રામાયણ · અધ્યાય 7.007

નારાયણગિરિં તે તુ ગર્જન્તો રાક્ષસામ્બુદાઃ
અવર્ષન્ન્ ઇષુવર્ષેણ વર્ષેણાદ્રિમ્ ઇવામ્બુદાઃ

શ્યામાવદાતસ્ તૈર્ વિષ્ણુર્ નીલૈર્ નક્તંચરોત્તમૈઃ
વૃતો ઽઞ્જનગિરીવાસીદ્ વર્ષમાણૈઃ પયોધરૈઃ

શલભા ઇવ કેદારં મશકા ઇવ પર્વતમ્
યથામૃતઘટં જીવા મકરા ઇવ ચાર્ણવમ્

તથા રક્ષોધનુર્ મુક્તા વજ્રાનિલમનોજવાઃ
હરિં વિશન્તિ સ્મ શરા લોકાસ્તમ્ ઇવ પર્યયે

સ્યન્દનૈઃ સ્યન્દનગતા ગજૈશ્ ચ ગજધૂર્ ગતાઃ
અશ્વારોહાઃ સદશ્વૈશ્ ચ પાદાતાશ્ ચામ્બરે ચરાઃ

રાક્ષસેન્દ્રા ગિરિનિભાઃ શરશક્ત્યૃષ્ટિતોમરૈઃ
નિરુચ્છ્વાસં હરિં ચક્રુઃ પ્રાણાયામ ઇવ દ્વિજમ્

નિશાચરૈસ્ તુદ્યમાનો મીનૈર્ ઇવ મહાતિમિઃ
શાર્ઙ્ગમ્ આયમ્ય ગાત્રાણિ રાક્ષસાનાં મહાહવે

શરૈઃ પૂર્ણાયતોત્સૃષ્ટૈર્ વજ્રવક્ત્રૈર્ મનોજવૈઃ
ચિચ્છેદ તિલશો વિષ્ણુઃ શતશો ઽથ સહસ્રશઃ

વિદ્રાવ્ય શરવર્ષં તં વર્ષં વાયુર્ ઇવોત્થિતમ્
પાઞ્ચજન્યં મહાશઙ્ખં પ્રદધ્મૌ પુરુષોત્તમઃ

સો ઽમ્બુજો હરિણા ધ્માતઃ સર્વપ્રાણેન શઙ્ખરાટ્
રરાસ ભીમનિહ્રાદો યુગાન્તે જલદો યથા

શઙ્ખરાજરવઃ સો ઽથ ત્રાસયામ્ આસ રાક્ષસાન્
મૃગરાજ ઇવારણ્યે સમદાન્ ઇવ કુઞ્જરાન્

ન શેકુર્ અશ્વાઃ સંસ્થાતું વિમદાઃ કુઞ્જરાભવન્
સ્યન્દનેભ્યશ્ ચ્યુતા યોધાઃ શઙ્ખરાવિતદુર્બલાઃ

શાર્ઙ્ગચાપવિનિર્મુક્તા વજ્રતુલ્યાનનાઃ શરાઃ
વિદાર્ય તાનિ રક્ષાંસિ સુપુઙ્ખા વિવિશુઃ ક્ષિતિમ્

ભિદ્યમાનાઃ શરૈશ્ ચાન્યે નારાયણધનુશ્ચ્યુતૈઃ
નિપેતૂ રાક્ષસા ભીમાઃ શૈલા વજ્રહતા ઇવ

વ્રણૈર્ વ્રણકરારીણામ્ અધોક્ષજશરોદ્ભવૈઃ
અસૃક્ ક્ષરન્તિ ધારાભિઃ સ્વર્ણધારામ્ ઇવાચલાઃ

શઙ્ખરાજરવશ્ ચાપિ શાર્ઙ્ગચાપરવસ્ તથા
રાક્ષસાનાં રવાંશ્ ચાપિ ગ્રસતે વૈષ્ણવો રવઃ

સૂર્યાદ્ ઇવ કરા ઘોરા ઊર્મયઃ સાગરાદ્ ઇવ
પર્વતાદ્ ઇવ નાગેન્દ્રા વાર્યોઘા ઇવ ચામ્બુદાત્

