રામાયણ · અધ્યાય 7.056

એવમ્ ઉક્ત્વા તુ કાકુત્સ્થં પ્રશસ્ય ચ પુનઃ પુનઃ
પુનર્ એવાપરં વાક્યમ્ ઉવાચ રઘુનન્દનઃ

ઇમાન્ય્ અશ્વસહસ્રાણિ ચત્વારિ પુરુષર્ષભ
રથાનાં ચ સહસ્રે દ્વે ગજાનાં શતમ્ એવ ચ

અન્તરાપણવીથ્યશ્ ચ નાનાપણ્યોપશોભિતાઃ
અનુગચ્છન્તુ શત્રુઘ્ન તથૈવ નટનર્તકાઃ

હિરણ્યસ્ય સુવર્ણસ્ય અયુતં પુરુષર્ષભ
ગૃહીત્વા ગચ્છ શત્રુઘ્ન પર્યાપ્તધનવાહનઃ

બલં ચ સુભૃતં વીર હૃષ્ટપુષ્ટમ્ અનુત્તમમ્
સંભાષ્ય સંપ્રદાનેન રઞ્જયસ્વ નરોત્તમ

ન હ્ય્ અર્થાસ્ તત્ર તિષ્ઠન્તિ ન દારા ન ચ બાન્ધવાઃ
સુપ્રીતો ભૃત્યવર્ગસ્ તુ યત્ર તિષ્ઠતિ રાઘવ

અતો હૃષ્ટજનાકીર્ણાં પ્રસ્થાપ્ય મહતીં ચમૂમ્
એક એવ ધનુષ્પાનિસ્ તદ્ ગચ્છ ત્વં મધોર્ વનમ્

યથા ત્વાં ન પ્રજાનાતિ ગચ્છન્તં યુદ્ધકાઙ્ક્ષિણમ્
લવણસ્ તુ મધોઃ પુત્રસ્ તથા ગચ્છેર્ અશઙ્કિતઃ

ન તસ્ય મૃત્યુર્ અન્યો ઽસ્તિ કશ્ ચિદ્ ધિ પુરુષર્ષભ
દર્શનં યો ઽભિગચ્છેત સ વધ્યો લવણેન હિ

સ ગ્રીષ્મે વ્યપયાતે તુ વર્ષરાત્ર ઉપસ્થિતે
હન્યાસ્ ત્વં લવણં સૌમ્ય સ હિ કાલો ઽસ્ય દુર્મતેઃ

મહર્ષીંસ્ તુ પુરસ્કૃત્ય પ્રયાન્તુ તવ સૈનિકાઃ
યથા ગ્રીષ્માવશેષેણ તરેયુર્ જાહ્નવીજલમ્

તતઃ સ્થાપ્ય બલં સર્વં નદીતીરે સમાહિતઃ
અગ્રતો ધનુષા સાર્ધં ગચ્છ ત્વં લઘુવિક્રમ

એવમ્ ઉક્તસ્ તુ રામેણ શત્રુઘ્નસ્ તાન્ મહાબલાન્
સેનામુખ્યાન્ સમાનીય તતો વાક્યમ્ ઉવાચ હ

એતે વો ગણિતા વાસા યત્ર યત્ર નિવત્સ્યથ
સ્થાતવ્યં ચાવિરોધેન યથા બાધા ન કસ્ય ચિત્

તથા તાંસ્ તુ સમાજ્ઞાપ્ય નિર્યાપ્ય ચ મહદ્ બલમ્
કૌસલ્યાં ચ સુમિત્રાં ચ કૈકેયીં ચાભ્યવાદયત્

રામં પ્રદક્ષિણં કૃત્વા શિરસાભિપ્રણમ્ય ચ
રાણેણ ચાભ્યનુજ્ઞાતઃ શત્રુઘ્નઃ શત્રુતાપનઃ

લક્ષ્મણં ભરતં ચૈવ પ્રણિપત્ય કૃતાઞ્જલિઃ
પુરોધસં વસિષ્ઠં ચ શત્રુઘ્નઃ પ્રયતાત્મવાન્
પ્રદક્ષિણમ્ અથો કૃત્વા નિર્જગામ મહાબલઃ