રામાયણ · અધ્યાય 7.044

તેષાં સમુપવિષ્ટાનાં સર્વેષાં દીનચેતસામ્
ઉવાચ વાક્યં કાકુત્સ્થો મુખેન પરિશુષ્યતા

સર્વે શૃણુત ભદ્રં વો મા કુરુધ્વં મનો ઽન્યથા
પૌરાણાં મમ સીતાયાં યાદૃશી વર્તતે કથા

પૌરાપવાદઃ સુમહાંસ્ તથા જનપદસ્ય ચ
વર્તતે મયિ બીભત્સઃ સ મે મર્માણિ કૃન્તતિ

અહં કિલ કુલે જાત ઇક્ષ્વાકૂણાં મહાત્મનામ્
સીતાં પાપસમાચારામ્ આનયેયં કથં પુરે

જાનાસિ હિ યથા સૌમ્ય દણ્ડકે વિજને વને
રાવણેન હૃતા સીતા સ ચ વિધ્વંસિતો મયા

પ્રત્યક્ષં તવ સૌમિત્રે દેવાનાં હવ્યવાહનઃ
અપાપાં મૈથિલીમ્ આહ વાયુશ્ ચાકાશગોચરઃ

ચન્દ્રાદિત્યૌ ચ શંસેતે સુરાણાં સંનિધૌ પુરા
ઋષીણાં ચૈવ સર્વેષામ્ અપાપાં જનકાત્મજામ્

એવં શુદ્ધસમાચારા દેવગન્ધર્વસંનિધૌ
લઙ્કાદ્વીપે મહેન્દ્રેણ મમ હસ્તે નિવેશિતા

અન્તરાત્મા ચ મે વેત્તિ સીતાં શુદ્ધાં યશસ્વિનીમ્
તતો ગૃહીત્વા વૈદેહીમ્ અયોધ્યામ્ અહમ્ આગતઃ

અયં તુ મે મહાન્ વાદઃ શોકશ્ ચ હૃદિ વર્તતે
પૌરાપવાદઃ સુમહાંસ્ તથા જનપદસ્ય ચ

અકીર્તિર્ યસ્ય ગીયેત લોકે ભૂતસ્ય કસ્ય ચિત્
પતત્ય્ એવાધમાંલ્ લોકાન્ યાવચ્ છબ્દઃ સ કીર્ત્યતે

અકીર્તિર્ નિન્દ્યતે દૈવૈઃ કીર્તિર્ દેવેષુ પૂજ્યતે
કીર્ત્યર્થં ચ સમારમ્ભઃ સર્વ એવ મહાત્મનામ્

અપ્ય્ અહં જીવિતં જહ્યાં યુષ્માન્ વા પુરુષર્ષભાઃ
અપવાદભયાદ્ ભીતઃ કિં પુનર્ જનકાત્મજામ્

તસ્માદ્ ભવન્તઃ પશ્યન્તુ પતિતં શોકસાગરે
ન હિ પશ્યામ્ય્ અહં ભૂયઃ કિં ચિદ્ દુઃખમ્ અતો ઽધિકમ્

શ્વસ્ ત્વં પ્રભાતે સૌમિત્રે સુમન્ત્રાધિષ્ઠિતં રથમ્
આરુહ્ય સીતામ્ આરોપ્ય વિષયાન્તે સમુત્સૃજ

ગઙ્ગાયાસ્ તુ પરે પારે વાલ્મીકેઃ સુમહાત્મનઃ
આશ્રમો દિવ્યસંકાશસ્ તમસાતીરમ્ આશ્રિતઃ

તત્રૈનાં વિજને કક્ષે વિસૃજ્ય રઘુનન્દન
શીઘ્રમ્ આગચ્છ સૌમિત્રે કુરુષ્વ વચનં મમ

ન ચાસ્મિ પ્રતિવક્તવ્યઃ સીતાં પ્રતિ કથં ચન
અપ્રીતિઃ પરમા મહ્યં ભવેત્ તુ પ્રતિવારિતે

શાપિતાશ્ ચ મયા યૂયં ભુજાભ્યાં જીવિતેન ચ
યે માં વાક્યાન્તરે બ્રૂયુર્ અનુનેતું કથં ચન

માનયન્તુ ભવન્તો માં યદિ મચ્છાસને સ્થિતાઃ
ઇતો ઽદ્ય નીયતાં સીતા કુરુષ્વ વચનં મમ

પૂર્વમ્ ઉક્તો ઽહમ્ અનયા ગઙ્ગાતીરે મહાશ્રમાન્
પશ્યેયમ્ ઇતિ તસ્યાશ્ ચ કામઃ સંવર્ત્યતામ્ અયમ્

એવમ્ ઉક્ત્વા તુ કાકુત્સ્થો બાષ્પેણ પિહિતેક્ષણઃ
પ્રવિવેશ સ ધર્માત્મા ભ્રાતૃભિઃ પરિવારિતઃ