રામાયણ · અધ્યાય 7.038

તે પ્રયાતા મહાત્માનઃ પાર્થિવાઃ સર્વતો દિશમ્
કમ્પયન્તો મહીં વીરાઃ સ્વપુરાણિ પ્રહૃષ્ટવત્

અક્ષૌહિણી સહસ્રૈસ્ તે સમવેતાસ્ ત્વ્ અનેકશઃ
હૃષ્ટાઃ પ્રતિગતાઃ સર્વે રાઘવાર્થે સમાગતાઃ

ઊચુશ્ ચૈવ મહીપાલા બલદર્પસમન્વિતાઃ
ન નામ રાવણં યુદ્ધે પશ્યામઃ પુરતઃ સ્થિતમ્

ભરતેન વયં પશ્ચાત્ સમાનીતા નિરર્થકમ્
હતા હિ રાક્ષસાસ્ તત્ર પાર્થિવૈઃ સ્યુર્ ન સંશયઃ

રામસ્ય બાહુવીર્યેણ પાલિતા લક્ષ્મણસ્ય ચ
સુખં પારે સમુદ્રસ્ય યુધ્યેમ વિગતજ્વરાઃ

એતાશ્ ચાન્યાશ્ ચ રાજાનઃ કથાસ્ તત્ર સહસ્રશઃ
કથયન્તઃ સ્વરાષ્ટ્રાણિ વિવિશુસ્ તે મહારથાઃ

યથાપુરાણિ તે ગત્વા રત્નાનિ વિવિધાનિ ચ
રામાય પ્રિયકામાર્થમ્ ઉપહારાન્ નૃપા દદુઃ

અશ્વાન્ રત્નાનિ વસ્ત્રાણિ હસ્તિનશ્ ચ મદોત્કટાન્
ચન્દનાનિ ચ દિવ્યાનિ દિવ્યાન્ય્ આભરણાનિ ચ

ભરતો લક્ષ્મણશ્ ચૈવ શત્રુઘ્નશ્ ચ મહારથઃ
આદાય તાનિ રત્નાનિ અયોધ્યામ્ અગમન્ પુનઃ

આગતાશ્ ચ પુરીં રમ્યામ્ અયોધ્યાં પુરુષર્ષભાઃ
દદુઃ સર્વાણિ રત્નાનિ રાઘવાય મહાત્મને

પ્રતિગૃહ્ય ચ તત્ સર્વં પ્રીતિયુક્તઃ સ રાઘવઃ
સર્વાણિ તાનિ પ્રદદૌ સુગ્રીવાય મહાત્મને

વિભીષણાય ચ દદૌ યે ચાન્યે ઋક્ષવાનરાઃ
હનૂમત્પ્રમુખા વીરા રાક્ષસાશ્ ચ મહાબલાઃ

તે સર્વે હૃષ્ટમનસો રામદત્તાનિ તાન્ય્ અથ
શિરોભિર્ ધારયામ્ આસુર્ બાહુભિશ્ ચ મહાબલાઃ

પપુશ્ ચૈવ સુગન્ધીનિ મધૂનિ વિવિધાનિ ચ
માંસાનિ ચ સુમૃષ્ટાનિ ફલાન્ય્ આસ્વાદયન્તિ ચ

એવં તેષાં નિવસતાં માસઃ સાગ્રો ગતસ્ તદા
મુહૂર્તમ્ ઇવ તત્ સર્વં રામભક્ત્યા સમર્થયન્

રેમે રામઃ સ તૈઃ સાર્ધં વાનરૈઃ કામરૂપિભિઃ
રાજભિશ્ ચ મહાવીર્યૈ રાક્ષસૈશ્ ચ મહાબલૈઃ

એવં તેષાં યયૌ માસો દ્વિતીયઃ શૈશિરઃ સુખમ્
વાનરાણાં પ્રહૃષ્ટાનાં રાક્ષસાનાં ચ સર્વશઃ