રામાયણ · અધ્યાય 7.033

રાવણગ્રહણં તત્ તુ વાયુગ્રહણસંનિભમ્
ઋષિઃ પુલસ્ત્યઃ શુશ્રાવ કથિતં દિવિ દૈવતૈઃ

તતઃ પુત્રસુતસ્નેહાત્ કમ્પ્યમાનો મહાધૃતિઃ
માહિષ્મતીપતિં દ્રષ્ટુમ્ આજગામ મહાન્ ઋષિઃ

સ વાયુમાર્ગમ્ આસ્થાય વાયુતુલ્યગતિર્ દ્વિજઃ
પુરીં માહિષ્મતીં પ્રાપ્તો મનઃસંતાપવિક્રમઃ

સો ઽમરાવતિસંકાશાં હૃષ્ટપુષ્ટજનાવૃતામ્
પ્રવિવેશ પુરીં બ્રહ્મા ઇન્દ્રસ્યેવામરાવતીમ્

પાદચારમ્ ઇવાદિત્યં નિષ્પતન્તં સુદુર્દૃશમ્
તતસ્ તે પ્રત્યભિજ્ઞાય અર્જુનાય ન્યવેદયન્

પુલસ્ત્ય ઇતિ તં શ્રુત્વા વચનં હૈહયાધિપઃ
શિરસ્ય્ અઞ્જલિમ્ ઉદ્ધૃત્ય પ્રત્યુદ્ગચ્છદ્ દ્વિજોત્તમમ્

પુરોહિતો ઽસ્ય ગૃહ્યાર્ઘ્યં મધુપર્કં તથૈવ ચ
પુરસ્તાત્ પ્રયયૌ રાજ્ઞ ઇન્દ્રસ્યેવ બૃહસ્પતિઃ

તતસ્ તમ્ ઋષિમ્ આયાન્તમ્ ઉદ્યન્તમ્ ઇવ ભાસ્કરમ્
અર્જુનો દૃશ્ય સંપ્રાપ્તં વવન્દેન્દ્ર ઇવેશ્વરમ્

સ તસ્ય મધુપર્કં ચ પાદ્યમ્ અર્ઘ્યં ચ દાપયન્
પુલસ્ત્યમ્ આહ રાજેન્દ્રો હર્ષગદ્ગદયા ગિરા

અદ્યેયમ્ અમરાવત્યા તુલ્યા માહિષ્મતી કૃતા
અદ્યાહં તુ દ્વિજેન્દ્રેન્દ્ર યસ્માત્ પશ્યામિ દુર્દૃશમ્

અદ્ય મે કુશલં દેવ અદ્ય મે કુલમ્ ઉદ્ધૃતમ્
યત્ તે દેવગણૈર્ વન્દ્યૌ વન્દે ઽહં ચરણાવ્ ઇમૌ

ઇદં રાજ્યમ્ ઇમે પુત્રા ઇમે દારા ઇમે વયમ્
બ્રહ્મન્ કિં કુર્મ કિં કાર્યમ્ આજ્ઞાપયતુ નો ભવાન્

તં ધર્મે ઽગ્નિષુ ભૃત્યેષુ શિવં પૃષ્ટ્વાથ પાર્થિવમ્
પુલસ્ત્યોવાચ રાજાનં હૈહયાનાં તદાર્જુનમ્

રાજેન્દ્રામલપદ્માક્ષપૂર્ણચન્દ્રનિભાનન
અતુલં તે બલં યેન દશગ્રીવસ્ ત્વયા જિતઃ

ભયાદ્ યસ્યાવતિષ્ઠેતાં નિષ્પન્દૌ સાગરાનિલૌ
સો ઽયમ્ અદ્ય ત્વયા બદ્ધઃ પૌત્રો મે ઽતીવદુર્જયઃ

તત્ પુત્રક યશઃ સ્ફીતં નામ વિશ્રાવિતં ત્વયા
મદ્વાક્યાદ્ યાચ્યમાનો ઽદ્ય મુઞ્ચ વત્સ દશાનનમ્

પુલસ્ત્યાજ્ઞાં સ ગૃહ્યાથ અકિંચનવચો ઽર્જુનઃ
મુમોચ પાર્થિવેન્દ્રેન્દ્રો રાક્ષસેન્દ્રં પ્રહૃષ્ટવત્

સ તં પ્રમુક્ત્વા ત્રિદશારિમ્ અર્જુનઃ પ્રપૂજ્ય દિવ્યાભરણસ્રગમ્બરૈઃ
અહિંસાકં સખ્યમ્ ઉપેત્ય સાગ્નિકં પ્રણમ્ય સ બ્રહ્મસુતં ગૃહં યયૌ

પુલસ્ત્યેનાપિ સંગમ્ય રાક્ષસેન્દ્રઃ પ્રતાપવાન્
પરિષ્વઙ્ગકૃતાતિથ્યો લજ્જમાનો વિસર્જિતઃ

પિતામહસુતશ્ ચાપિ પુલસ્ત્યો મુનિસત્તમઃ
મોચયિત્વા દશગ્રીવં બ્રહ્મલોકં જગામ સઃ

એવં સ રાવણઃ પ્રાપ્તઃ કાર્તવીર્યાત્ તુ ધર્ષણાત્
પુલસ્ત્યવચનાચ્ ચાપિ પુનર્ મોક્ષમ્ અવાપ્તવાન્

એવં બલિભ્યો બલિનઃ સન્તિ રાઘવનન્દન
નાવજ્ઞા પરતઃ કાર્યા ય ઇચ્છેચ્ છ્રેય આત્મનઃ

તતઃ સ રાજા પિશિતાશનાનાં સહસ્રબાહોર્ ઉપલભ્ય મૈત્રીમ્
પુનર્ નરાણાં કદનં ચકાર ચચાર સર્વાં પૃથિવીં ચ દર્પાત્