રામાયણ · અધ્યાય 7.050

તથા સંચોદિતઃ સૂતો લક્ષ્મણેન મહાત્મના
તદ્ વાક્યમ્ ઋષિણા પ્રોક્તં વ્યાહર્તુમ્ ઉપચક્રમે

પુરા નામ્ના હિ દુર્વાસા અત્રેઃ પુત્રો મહામુનિઃ
વસિષ્ઠસ્યાશ્રમે પુણ્યે સ વાર્ષિક્યમ્ ઉવાસ હ

તમ્ આશ્રમં મહાતેજાઃ પિતા તે સુમહાયશાઃ
પુરોધસં મહાત્માનં દિદૃક્ષુર્ અગમત્ સ્વયમ્

સ દૃષ્ટ્વા સૂર્યસંકાશં જ્વલન્તમ્ ઇવ તેજસા
ઉપવિષ્ટં વસિષ્ઠસ્ય સવ્યે પાર્શ્વે મહામુનિમ્
તૌ મુની તાપસશ્રેષ્ઠૌ વિનીતસ્ ત્વ્ અભ્યવાદયત્

સ તાભ્યાં પૂજિતો રાજા સ્વાગતેનાસનેન ચ
પાદ્યેન ફલમૂલૈશ્ ચ સો ઽપ્ય્ આસ્તે મુનિભિઃ સહ

તેષાં તત્રોપવિષ્ટાનાં તાસ્ તાઃ સુમધુરાઃ કથાઃ
બભૂવુઃ પરમર્ષીણાં મધ્યાદિત્યગતે ઽહનિ

તતઃ કથાયાં કસ્યાં ચિત્ પ્રાઞ્જલિઃ પ્રગ્રહો નૃપઃ
ઉવાચ તં મહાત્માનમ્ અત્રેઃ પુત્રં તપોધનમ્

ભગવન્ કિંપ્રમાણેન મમ વંશો ભવિષ્યતિ
કિમાયુશ્ ચ હિ મે રામઃ પુત્રાશ્ ચાન્યે કિમાયુષઃ

રામસ્ય ચ સુતા યે સ્યુસ્ તેષામ્ આયુઃ કિયદ્ ભવેત્
કામ્યયા ભગવન્ બ્રૂહિ વંશસ્યાસ્ય ગતિં મમ

તચ્ છ્રુત્વા વ્યાહૃતં વાક્યં રાજ્ઞો દશરથસ્ય તુ
દુર્વાસાઃ સુમહાતેજા વ્યાહર્તુમ્ ઉપચક્રમે

અયોધ્યાયાઃ પતી રામો દીર્ઘકાલં ભવિષ્યતિ
સુખિનશ્ ચ સમૃદ્ધાશ્ ચ ભવિષ્યન્ત્ય્ અસ્ય ચાનુજાઃ

કસ્મિંશ્ ચિત્ કરણે ત્વાં ચ મૈથિલીં ચ યશસ્વિનીમ્
સંત્યજિષ્યતિ ધર્માત્મા કાલેન મહતા કિલ

દશવર્ષસહસ્રણિ દશવર્ષશતાનિ ચ
રામો રાજ્યમ્ ઉપાસિત્વા બ્રહ્મલોકં ગમિષ્યતિ

સમૃદ્ધૈર્ હયમેધૈશ્ ચ ઇષ્ટ્વા પરપુરંજયઃ
રાજવંશાંશ્ ચ કાકુત્સ્થો બહૂન્ સંસ્થાપયિષ્યતિ

સ સર્વમ્ અખિલં રાજ્ઞો વંશસ્યાસ્ય ગતાગતમ્
આખ્યાય સુમહાતેજાસ્ તૂષ્ણીમ્ આસીન્ મહાદ્યુતિઃ

તૂષ્ણીંભૂતે મુનૌ તસ્મિન્ રાજા દશરથસ્ તદા
અભિવાદ્ય મહાત્માનૌ પુનર્ આયાત્ પુરોત્તમમ્

એતદ્ વચો મયા તત્ર મુનિના વ્યાહૃતં પુરા
શ્રુતં હૃદિ ચ નિક્ષિપ્તં નાન્યથા તદ્ ભવિષ્યતિ

એવં ગતે ન સંતાપં ગન્તુમ્ અર્હસિ રાઘવ
સીતાર્થે રાઘવાર્થે વા દૃઢો ભવ નરોત્તમ

તચ્ છ્રુત્વા વ્યાહૃતં વાક્યં સૂતસ્ય પરમાદ્ભુતમ્
પ્રહર્ષમ્ અતુલં લેભે સાધુ સાધ્વ્ ઇતિ ચાબ્રવીત્

તયોઃ સંવદતોર્ એવં સૂતલક્ષ્મણયોઃ પથિ
અસ્તમ્ અર્કો ગતો વાસં ગોમત્યાં તાવ્ અથોષતુઃ