તથા બાણા વિનિર્મુક્તાઃ શાર્ઙ્ગાન્ નરાયણેરિતાઃ
નિર્ધાવન્તીષવસ્ તૂર્ણં શતશો ઽથ સહસ્રશઃ

શરભેણ યથા સિંહાઃ સિંહેન દ્વિરદા યથા
દ્વિરદેન યથા વ્યાઘ્રા વ્યાઘ્રેણ દ્વીપિનો યથા

દ્વીપિના ચ યથા શ્વાનઃ શુના માર્જારકા યથા
માર્જારેણ યથા સર્પાઃ સર્પેણ ચ યથાખવઃ

તથા તે રાક્ષસા યુદ્ધે વિષ્ણુના પ્રભવિષ્ણુના
દ્રવન્તિ દ્રાવિતાશ્ ચૈવ શાયિતાશ્ ચ મહીતલે

રાક્ષસાનાં સહસ્રાણિ નિહત્ય મધુસૂદનઃ
વારિજં નાદયામ્ આસ તોયદં સુરરાડ્ ઇવ

નારાયણશરગ્રસ્તં શઙ્ખનાદસુવિહ્વલમ્
યયૌ લઙ્કામ્ અભિમુખં પ્રભગ્નં રાક્ષસં બલમ્

પ્રભગ્ને રાક્ષસબલે નારાયણશરાહતે
સુમાલી શરવર્ષેણ આવવાર રણે હરિમ્

ઉત્ક્ષિપ્ય હેમાભરણં કરં કરમ્ ઇવ દ્વિપઃ
રરાસ રાક્ષસો હર્ષાત્ સતડિત્ તોયદો યથા

સુમાલેર્ નર્દતસ્ તસ્ય શિરો જ્વલિતકુણ્ડલમ્
ચિચ્છેદ યન્તુર્ અશ્વાશ્ ચ ભ્રાન્તાસ્ તસ્ય તુ રક્ષસઃ

તૈર્ અશ્વૈર્ ભ્રામ્યતે ભ્રાન્તૈઃ સુમાલી રાક્ષસેશ્વરઃ
ઇન્દ્રિયાશ્વૈર્ યથા ભ્રાન્તૈર્ ધૃતિહીનો યથા નરઃ

માલી ચાભ્યદ્રવદ્ યુદ્ધે પ્રગૃહ્ય સશરં ધનુઃ
માલેર્ ધનુશ્ચ્યુતા બાણાઃ કાર્તસ્વરવિભૂષિતાઃ
વિવિશુર્ હરિમ્ આસાદ્ય ક્રૌઞ્ચં પત્રરથા ઇવ

અર્દ્યમાનઃ શરૈઃ સો ઽથ માલિમુક્તૈઃ સહસ્રશઃ
ચુક્ષુભે ન રણે વિષ્ણુર્ જિતેન્દ્રિય ઇવાધિભિઃ

અથ મૌર્વી સ્વનં કૃત્વા ભગવાન્ ભૂતભાવનઃ
માલિનં પ્રતિ બાણૌઘાન્ સસર્જાસિગદાધરઃ

તે માલિદેહમ્ આસાદ્ય વજ્રવિદ્યુત્પ્રભાઃ શરાઃ
પિબન્તિ રુધિરં તસ્ય નાગા ઇવ પુરામૃતમ્

