રામાયણ · અધ્યાય 7.018

પ્રવિષ્ટાયાં હુતાશં તુ વેદવત્યાં સ રાવણઃ
પુષ્પકં તત્ સમારુહ્ય પરિચક્રામ મેદિનીમ્

તતો મરુત્તં નૃપતિં યજન્તં સહ દૈવતૈઃ
ઉશીરબીજમ્ આસાદ્ય દદર્શ સ તુ રાક્ષસઃ

સંવર્તો નામ બ્રહ્મર્ષિર્ ભ્રાતા સાક્ષાદ્ બૃહસ્પતેઃ
યાજયામ્ આસ ધર્મજ્ઞઃ સર્વૈર્ બ્રહ્મગણૈર્ વૃતઃ

દૃષ્ટ્વા દેવાસ્ તુ તદ્ રક્ષો વરદાનેન દુર્જયમ્
તાં તાં યોનિં સમાપન્નાસ્ તસ્ય ધર્ષણભીરવઃ

ઇન્દ્રો મયૂરઃ સંવૃત્તો ધર્મરાજસ્ તુ વાયસઃ
કૃકલાસો ધનાધ્યક્ષો હંસો વૈ વરુણો ઽભવત્

તં ચ રાજાનમ્ આસાદ્ય રાવણો રાક્ષસાધિપઃ
પ્રાહ યુદ્ધં પ્રયચ્ચેતિ નિર્જિતો ઽસ્મીતિ વા વદ

તતો મરુત્તો નૃપતિઃ કો ભવાન્ ઇત્ય્ ઉવાચ તમ્
અવહાસં તતો મુક્ત્વા રાક્ષસો વાક્યમ્ અબ્રવીત્

અકુતૂહલભાવેન પ્રીતો ઽસ્મિ તવ પાર્થિવ
ધનદસ્યાનુજં યો માં નાવગચ્છસિ રાવણમ્

ત્રિષુ લોકેષુ કઃ સો ઽસ્તિ યો ન જાનાતિ મે બલમ્
ભ્રાતરં યેન નિર્જિત્ય વિમાનમ્ ઇદમ્ આહૃતમ્

તતો મરુત્તો નૃપતિસ્ તં રાક્ષસમ્ અથાબ્રવીત્
ધન્યઃ ખલુ ભવાન્ યેન જ્યેષ્ઠો ભ્રાતા રણે જિતઃ

નાધર્મસહિતં શ્લાઘ્યં ન લોકપ્રતિસંહિતમ્
કર્મ દૌરાત્મ્યકં કૃત્વા શ્લાઘસે ભ્રાતૃનિર્જયાત્

કિં ત્વં પ્રાક્ કેવલં ધર્મં ચરિત્વા લબ્ધવાન્ વરમ્
શ્રુતપૂર્વં હિ ન મયા યાદૃશં ભાષસે સ્વયમ્

તતઃ શરાસનં ગૃહ્ય સાયકાંશ્ ચ સ પાર્થિવઃ
રણાય નિર્યયૌ ક્રુદ્ધઃ સંવર્તો માર્ગમ્ આવૃણોત્

સો ઽબ્રવીત્ સ્નેહસંયુક્તં મરુત્તં તં મહાન્ ઋષિઃ
શ્રોતવ્યં યદિ મદ્વાક્યં સંપ્રહારો ન તે ક્ષમઃ

માહેશ્વરમ્ ઇદં સત્રમ્ અસમાપ્તં કુલં દહેત્
દીક્ષિતસ્ય કુતો યુદ્ધં ક્રૂરત્વં દીક્ષિતે કુતઃ

સંશયશ્ ચ રણે નિત્યં રાક્ષસશ્ ચૈષ દુર્જયઃ
સ નિવૃત્તો ગુરોર્ વાક્યાન્ મરુત્તઃ પૃથિવીપતિઃ
વિસૃજ્ય સશરં ચાપં સ્વસ્થો મખમુખો ઽભવત્

તતસ્ તં નિર્જિતં મત્વા ઘોષયામ્ આસ વૈ શુકઃ
રાવણો જિતવાંશ્ ચેતિ હર્ષાન્ નાદં ચ મુક્તવાન્

