રામાયણ · અધ્યાય 7.040

વિસૃજ્ય ચ મહાબાહુર્ ઋક્ષવાનરરાક્ષસાન્
ભ્રાતૃભિઃ સહિતો રામઃ પ્રમુમોદ સુખી સુખમ્

અથાપરાહ્ણસમયે ભ્રાતૃભિઃ સહ રાઘવઃ
શુશ્રાવ મધુરાં વાણીમ્ અન્તરિક્ષાત્ પ્રભાષિતામ્

સૌમ્ય રામ નિરીક્ષસ્વ સૌમ્યેન વદનેન મામ્
કૈલાસશિખરાત્ પ્રાપ્તં વિદ્ધિ માં પુષ્કરં પ્રભો

તવ શાસનમ્ આજ્ઞાય ગતો ઽસ્મિ ધનદં પ્રતિ
ઉપસ્થાતું નરશ્રેષ્ઠ સ ચ માં પ્રત્યભાષત

નિર્જિતસ્ ત્વં નરેન્દ્રેણ રાઘવેણ મહાત્મના
નિહત્ય યુધિ દુર્ધર્ષં રાવણં રાક્ષસાધિપમ્

મમાપિ પરમા પ્રીતિર્ હતે તસ્મિન્ દુરાત્મનિ
રાવણે સગણે સૌમ્ય સપુત્રામાત્યબાન્ધવે

સ ત્વં રામેણ લઙ્કાયાં નિર્જિતઃ પરમાત્મના
વહ સૌમ્ય તમ્ એવ ત્વમ્ અહમ્ આજ્ઞાપયામિ તે

એષ મે પરમઃ કામો યત્ ત્વં રાઘવનન્દનમ્
વહેર્ લોકસ્ય સંયાનં ગચ્છસ્વ વિગતજ્વરઃ

તચ્છાસનમ્ અહં જ્ઞાત્વા ધનદસ્ય મહાત્મનઃ
ત્વત્સકાશં પુનઃ પ્રાપ્તઃ સ એવં પ્રતિગૃહ્ણ મામ્

બાઢમ્ ઇત્ય્ એવ કાકુત્સ્થઃ પુષ્પકં સમપૂજયત્
લાજાક્ષતૈશ્ ચ પુષ્પૈશ્ ચ ગન્ધૈશ્ ચ સુસુગન્ધિભિઃ

ગમ્યતાં ચ યથાકામમ્ આગચ્છેસ્ ત્વં યદા સ્મરે
એવમ્ અસ્ત્વ્ ઇતિ રામેણ વિસૃષ્ટઃ પુષ્પકઃ પુનઃ
અભિપ્રેતાં દિશં પ્રાયાત્ પુષ્પકઃ પુષ્પભૂષિતઃ

એવમ્ અન્તર્હિતે તસ્મિન્ પુષ્પકે વિવિધાત્મનિ
ભરતઃ પ્રાઞ્જલિર્ વાક્યમ્ ઉવાચ રઘુનન્દનમ્

અત્યદ્ભુતાનિ દૃશ્યન્તે ત્વયિ રાજ્યં પ્રશાસતિ
અમાનુષાણાં સત્ત્વાનાં વ્યાહૃતાનિ મુહુર્ મુહુઃ

અનામયાચ્ ચ મર્ત્યાનાં સાગ્રો માસો ગતો હ્ય્ અયમ્
જીર્ણાનામ્ અપિ સત્ત્વાનાં મૃત્યુર્ નાયાતિ રાઘવ

પુત્રાન્ નાર્યઃ પ્રસૂયન્તે વપુષ્મન્તશ્ ચ માનવાઃ
હર્ષશ્ ચાભ્યધિકો રાજઞ્ જનસ્ય પુરવાસિનઃ

કાલે ચ વાસવો વર્ષં પાતયત્ય્ અમૃતોપમમ્
વાયવશ્ ચાપિ વાયન્તે સ્પર્શવન્તઃ સુખપ્રદાઃ

ઈદૃશો નશ્ ચિરં રાજા ભવત્વ્ ઇતિ નરેશ્વર
કથયન્તિ પુરે પૌરા જના જનપદેષુ ચ

એતા વાચઃ સુમધુરા ભરતેન સમીરિતાઃ
શ્રુત્વા રામો મુદા યુક્તઃ પ્રમુમોદ સુખી સુખમ્