રામાયણ · અધ્યાય 7.008

હન્યમાને બલે તસ્મિન્ પદ્મનાભેન પૃષ્ઠતઃ
માલ્યવાન્ સંનિવૃત્તો ઽથ વેલાતિગ ઇવાર્ણવઃ

સંરક્તનયનઃ કોપાચ્ ચલન્ મૌલિર્ નિશાચરઃ
પદ્મનાભમ્ ઇદં પ્રાહ વચનં પરુષં તદા

નારાયણ ન જાનીષે ક્ષત્રધર્મં સનાતનમ્
અયુદ્ધમનસો ભગ્નાન્ યો ઽસ્માન્ હંસિ યથેતરઃ

પરાઙ્મુખવધં પાપં યઃ કરોતિ સુરેશ્વર
સ હન્તા ન ગતઃ સ્વર્ગં લભતે પુણ્યકર્મણામ્

યુદ્ધશ્રદ્ધાથ વા તે ઽસ્તિ શઙ્ખચક્રગદાધર
અહં સ્થિતો ઽસ્મિ પશ્યામિ બલં દર્શય યત્ તવ

ઉવાચ રાક્ષસેન્દ્રં તં દેવરાજાનુજો બલી
યુષ્મત્તો ભયભીતાનાં દેવાનાં વૈ મયાભયમ્
રાક્ષસોત્સાદનં દત્તં તદ્ એતદ્ અનુપાલ્યતે

પ્રાણૈર્ અપિ પ્રિયં કાર્યં દેવાનાં હિ સદા મયા
સો ઽહં વો નિહનિષ્યામિ રસાતલગતાન્ અપિ

દેવમ્ એવં બ્રુવાણં તુ રક્તામ્બુરુહલોચનમ્
શક્ત્યા બિભેદ સંક્રુદ્ધો રાક્ષસેન્દ્રો રરાસ ચ

માલ્યવદ્ ભુજનિર્મુક્તા શક્તિર્ ઘણ્ટાકૃતસ્વના
હરેર્ ઉરસિ બભ્રાજ મેઘસ્થેવ શતહ્રદા

તતસ્ તામ્ એવ ચોત્કૃષ્ય શક્તિં શક્તિધરપ્રિયઃ
માલ્યવન્તં સમુદ્દિશ્ય ચિક્ષેપામ્બુરુહેક્ષણઃ

સ્કન્દોત્સૃષ્ટેવ સા શક્તિર્ ગોવિન્દકરનિઃસૃતા
કાઙ્ક્ષન્તી રાક્ષસં પ્રાયાન્ મહોલ્કેવાઞ્જનાચલમ્

સા તસ્યોરસિ વિસ્તીર્ણે હારભાસાવભાસિતે
અપતદ્ રાક્ષસેન્દ્રસ્ય ગિરિકૂટ ઇવાશનિઃ

તયા ભિન્નતનુત્રાણાઃ પ્રાવિશદ્ વિપુલં તમઃ
માલ્યવાન્ પુનર્ આશ્વસ્તસ્ તસ્થૌ ગિરિર્ ઇવાચલઃ

તતઃ કાર્ષ્ણાયસં શૂલં કણ્ટકૈર્ બહુભિશ્ ચિતમ્
પ્રગૃહ્યાભ્યહનદ્ દેવં સ્તનયોર્ અન્તરે દૃઢમ્

તથૈવ રણરક્તસ્ તુ મુષ્ટિના વાસવાનુજમ્
તાડયિત્વા ધનુર્માત્રમ્ અપક્રાન્તો નિશાચરઃ

તતો ઽમ્બરે મહાઞ્ શબ્દઃ સાધુ સાધ્વ્ ઇતિ ચોત્થિતઃ
આહત્ય રાક્ષસો વિષ્ણું ગરુડં ચાપ્ય્ અતાડયત્

વૈનતેયસ્ તતઃ ક્રુદ્ધઃ પક્ષવાતેન રાક્ષસં
વ્યપોહદ્ બલવાન્ વાયુઃ શુષ્કપર્ણચયં યથા

દ્વિજેન્દ્રપક્ષવાતેન દ્રાવિતં દૃશ્ય પૂર્વજમ્
સુમાલી સ્વબલૈઃ સાર્ધં લઙ્કામ્ અભિમુખો યયૌ

પક્ષવાતબલોદ્ધૂતો માલ્યવાન્ અપિ રાક્ષસઃ
સ્વબલેન સમાગમ્ય યયૌ લઙ્કાં હ્રિયા વૃતઃ

એવં તે રાક્ષસા રામ હરિણા કમલેક્ષણ
બહુશઃ સંયુગે ભગ્ના હતપ્રવરનાયકાઃ

અશક્નુવન્તસ્ તે વિષ્ણું પ્રતિયોદ્ધું ભયાર્દિતાઃ
ત્યક્ત્વા લઙ્કાં ગતા વસ્તું પાતાલં સહપત્નયઃ

સુમાલિનં સમાસાદ્ય રાક્ષસં રઘુનન્દન
સ્થિતાઃ પ્રખ્યાતવીર્યાસ્ તે વંશે સાલકટઙ્કટે

યે ત્વયા નિહતાસ્ તે વૈ પૌલસ્ત્યા નામ રાક્ષસાઃ
સુમાલી માલ્યવાન્ માલી યે ચ તેષાં પુરઃસરાઃ
સર્વ એતે મહાભાગ રાવણાદ્ બલવત્તરાઃ

ન ચાન્યો રક્ષસાં હન્તા સુરેષ્વ્ અપિ પુરંજય
ઋતે નારાયણં દેવં શઙ્ખચક્રગદાધરમ્

ભવાન્ નારાયણો દેવશ્ ચતુર્બાહુઃ સનાતનઃ
રાક્ષસાન્ હન્તુમ્ ઉત્પન્નો અજેયઃ પ્રભુર્ અવ્યયઃ