રામાયણ · અધ્યાય 7.053

બ્રુવદ્ભિર્ એવમ્ ઋષિભિઃ કાકુત્સ્થો વાક્યમ્ અબ્રવીત્
કિં કાર્યં બ્રૂત ભવતાં ભયં નાશયિતાસ્મિ વઃ

તથા વદતિ કાકુત્સ્થે ભાર્ગવો વાક્યમ્ અબ્રવીત્
ભયં નઃ શૃણુ યન્ મૂલં દેશસ્ય ચ નરેશ્વર

પૂર્વં કૃતયુગે રામ દૈતેયઃ સુમહાબલઃ
લોલાપુત્રો ઽભવજ્ જ્યેષ્ઠો મધુર્ નામ મહાસુરઃ

બ્રહ્મણ્યશ્ ચ શરણ્યશ્ ચ બુદ્ધ્યા ચ પરિનિષ્ઠિતઃ
સુરૈશ્ ચ પરમોદારૈઃ પ્રીતિસ્ તસ્યાતુલાભવત્

સ મધુર્ વીર્યસંપન્નો ધર્મે ચ સુસમાહિતઃ
બહુમાનાચ્ ચ રુદ્રેણ દત્તસ્ તસ્યાદ્ભુતો વરઃ

શૂલં શૂલાદ્ વિનિષ્કૃષ્ય મહાવીર્યં મહાપ્રભમ્
દદૌ મહાત્મા સુપ્રીતો વાક્યં ચૈતદ્ ઉવાચ હ

ત્વયાયમ્ અતુલો ધર્મો મત્પ્રસાદાત્ કૃતઃ શુભઃ
પ્રીત્યા પરમયા યુક્તો દદામ્ય્ આયુધમ્ ઉત્તમમ્

યાવત્ સુરૈશ્ ચ વિપ્રૈશ્ ચ ન વિરુધ્યેર્ મહાસુર
તાવચ્ છૂલં તવેદં સ્યાદ્ અન્યથા નાશમ્ આપ્નુયાત્

યશ્ ચ ત્વામ્ અભિયુઞ્જીત યુદ્ધાય વિગતજ્વરઃ
તં શૂલં ભસ્મસાત્ કૃત્વા પુનર્ એષ્યતિ તે કરમ્

એવં રુદ્રાદ્ વરં લબ્ધ્વા ભૂય એવ મહાસુરઃ
પ્રણિપત્ય મહાદેવં વાક્યમ્ એતદ્ ઉવાચ હ

ભગવન્ મમ વંશસ્ય શૂલમ્ એતદ્ અનુત્તમમ્
ભવેત્ તુ સતતં દેવ સુરાણામ્ ઈશ્વરો હ્ય્ અસિ

તં બ્રુવાણં મધું દેવઃ સર્વભૂતપતિઃ શિવઃ
પ્રત્યુવાચ મહાદેવો નૈતદ્ એવં ભવિષ્યતિ

મા ભૂત્ તે વિફલા વાણી મત્પ્રસાદકૃતા શુભા
ભવતઃ પુત્રમ્ એકં તુ શૂલમ્ એતદ્ ગમિષ્યતિ

યાવત્ કરસ્થઃ શૂલો ઽયં ભવિષ્યતિ સુતસ્ય તે
અવધ્યઃ સર્વભૂતાનાં શૂલહસ્તો ભવિષ્યતિ

એવં મધુર્ વરં લબ્ધ્વા દેવાત્ સુમહદ્ અદ્ભુતમ્
ભવનં ચાસુરશ્રેષ્ઠઃ કારયામ્ આસ સુપ્રભમ્

તસ્ય પત્ની મહાભાગા પ્રિયા કુમ્ભીનસી હિ યા
વિશ્વાવસોર્ અપત્યં સા હ્ય્ અનલાયાં મહાપ્રભા

તસ્યાઃ પુત્રો મહાવીર્યો લવણો નામ દારુણઃ
બાલ્યાત્ પ્રભૃતિ દુષ્ટાત્મા પાપાન્ય્ એવ સમાચરત્

તં પુત્રં દુર્વિનીતં તુ દૃષ્ટ્વા દુઃખસમન્વિતઃ
મધુઃ સ શોકમ્ આપેદે ન ચૈનં કિં ચિદ્ અબ્રવીત્

સ વિહાય ઇમં લોકં પ્રવિષ્ટો વરુણાલયમ્
શૂલં નિવેશ્ય લવણે વરં તસ્મૈ ન્યવેદયત્

સ પ્રભાવેન શૂલસ્ય દૌરાત્મ્યેનાત્મનસ્ તથા
સંતાપયતિ લોકાંસ્ ત્રીન્ વિશેષેણ તુ તાપસાન્

એવંપ્રભાવો લવણઃ શૂલં ચૈવ તથાવિધમ્
શ્રુત્વા પ્રમાણં કાકુત્સ્થ ત્વં હિ નઃ પરમા ગતિઃ

બહવઃ પાર્થિવા રામ ભયાર્તૈર્ ઋષિભિઃ પુરા
અભયં યાચિતા વીર ત્રાતારં ન ચ વિદ્મહે

તે વયં રાવણં શ્રુત્વા હતં સબલવાહનમ્
ત્રાતારં વિદ્મહે રામ નાન્યં ભુવિ નરાધિપમ્
તત્ પરિત્રાતુમ્ ઇચ્છામો લવણાદ્ ભયપીડિતાઃ