રામાયણ · અધ્યાય 7.030

જિતે મહેન્દ્રે ઽતિબલે રાવણસ્ય સુતેન વૈ
પ્રજાપતિં પુરસ્કૃત્ય ગતા લઙ્કાં સુરાસ્ તદા

તં રાવણં સમાસાદ્ય પુત્રભ્રાતૃભિર્ આવૃતમ્
અબ્રવીદ્ ગગને તિષ્ઠન્ સાન્ત્વપૂર્વં પ્રજાપતિઃ

વત્સ રાવણ તુષ્ટો ઽસ્મિ તવ પુત્રસ્ય સંયુગે
અહો ઽસ્ય વિક્રમૌદાર્યં તવ તુલ્યો ઽધિકો ઽપિ વા

જિતં હિ ભવતા સર્વં ત્રૈલોક્યં સ્વેન તેજસા
કૃતા પ્રતિજ્ઞા સફલા પ્રીતો ઽસ્મિ સ્વસુતેન વૈ

અયં ચ પુત્રો ઽતિબલસ્ તવ રાવણરાવણિઃ
ઇન્દ્રજિત્ ત્વ્ ઇતિ વિખ્યાતો જગત્ય્ એષ ભવિષ્યતિ

બલવાઞ્ શત્રુનિર્જેતા ભવિષ્યત્ય્ એષ રાક્ષસઃ
યમ્ આશ્રિત્ય ત્વયા રાજન્ સ્થાપિતાસ્ ત્રિદશા વશે

તન્ મુચ્યતાં મહાબાહો મહેન્દ્રઃ પાકશાસનઃ
કિં ચાસ્ય મોક્ષણાર્થાય પ્રયચ્છન્તિ દિવૌકસઃ

અથાબ્રવીન્ મહાતેજા ઇન્દ્રજિત્ સમિતિંજયઃ
અમરત્વમ્ અહં દેવ વૃણોમીહાસ્ય મોક્ષણે

અબ્રવીત્ તુ તદા દેવો રાવણિં કમલોદ્ભવઃ
નાસ્તિ સર્વામરત્વં હિ કેષાં ચિત્ પ્રાણિનાં ભુવિ

અથાબ્રવીત્ સ તત્રસ્થમ્ ઇન્દ્રજિત્ પદ્મસંભવમ્
શ્રૂયતાં યા ભવેત્ સિદ્ધિઃ શતક્રતુવિમોક્ષણે

મમેષ્ટં નિત્યશો દેવ હવ્યૈઃ સંપૂજ્ય પાવકમ્
સંગ્રામમ્ અવતર્તું વૈ શત્રુનિર્જયકાઙ્ક્ષિણઃ

તસ્મિંશ્ ચેદ્ અસમાપ્તે તુ જપ્યહોમે વિભાવસોઃ
યુધ્યેયં દેવ સંગ્રામે તદા મે સ્યાદ્ વિનાશનમ્

સર્વો હિ તપસા ચૈવ વૃણોત્ય્ અમરતાં પુમાન્
વિક્રમેણ મયા ત્વ્ એતદ્ અમરત્વં પ્રવર્તિતમ્

એવમ્ અસ્ત્વ્ ઇતિ તં પ્રાહ વાક્યં દેવઃ પ્રજાપતિઃ
મુક્તશ્ ચેન્દ્રજિતા શક્રો ગતાશ્ ચ ત્રિદિવં સુરાઃ

એતસ્મિન્ન્ અન્તરે શક્રો દીનો ભ્રષ્ટામ્બરસ્રજઃ
રામ ચિન્તાપરીતાત્મા ધ્યાનતત્પરતાં ગતઃ

તં તુ દૃષ્ટ્વા તથાભૂતં પ્રાહ દેવઃ પ્રજાપતિઃ
શક્રક્રતો કિમ્ ઉત્કણ્ઠાં કરોષિ સ્મર દુષ્કૃતમ્

અમરેન્દ્ર મયા બહ્વ્યઃ પ્રજાઃ સૃષ્ટાઃ પુરા પ્રભો
એકવર્ણાઃ સમાભાષા એકરૂપાશ્ ચ સર્વશઃ

તાસાં નાસ્તિ વિશેષો હિ દર્શને લક્ષણે ઽપિ વા
તતો ઽહમ્ એકાગ્રમનાસ્ તાઃ પ્રજાઃ પર્યચિન્તયમ્

સો ઽહં તાસાં વિશેષાર્થં સ્ત્રિયમ્ એકાં વિનિર્મમે
યદ્ યત્ પ્રજાનાં પ્રત્યઙ્ગં વિશિષ્ટં તત્ તદ્ ઉદ્ધૃતમ્

તતો મયા રૂપગુણૈર્ અહલ્યા સ્ત્રી વિનિર્મિતા
અહલ્યેત્ય્ એવ ચ મયા તસ્યા નામ પ્રવર્તિતમ્

નિર્મિતાયાં તુ દેવેન્દ્ર તસ્યાં નાર્યાં સુરર્ષભ
ભવિષ્યતીતિ કસ્યૈષા મમ ચિન્તા તતો ઽભવત્