માલિનં વિમુખં કૃત્વા માલિમૌલિં હરિર્ બલાત્
રથં ચ સધ્વજં ચાપં વાજિનશ્ ચ ન્યપાતયત્

વિરથસ્ તુ ગદાં ગૃહ્ય માલી નક્તંચરોત્તમઃ
આપુપ્લુવે ગદાપાણિર્ ગિર્યગ્રાદ્ ઇવ કેષરી

સ તયા ગરુડં સંખ્યે ઈશાનમ્ ઇવ ચાન્તકઃ
લલાટદેશે ઽભ્યહનદ્ વજ્રેણેન્દ્રો યથાચલમ્

ગદયાભિહતસ્ તેન માલિના ગરુડો ભૃશમ્
રણાત્ પરાઙ્મુખં દેવં કૃતવાન્ વેદનાતુરઃ

પરાઙ્મુખે કૃતે દેવે માલિના ગરુડેન વૈ
ઉદતિષ્ઠન્ મહાનાદો રક્ષસામ્ અભિનર્દતામ્

રક્ષસાં નદતાં નાદં શ્રુત્વા હરિહયાનુજઃ
પરાઙ્મુખો ઽપ્ય્ ઉત્સસર્જ ચક્રં માલિજિઘાંસયા

તત્ સૂર્યમણ્ડલાભાસં સ્વભાસા ભાસયન્ નભઃ
કાલચક્રનિભં ચક્રં માલેઃ શીર્ષમ્ અપાતયત્

તચ્છિરો રાક્ષસેન્દ્રસ્ય ચક્રોત્કૃત્તં વિભીષણમ્
પપાત રુધિરોદ્ગારિ પુરા રાહુશિરો યથા

તતઃ સુરૈઃ સુસંહૃષ્ટૈઃ સર્વપ્રાણસમીરિતઃ
સિંહનાદરવો મુક્તઃ સાધુ દેવેતિ વાદિભિઃ

માલિનં નિહતં દૃષ્ટ્વા સુમાલી મલ્યવાન્ અપિ
સબલૌ શોકસંતપ્તૌ લઙ્કાં પ્રતિ વિધાવિતૌ

ગરુડસ્ તુ સમાશ્વસ્તઃ સંનિવૃત્ય મહામનાઃ
રાક્ષસાન્ દ્રાવયામ્ આસ પક્ષવાતેન કોપિતઃ

નારાયણો ઽપીષુવરાશનીભિર્ વિદારયામ્ આસ ધનુઃપ્રમુક્તૈઃ
નક્તંચરાન્ મુક્તવિધૂતકેશાન્ યથાશનીભિઃ સતડિન્મહેન્દ્રઃ

ભિન્નાતપત્રં પતમાનશસ્ત્રં શરૈર્ અપધ્વસ્તવિશીર્ણદેહમ્
વિનિઃસૃતાન્ત્રં ભયલોલનેત્રં બલં તદ્ ઉન્મત્તનિભં બભૂવ

સિંહાર્દિતાનામ્ ઇવ કુઞ્જરાણાં નિશાચરાણાં સહ કુઞ્જરાણામ્
રવાશ્ ચ વેગાશ્ ચ સમં બભૂવુઃ પુરાણસિંહેન વિમર્દિતાનામ્

સંછાદ્યમાના હરિબાણજાલૈઃ સ્વબાણજાલાનિ સમુત્સૃજન્તઃ
ધાવન્તિ નક્તંચરકાલમેઘા વાયુપ્રણુન્ના ઇવ કાલમેઘાઃ

ચક્રપ્રહારૈર્ વિનિકૃત્તશીર્ષાઃ સંચૂર્ણિતાઙ્ગાશ્ ચ ગદાપ્રહારૈઃ
અસિપ્રહારૈર્ બહુધા વિભક્તાઃ પતન્તિ શૈલા ઇવ રાક્ષસેન્દ્રાઃ

ચક્રકૃત્તાસ્યકમલા ગદાસંચૂર્ણિતોરસઃ
લાઙ્ગલગ્લપિતગ્રીવા મુસલૈર્ ભિન્નમસ્તકાઃ

કે ચિચ્ ચૈવાસિના છિન્નાસ્ તથાન્યે શરતાડિતાઃ
નિપેતુર્ અમ્બરાત્ તૂર્ણં રાક્ષસાઃ સાગરામ્ભસિ

તદામ્બરં વિગલિતહારકુણ્ડલૈર્ નિશાચરૈર્ નીલબલાહકોપમૈઃ
નિપાત્યમાનૈર્ દદૃશે નિરન્તરં નિપાત્યમાનૈર્ ઇવ નીલપર્વતૈઃ