રામાયણ · અધ્યાય 7.041

સ વિસૃજ્ય તતો રામઃ પુષ્પકં હેમભૂષિતમ્
પ્રવિવેશ મહાબાહુર્ અશોકવનિકાં તદા

ચન્દનાગરુચૂતૈશ્ ચ તુઙ્ગકાલેયકૈર્ અપિ
દેવદારુવનૈશ્ ચાપિ સમન્તાદ્ ઉપશોભિતામ્

પ્રિયઙ્ગુભિઃ કદમ્બૈશ્ ચ તથા કુરબકૈર્ અપિ
જમ્બૂભિઃ પાટલીભિશ્ ચ કોવિદારૈશ્ ચ સંવૃતામ્

સર્વદા કુસુમૈ રમ્યૈઃ ફલવદ્ભિર્ મનોરમૈઃ
ચારુપલ્લવપુષ્પાઢ્યૈર્ મત્તભ્રમરસંકુલૈઃ

કોકિલૈર્ ભૃઙ્ગરાજૈશ્ ચ નાનાવર્ણૈશ્ ચ પક્ષિભિઃ
શોભિતાં શતશશ્ ચિત્રૈશ્ ચૂતવૃક્ષાવતંસકૈઃ

શાતકુમ્ભનિભાઃ કે ચિત્ કે ચિદ્ અગ્નિશિખોપમાઃ
નીલાઞ્જનનિભાશ્ ચાન્યે ભાન્તિ તત્ર સ્મ પાદપાઃ

દીર્ઘિકા વિવિધાકારાઃ પૂર્ણાઃ પરમવારિણા
મહાર્હમણિસોપાનસ્ફટિકાન્તરકુટ્ટિમાઃ

ફુલ્લપદ્મોત્પલવનાશ્ ચક્રવાકોપશોભિતાઃ
પ્રાકારૈર્ વિવિધાકારૈઃ શોભિતાશ્ ચ શિલાતલૈઃ

તત્ર તત્ર વનોદ્દેશે વૈદૂર્યમણિસંનિભૈઃ
શાદ્વલૈઃ પરમોપેતાઃ પુષ્પિતદ્રુમસંયુતાઃ

નન્દનં હિ યથેન્દ્રસ્ય બ્રાહ્મં ચૈત્રરથં યથા
તથારૂપં હિ રામસ્ય કાનનં તન્ નિવેશિતમ્

બહ્વાસનગૃહોપેતાં લતાગૃહસમાવૃતામ્
અશોકવનિકાં સ્ફીતાં પ્રવિશ્ય રઘુનન્દનઃ

આસને તુ શુભાકારે પુષ્પસ્તબકભૂષિતે
કુથાસ્તરણસંવીતે રામઃ સંનિષસાદ હ

સીતાં સંગૃહ્ય બાહુભ્યાં મધુમૈરેયમ્ ઉત્તમમ્
પાયયામ્ આસ કાકુત્સ્થઃ શચીમ્ ઇન્દ્રો યથામૃતમ્

માંસાનિ ચ વિચિત્રાણિ ફલાનિ વિવિધાનિ ચ
રામસ્યાભ્યવહારાર્થં કિંકરાસ્ તૂર્ણમ્ આહરન્

ઉપનૃત્યન્તિ રાજાનં નૃત્યગીતવિશારદાઃ
બાલાશ્ ચ રૂપવત્યશ્ ચ સ્ત્રિયઃ પાનવશં ગતાઃ

એવં રામો મુદા યુક્તઃ સીતાં સુરુચિરાનનામ્
રમયામ્ આસ વૈદેહીમ્ અહન્ય્ અહનિ દેવવત્

તથા તુ રમમાણસ્ય તસ્યૈવં શિશિરઃ શુભઃ
અત્યક્રામન્ નરેન્દ્રસ્ય રાઘવસ્ય મહાત્મનઃ

પૂર્વાહ્ણે પૌરકૃત્યાનિ કૃત્વા ધર્મેણ ધર્મવિત્
શેષં દિવસભાગાર્ધમ્ અન્તઃપુરગતો ઽભવત્

સીતા ચ દેવકાર્યાણિ કૃત્વા પૌર્વાહ્ણિકાનિ તુ
શ્વશ્રૂણામ્ અવિશેષેણ સર્વાસાં પ્રાઞ્જલિઃ સ્થિતા

તતો રામમ્ ઉપાગચ્છદ્ વિચિત્રબહુભૂષણા
ત્રિવિષ્ટપે સહસ્રાક્ષમ્ ઉપવિષ્ટં યથા શચી

દૃષ્ટ્વા તુ રાઘવઃ પત્નીં કલ્યાણેન સમન્વિતામ્
પ્રહર્ષમ્ અતુલં લેભે સાધુ સાધ્વ્ ઇતિ ચાબ્રવીત્

અપત્યલાભો વૈદેહિ મમાયં સમુપસ્થિતઃ
કિમ્ ઇચ્છસિ હિ તદ્ બ્રૂહિ કઃ કામઃ ક્રિયતાં તવ

પ્રહસન્તી તુ વૈદેહી રામં વાક્યમ્ અથાબ્રવીત્
તપોવનાનિ પુણ્યાનિ દ્રષ્ટુમ્ ઇચ્છામિ રાઘવ

ગઙ્ગાતીરે નિવિષ્ટાનિ ઋષીણાં પુણ્યકર્મણામ્
ફલમૂલાશિનાં વીર પાદમૂલેષુ વર્તિતુમ્

એષ મે પરમઃ કામો યન્ મૂલફલભોજિષુ
અપ્ય્ એકરાત્રં કાકુત્સ્થ વસેયં પુણ્યશાલિષુ

તથેતિ ચ પ્રતિજ્ઞાતં રામેણાક્લિષ્ટકર્મણા
વિસ્રબ્ધા ભવ વૈદેહિ શ્વો ગમિષ્યસ્ય્ અસંશયમ્

એવમ્ ઉક્ત્વા તુ કાકુત્સ્થો મૈથિલીં જનકાત્મજામ્
મધ્યકક્ષાન્તરં રામો નિર્જગામ સુહૃદ્વૃતઃ