ત્વં તુ શક્ર તદા નારીં જાનીષે મનસા પ્રભો
સ્થાનાધિકતયા પત્ની મમૈષેતિ પુરંદર

સા મયા ન્યાસભૂતા તુ ગૌતમસ્ય મહાત્મનઃ
ન્યસ્તા બહૂનિ વર્ષાણિ તેન નિર્યાતિતા ચ સા

તતસ્ તસ્ય પરિજ્ઞાય મયા સ્થૈર્યં મહામુનેઃ
જ્ઞાત્વા તપસિ સિદ્ધિં ચ પત્ન્યર્થં સ્પર્શિતા તદા

સ તયા સહ ધર્માત્મા રમતે સ્મ મહામુનિઃ
આસન્ નિરાશા દેવાસ્ તુ ગૌતમે દત્તયા તયા

ત્વં ક્રુદ્ધસ્ ત્વ્ ઇહ કામાત્મા ગત્વા તસ્યાશ્રમં મુનેઃ
દૃષ્ટવાંશ્ ચ તદા તાં સ્ત્રીં દીપ્તામ્ અગ્નિશિખામ્ ઇવ

સા ત્વયા ધર્ષિતા શક્ર કામાર્તેન સમન્યુના
દૃષ્ટસ્ ત્વં ચ તદા તેન આશ્રમે પરમર્ષિણા

તતઃ ક્રુદ્ધેન તેનાસિ શપ્તઃ પરમતેજસા
ગતો ઽસિ યેન દેવેન્દ્ર દશાભાગવિપર્યયમ્

યસ્માન્ મે ધર્ષિતા પત્ની ત્વયા વાસવ નિર્ભયમ્
તસ્માત્ ત્વં સમરે રાજઞ્ શત્રુહસ્તં ગમિષ્યસિ

અયં તુ ભાવો દુર્બુદ્ધે યસ્ ત્વયેહ પ્રવર્તિતઃ
માનુષેષ્વ્ અપિ સર્વેષુ ભવિષ્યતિ ન સંશયઃ

તત્રાધર્મઃ સુબલવાન્ સમુત્થાસ્યતિ યો મહાન્
તત્રાર્ધં તસ્ય યઃ કર્તા ત્વય્ય્ અર્ધં નિપતિષ્યતિ

ન ચ તે સ્થાવરં સ્થાનં ભવિષ્યતિ પુરંદર
એતેનાધર્મયોગેન યસ્ ત્વયેહ પ્રવર્તિતઃ

યશ્ ચ યશ્ ચ સુરેન્દ્રઃ સ્યાદ્ ધ્રુવઃ સ ન ભવિષ્યતિ
એષ શાપો મયા મુક્ત ઇત્ય્ અસૌ ત્વાં તદાબ્રવીત્

તાં તુ ભાર્યાં વિનિર્ભર્ત્સ્ય સો ઽબ્રવીત્ સુમહાતપાઃ
દુર્વિનીતે વિનિધ્વંસ મમાશ્રમસમીપતઃ

રૂપયૌવનસંપન્ના યસ્માત્ ત્વમ્ અનવસ્થિતા
તસ્માદ્ રૂપવતી લોકે ન ત્વમ્ એકા ભવિષ્યસિ

રૂપં ચ તત્ પ્રજાઃ સર્વા ગમિષ્યન્તિ સુદુર્લભમ્
યત્ તવેદં સમાશ્રિત્ય વિભ્રમે ઽયમ્ ઉપસ્થિતઃ

તદા પ્રભૃતિ ભૂયિષ્ઠં પ્રજા રૂપસમન્વિતાઃ
શાપોત્સર્ગાદ્ ધિ તસ્યેદં મુનેઃ સર્વમ્ ઉપાગતમ્

તત્ સ્મર ત્વં મહાબાહો દુષ્કૃતં યત્ ત્વયા કૃતમ્
યેન ત્વં ગ્રહણં શત્રોર્ ગતો નાન્યેન વાસવ

શીઘ્રં યજસ્વ યજ્ઞં ત્વં વૈષ્ણવં સુસમાહિતઃ
પાવિતસ્ તેન યજ્ઞેન યાસ્યસિ ત્રિદિવં તતઃ

પુત્રશ્ ચ તવ દેવેન્દ્ર ન વિનષ્ટો મહારણે
નીતઃ સંનિહિતશ્ ચૈવ અર્યકેણ મહોદધૌ

એતચ્ છ્રુત્વા મહેન્દ્રસ્ તુ યજ્ઞમ્ ઇષ્ટ્વા ચ વૈષ્ણવમ્
પુનસ્ ત્રિદિવમ્ આક્રામદ્ અન્વશાસચ્ ચ દેવતાઃ

એતદ્ ઇન્દ્રજિતો રામ બલં યત્ કીર્તિતં મયા
નિર્જિતસ્ તેન દેવેન્દ્રઃ પ્રાણિનો ઽન્યે ચ કિં પુનઃ