુર્ અપ્રાપ્તકાલાનાં રામસ્ય વિષયે યથા

રામસ્ય દુષ્કૃતં કિં ચિન્ મહદ્ અસ્તિ ન સંશયઃ
ત્વં રાજઞ્ જીવયસ્વૈનં બાલં મૃત્યુવશં ગતમ્

ભ્રાતૃભિઃ સહિતો રાજન્ દીર્ઘમ્ આયુર્ અવાપ્નુહિ
ઉષિતાઃ સ્મ સુખં રાજ્યે તવાસ્મિન્ સુમહાબલ

સંપ્રત્ય્ અનાથો વિષય ઇક્ષ્વાકૂણાં મહાત્મનામ્
રામં નાથમ્ ઇહાસાદ્ય બાલાન્તકરણં નૃપમ્

રાજદોષૈર્ વિપદ્યન્તે પ્રજા હ્ય્ અવિધિપાલિતાઃ
અસદ્વૃત્તે તુ નૃપતાવ્ અકાલે મ્રિયતે જનઃ

યદા પુરેષ્વ્ અયુક્તાનિ જના જનપદેશુ ચ
કુર્વતે ન ચ રક્ષાસ્તિ તદાકાલકૃતં ભયમ્

સવ્યક્તં રાજદોષો ઽયં ભવિષ્યતિ ન સંશયઃ
પુરે જનપદે વાપિ તદા બાલવધો હ્ય્ અયમ્

એવં બહુવિધૈર્ વાક્યૈર્ નિન્દયાનો મુહુર્ મુહુઃ
રાજાનં દુઃખસંતપ્તઃ સુતં તમ્ ઉપગૂહતિ