રામાયણ · અધ્યાય 7.020

તતો વિત્રાસયન્ મર્ત્યાન્ પૃથિવ્યાં રાક્ષસાધિપઃ
આસસાદ ઘને તસ્મિન્ નારદં મુનિસત્તમમ્

નારદસ્ તુ મહાતેજા દેવર્ષિર્ અમિતપ્રભઃ
અબ્રવીન્ મેઘપૃષ્ઠસ્થો રાવણં પુષ્પકે સ્થિતમ્

રાક્ષસાધિપતે સૌમ્ય તિષ્ઠ વિશ્રવસઃ સુત
પ્રીતો ઽસ્મ્ય્ અભિજનોપેત વિક્રમૈર્ ઊર્જિતૈસ્ તવ

વિષ્ણુના દૈત્યઘાતૈશ્ ચ તાર્ક્ષ્યસ્યોરગધર્ષણૈઃ
ત્વયા સમરમર્દૈશ્ ચ ભૃશં હિ પરિતોષિતઃ

કિં ચિદ્ વક્ષ્યામિ તાવત્ તે શ્રોતવ્યં શ્રોષ્યસે યદિ
શ્રુત્વા ચાનન્તરં કાર્યં ત્વયા રાક્ષસપુંગવ

કિમ્ અયં વધ્યતે લોકસ્ ત્વયાવધ્યેન દૈવતૈઃ
હત એવ હ્ય્ અયં લોકો યદા મૃત્યુવશં ગતઃ

પશ્ય તાવન્ મહાબાહો રાક્ષસેશ્વરમાનુષમ્
લોકમ્ એનં વિચિત્રાર્થં યસ્ય ન જ્ઞાયતે ગતિઃ

ક્વ ચિદ્ વાદિત્રનૃત્તાનિ સેવ્યન્તે મુદિતૈર્ જનૈઃ
રુદ્યતે ચાપરૈર્ આર્તૈર્ ધારાશ્રુનયનાનનૈઃ

માતા પિતૃસુતસ્નેહૈર્ ભાર્યા બન્ધુમનોરમૈઃ
મોહેનાયં જનો ધ્વસ્તઃ ક્લેશં સ્વં નાવબુધ્યતે

તત્ કિમ્ એવં પરિક્લિશ્ય લોકં મોહનિરાકૃતમ્
જિત એવ ત્વયા સૌમ્ય મર્ત્યલોકો ન સંશયઃ

એવમ્ ઉક્તસ્ તુ લઙ્કેશો દીપ્યમાન ઇવૌજસા
અબ્રવીન્ નારદં તત્ર સંપ્રહસ્યાભિવાદ્ય ચ

મહર્ષે દેવગન્ધર્વવિહાર સમરપ્રિય
અહં ખલૂદ્યતો ગન્તું વિજયાર્થી રસાતલમ્

તતો લોકત્રયં જિત્વા સ્થાપ્ય નાગાન્ સુરાન્ વશે
સમુદ્રમ્ અમૃતાર્થં વૈ મથિષ્યામિ રસાલયમ્

અથાબ્રવીદ્ દશગ્રીવં નારદો ભગવાન્ ઋષિઃ
ક્વ ખલ્વ્ ઇદાનીં માર્ગેણ ત્વયાનેન ગમિષ્યતે

અયં ખલુ સુદુર્ગમ્યઃ પિતૃરાજ્ઞઃ પુરં પ્રતિ
માર્ગો ગચ્છતિ દુર્ધર્ષો યમસ્યામિત્રકર્શન

સ તુ શારદમેઘાભં મુક્ત્વા હાસં દશાનનઃ
ઉવાચ કૃતમ્ ઇત્ય્ એવ વચનં ચેદમ્ અબ્રવીત્

તસ્માદ્ એષ મહાબ્રહ્મન્ વૈવસ્વતવધોદ્યતઃ
ગચ્છામિ દક્ષિણામ્ આશાં યત્ર સૂર્યાત્મજો નૃપઃ

મયા હિ ભગવન્ ક્રોધાત્ પ્રતિજ્ઞાતં રણાર્થિના
અવજેષ્યામિ ચતુરો લોકપાલાન્ ઇતિ પ્રભો

તેનૈષ પ્રસ્થિતો ઽહં વૈ પિતૃરાજપુરં પ્રતિ
પ્રાણિસંક્લેશકર્તારં યોજયિષ્યામિ મૃત્યુના

એવમ્ ઉક્ત્વા દશગ્રીવો મુનિં તમ્ અભિવાદ્ય ચ
પ્રયયૌ દક્ષિણામ્ આશાં પ્રહૃષ્ટૈઃ સહ મન્ત્રિભિઃ

નારદસ્ તુ મહાતેજા મુહૂર્તં ધ્યાનમ્ આસ્થિતઃ
ચિન્તયામ્ આસ વિપ્રેન્દ્રો વિધૂમ ઇવ પાવકઃ

યેન લોકાસ્ ત્રયઃ સેન્દ્રાઃ ક્લિશ્યન્તે સચરાચરાઃ
ક્ષીણે ચાયુષિ ધર્મે ચ સ કાલો હિંસ્યતે કથમ્

યસ્ય નિત્યં ત્રયો લોકા વિદ્રવન્તિ ભયાર્દિતાઃ
તં કથં રાક્ષસેન્દ્રો ઽસૌ સ્વયમ્ એવાભિગચ્છતિ

યો વિધાતા ચ ધાતા ચ સુકૃતે દુષ્કૃતે યથા
ત્રૈલોક્યં વિજિતં યેન તં કથં નુ વિજેષ્યતિ

અપરં કિં નુ કૃત્વૈવં વિધાનં સંવિધાસ્યતિ
કૌતૂહલસમુત્પન્નો યાસ્યામિ યમસાદનમ્