રામાયણ · અધ્યાય 7.058

યામ્ એવ રાત્રિં શત્રુઘ્ન પર્ણશાલાં સમાવિશત્
તામ્ એવ રાત્રિં સીતાપિ પ્રસૂતા દારકદ્વયમ્

તતો ઽર્ધરાત્રસમયે બાલકા મુનિદારકાઃ
વાલ્મીકેઃ પ્રિયમ્ આચખ્યુઃ સીતાયાઃ પ્રસવં શુભમ્
તસ્ય રક્ષાં મહાતેજઃ કુરુ ભૂતવિનાશિનીમ્

તેષાં તદ્ વચનં શ્રુત્વા મુનિર્ હર્ષમ્ ઉપાગમત્
ભૂતઘ્નીં ચાકરોત્ તાભ્યાં રક્ષાં રક્ષોવિનાશિનીમ્

કુશમુષ્ટિમ્ ઉપાદાય લવં ચૈવ તુ સ દ્વિજઃ
વાલ્મીકિઃ પ્રદદૌ તાભ્યાં રક્ષાં ભૂતવિનાશિનીમ્

યસ્ તયોઃ પૂર્વજો જાતઃ સ કુશૈર્ મન્ત્રસંસ્કૃતૈઃ
નિર્માર્જનીયસ્ તુ ભવેત્ કુશ ઇત્ય્ અસ્ય નામતઃ

યશ્ ચાપરો ભવેત્ તાભ્યાં લવેન સુસમાહિતઃ
નિર્માર્જનીયો વૃદ્ધાભિર્ લવશ્ ચેતિ સ નામતઃ

એવં કુશલવૌ નામ્ના તાવ્ ઉભૌ યમજાતકૌ
મત્કૃતભ્યાં ચ નામભ્યાં ખ્યાતિયુક્તૌ ભવિષ્યતઃ

તે રક્ષાં જગૃહુસ્ તાં ચ મુનિહસ્તાત્ સમાહિતાઃ
અકુર્વંશ્ ચ તતો રક્ષાં તયોર્ વિગતકલ્મષાઃ

તથા તાં ક્રિયમાણાં તુ રક્ષાં ગોત્રં ચ નામ ચ
સંકીર્તનં ચ રામસ્ય સીતાયાઃ પ્રસવૌ શુભૌ

અર્ધરાત્રે તુ શત્રુઘ્નઃ શુશ્રાવ સુમહત્ પ્રિયમ્
પર્ણશાલાં ગતો રાત્રૌ દિષ્ટ્યા દિષ્ટ્યેતિ ચાબ્રવીત્

તથ તસ્ય પ્રહૃષ્ટસ્ય શત્રુઘ્નસ્ય મહાત્મનઃ
વ્યતીતા વાર્ષિકી રાત્રિઃ શ્રાવણી લઘુવિક્રમા

પ્રભાતે તુ મહાવીર્યઃ કૃત્વા પૌર્વાહ્ણિકં ક્રમમ્
મુનિં પ્રાઞ્જલિર્ આમન્ત્ર્ય પ્રાયાત્ પશ્ચાન્મુખઃ પુનઃ

સ ગત્વા યમુનાતીરં સપ્તરાત્રોષિતઃ પથિ
ઋષીણાં પુણ્યકીર્તીનામ્ આશ્રમે વાસમ્ અભ્યયાત્

સ તત્ર મુનિભિઃ સાર્ધં ભાર્ગવપ્રમુખૈર્ નૃપઃ
કથાભિર્ બહુરૂપાભિર્ વાસં ચક્રે મહાયશાઃ