રામાયણ · અધ્યાય 7.043

વિસૃજ્ય તુ સુહૃદ્વર્ગં બુદ્ધ્યા નિશ્ચિત્ય રાઘવઃ
સમીપે દ્વાઃસ્થમ્ આસીનમ્ ઇદં વચનમ્ અબ્રવીત્

શીઘ્રમ્ આનય સૌમિત્રિં લક્ષ્મણં શુભલક્ષણમ્
ભરતં ચ મહાબાહું શત્રુઘ્નં ચાપરાજિતમ્

રામસ્ય ભાષિતં શ્રુત્વા દ્વાઃસ્થો મૂર્ધ્નિ કૃતાઞ્જલિઃ
લક્ષ્મણસ્ય ગૃહં ગત્વા પ્રવિવેશાનિવારિતઃ

ઉવાચ ચ તદા વાક્યં વર્ધયિત્વા કૃતાઞ્જલિઃ
દ્રષ્ટુમ્ ઇચ્છતિ રાજા ત્વાં ગમ્યતાં તત્ર મા ચિરમ્

બાઢમ્ ઇત્ય્ એવ સૌમિત્રિઃ શ્રુત્વા રાઘવશાસનમ્
પ્રાદ્રવદ્ રથમ્ આરુહ્ય રાઘવસ્ય નિવેશનમ્

પ્રયાન્તં લક્ષ્મણં દૃષ્ટ્વા દ્વાઃસ્થો ભરતમ્ અન્તિકાત્
ઉવાચ પ્રાઞ્જલિર્ વાક્યં રાજા ત્વાં દ્રષ્ટુમ્ ઇચ્છતિ

ભરતસ્ તુ વચઃ શ્રુત્વા દ્વાઃસ્થાદ્ રામસમીરિતમ્
ઉત્પપાતાસનાત્ તૂર્ણં પદ્ભ્યામ્ એવ તતો ઽગમત્

દૃષ્ટ્વા પ્રયાન્તં ભરતં ત્વરમાણઃ કૃતાઞ્જલિઃ
શત્રુઘ્નભવનં ગત્વા તતો વાક્યં જગાદ હ

એહ્ય્ આગચ્છ રઘુશ્રેષ્ઠ રાજા ત્વાં દ્રષ્ટુમ્ ઇચ્છતિ
ગતો હિ લક્ષ્મણઃ પૂર્વં ભરતશ્ ચ મહાયશાઃ

શ્રુત્વા તુ વચનં તસ્ય શત્રુઘ્નો રામશાસનમ્
શિરસા વન્દ્ય ધરણીં પ્રયયૌ યત્ર રાઘવઃ

કુમારાન્ આગતાઞ્ શ્રુત્વા ચિન્તાવ્યાકુલિતેન્દ્રિયઃ
અવાક્શિરા દીનમના દ્વાઃસ્થં વચનમ્ અબ્રવીત્

પ્રવેશય કુમારાંસ્ ત્વં મત્સમીપં ત્વરાન્વિતઃ
એતેષુ જીવિતં મહ્યમ્ એતે પ્રાણા બહિશ્ચરાઃ

આજ્ઞપ્તાસ્ તુ નરેન્દ્રેણ કુમારાઃ શુક્લવાસસઃ
પ્રહ્વાઃ પ્રાઞ્જલયો ભૂત્વા વિવિશુસ્ તે સમાહિતાઃ

તે તુ દૃષ્ટ્વા મુખં તસ્ય સગ્રહં શશિનં યથા
સંધ્યાગતમ્ ઇવાદિત્યં પ્રભયા પરિવર્જિતમ્

બાષ્પપૂર્ણે ચ નયને દૃષ્ટ્વા રામસ્ય ધીમતઃ
હતશોભં યથા પદ્મં મુખં વીક્ષ્ય ચ તસ્ય તે

તતો ઽભિવાદ્ય ત્વરિતાઃ પાદૌ રામસ્ય મૂર્ધભિઃ
તસ્થુઃ સમાહિતાઃ સર્વે રામશ્ ચાશ્રૂણ્ય્ અવર્તયત્

તાન્ પરિષ્વજ્ય બાહુભ્યામ્ ઉત્થાપ્ય ચ મહાભુજઃ
આસનેષ્વ્ આધ્વમ્ ઇત્ય્ ઉક્ત્વા તતો વાક્યં જગાદ હ

ભવન્તો મમ સર્વસ્વં ભવન્તો મમ જીવિતમ્
ભવદ્ભિશ્ ચ કૃતં રાજ્યં પાલયામિ નરેશ્વરાઃ

ભવન્તઃ કૃતશાસ્ત્રાર્થા બુદ્ધૌ ચ પરિનિષ્ઠિતાઃ
સંભૂય ચ મદર્થો ઽયમ્ અન્વેષ્ટવ્યો નરેશ્વરાઃ