તાન્ ભક્ષયિત્વા તત્રસ્થાન્ મહર્ષીન્ યજ્ઞમ્ આગતાન્
વિતૃપ્તો રુધિરૈસ્ તેષાં પુનઃ સંપ્રયયૌ મહીમ્

રાવણે તુ ગતે દેવાઃ સેન્દ્રાશ્ ચૈવ દિવૌકસઃ
તતઃ સ્વાં યોનિમ્ આસાદ્ય તાનિ સત્ત્વાન્ય્ અથાબ્રુવન્

હર્ષાત્ તદાબ્રવીદ્ ઇન્દ્રો મયૂરં નીલબર્હિણમ્
પ્રીતો ઽસ્મિ તવ ધર્મજ્ઞ ઉપકારાદ્ વિહંગમ

મમ નેત્રસહસ્રં યત્ તત્ તે બર્હે ભવિષ્યતિ
વર્ષમાણે મયિ મુદં પ્રાપ્સ્યસે પ્રીતિલક્ષણમ્

નીલાઃ કિલ પુરા બર્હા મયૂરાણાં નરાધિપ
સુરાધિપાદ્ વરં પ્રાપ્ય ગતાઃ સર્વે વિચિત્રતામ્

ધર્મરાજો ઽબ્રવીદ્ રામ પ્રાગ્વંશે વાયસં સ્થિતમ્
પક્ષિંસ્ તવાસ્મિ સુપ્રીતઃ પ્રીતસ્ય ચ વચઃ શૃણુ

યથાન્યે વિવિધૈ રોગૈઃ પીડ્યન્તે પ્રાણિનો મયા
તે ન તે પ્રભવિષ્યન્તિ મયિ પ્રીતે ન સંશયઃ

મૃત્યુતસ્ તે ભયં નાસ્તિ વરાન્ મમ વિહંગમ
યાવત્ ત્વાં ન વધિષ્યન્તિ નરાસ્ તાવદ્ ભવિષ્યસિ

યે ચ મદ્વિષયસ્થાસ્ તુ માનવાઃ ક્ષુધયાર્દિતાઃ
ત્વયિ ભુક્તે તુ તૃપ્તાસ્ તે ભવિષ્યન્તિ સબાન્ધવાઃ

વરુણસ્ ત્વ્ અબ્રવીદ્ ધંસં ગઙ્ગાતોયવિચારિણમ્
શ્રૂયતાં પ્રીતિસંયુક્તં વચઃ પત્રરથેશ્વર

વર્ણો મનોહરઃ સૌમ્યશ્ ચન્દ્રમણ્ડલસંનિભઃ
ભવિષ્યતિ તવોદગ્રઃ શુક્લફેનસમપ્રભઃ

મચ્છરીરં સમાસાદ્ય કાન્તો નિત્યં ભવિષ્યસિ
પ્રાપ્સ્યસે ચાતુલાં પ્રીતિમ્ એતન્ મે પ્રીતિલક્ષણમ્

હંસાનાં હિ પુરા રામ ન વર્ણઃ સર્વપાણ્ડુરઃ
પક્ષા નીલાગ્રસંવીતાઃ ક્રોડાઃ શષ્પાગ્રનિર્મલાઃ

અથાબ્રવીદ્ વૈશ્રવણઃ કૃકલાસં ગિરૌ સ્થિતમ્
હૈરણ્યં સંપ્રયચ્છામિ વર્ણં પ્રીતિસ્ તવાપ્ય્ અહમ્

સદ્રવ્યં ચ શિરો નિત્યં ભવિષ્યતિ તવાક્ષયમ્
એષ કાઞ્ચનકો વર્ણો મત્પ્રીત્યા તે ભવિષ્યતિ

એવં દત્ત્વા વરાંસ્ તેભ્યસ્ તસ્મિન્ યજ્ઞોત્સવે સુરાઃ
નિવૃત્તે સહ રાજ્ઞા વૈ પુનઃ સ્વભવનં ગતાઃ