રામાયણ · અધ્યાય 7.048

સીતાં તુ રુદતીં દૃષ્ટ્વા યે તત્ર મુનિદારકાઃ
પ્રાદ્રવન્ યત્ર ભગવાન્ આસ્તે વાલ્મીકિર્ અગ્ર્યધીઃ

અભિવાદ્ય મુનેઃ પાદૌ મુનિપુત્રા મહર્ષયે
સર્વે નિવેદયામ્ આસુસ્ તસ્યાસ્ તુ રુદિતસ્વનમ્

અદૃષ્ટપૂર્વા ભગવન્ કસ્યાપ્ય્ એષા મહાત્મનઃ
પત્ની શ્રીર્ ઇવ સંમોહાદ્ વિરૌતિ વિકૃતસ્વરા

ભગવન્ સાધુ પશ્યેમાં દેવતામ્ ઇવ ખાચ્ ચ્યુતામ્
ન હ્ય્ એનાં માનુષીં વિદ્મઃ સત્ક્રિયાસ્યાઃ પ્રયુજ્યતામ્

તેષાં તદ્ વચનં શ્રુત્વા બુદ્ધ્યા નિશ્ચિત્ય ધર્મવિત્
તપસા લબ્ધચક્ષુષ્માન્ પ્રાદ્રવદ્ યત્ર મૈથિલી

તં તુ દેશમ્ અભિપ્રેત્ય કિં ચિત્ પદ્ભ્યાં મહામુનિઃ
અર્ઘ્યમ્ આદાય રુચિરં જાહ્વનીતીરમ્ આશ્રિતઃ
દદર્શ રાઘવસ્યેષ્ટાં પત્નીં સીતામ્ અનાથવત્

તાં સીતાં શોકભારાર્તાં વાલ્મીકિર્ મુનિપુંગવઃ
ઉવાચ મધુરાં વાણીં હ્લાદયન્ન્ ઇવ તેજસા

સ્નુષા દશરથસ્ય ત્વં રામસ્ય મહિષી સતી
જનકસ્ય સુતા રાજ્ઞઃ સ્વાગતં તે પતિવ્રતે

આયાન્ત્ય્ એવાસિ વિજ્ઞાતા મયા ધર્મસમાધિના
કારણં ચૈવ સર્વં મે હૃદયેનોપલક્ષિતમ્

અપાપાં વેદ્મિ સીતે ત્વાં તપોલબ્ધેન ચક્ષુષા
વિશુદ્ધભાવા વૈદેહિ સામ્પ્રતં મયિ વર્તસે

આશ્રમસ્યાવિદૂરે મે તાપસ્યસ્ તપસિ સ્થિતાઃ
તાસ્ ત્વાં વત્સે યથા વત્સં પાલયિષ્યન્તિ નિત્યશઃ

ઇદમ્ અર્ઘ્યં પ્રતીચ્છ ત્વં વિસ્રબ્ધા વિગતજ્વરા
યથા સ્વગૃહમ્ અભ્યેત્ય વિષાદં ચૈવ મા કૃથાઃ

શ્રુત્વા તુ ભાષિતં સીતા મુનેઃ પરમમ્ અદ્ભુતમ્
શિરસા વન્દ્ય ચરણૌ તથેત્ય્ આહ કૃતાઞ્જલિઃ

તં પ્રયાન્તં મુનિં સીતા પ્રાઞ્જલિઃ પૃષ્ઠતો ઽન્વગાત્
અન્વયાદ્ યત્ર તાપસ્યો ધર્મનિત્યાઃ સમાહિતાઃ

તં દૃષ્ટ્વા મુનિમ્ આયાન્તં વૈદેહ્યાનુગતં તદા
ઉપાજગ્મુર્ મુદા યુક્તા વચનં ચેદમ્ અબ્રુવન્

સ્વાગતં તે મુનિશ્રેષ્ઠ ચિરસ્યાગમનં પ્રભો
અભિવાદયામઃ સર્વાસ્ ત્વામ્ ઉચ્યતાં કિં ચ કુર્મહે

તાસાં તદ્ વચનં શ્રુત્વા વાલ્મીકિર્ ઇદમ્ અબ્રવીત્
સીતેયં સમનુપ્રાપ્તા પત્ની રામસ્ય ધીમતઃ

સ્નુષા દશરથસ્યૈષા જનકસ્ય સુતા સતી
અપાપા પતિના ત્યક્તા પરિપાલ્યા મયા સદા

ઇમાં ભવત્યઃ પશ્યન્તુ સ્નેહેન પરમેણ હ
ગૌરવાન્ મમ વાક્યસ્ય પૂજ્યા વો ઽસ્તુ વિશેષતઃ

મુહુર્ મુહુશ્ ચ વૈદેહીં પરિસાન્ત્વ્ય મહાયશાઃ
સ્વમ્ આશ્રમં શિષ્યવૃતઃ પુનર્ આયાન્ મહાતપાઃ