રામાયણ · અધ્યાય 7.003

અથ પુત્રઃ પુલસ્ત્યસ્ય વિશ્રવા મુનિપુંગવઃ
અચિરેણૈવ કાલેન પિતેવ તપસિ સ્થિતઃ

સત્યવાઞ્ શીલવાન્ દક્ષઃ સ્વાધ્યાયનિરતઃ શુચિઃ
સર્વભોગેષ્વ્ અસંસક્તો નિત્યં ધર્મપરાયણઃ

જ્ઞાત્વા તસ્ય તુ તદ્વૃત્તં ભરદ્વાજો મહાન્ ઋષિઃ
દદૌ વિશ્રવસે ભાર્યાં સ્વાં સુતાં દેવવર્ણિનીમ્

પ્રતિગૃહ્ય તુ ધર્મેણ ભરદ્વાજસુતાં તદા
મુદા પરમયા યુક્તો વિશ્રવા મુનિપુંગવઃ

સ તસ્યાં વીર્યસંપન્નમ્ અપત્યં પરમાદ્ભુતમ્
જનયામ્ આસ ધર્માત્મા સર્વૈર્ બ્રહ્મગુણૈર્ યુતમ્

તસ્મિઞ્ જાતે તુ સંહૃષ્ટઃ સ બભૂવ પિતામહઃ
નામ ચાસ્યાકરોત્ પ્રીતઃ સાર્ધં દેવર્ષિભિસ્ તદા

યસ્માદ્ વિશ્રવસો ઽપત્યં સાદૃશ્યાદ્ વિશ્રવા ઇવ
તસ્માદ્ વૈશ્રવણો નામ ભવિષ્યત્ય્ એષ વિશ્રુતઃ

સ તુ વૈશ્રવણસ્ તત્ર તપોવનગતસ્ તદા
અવર્ધત મહાતેજા હુતાહુતિર્ ઇવાનલઃ

તસ્યાશ્રમપદસ્થસ્ય બુદ્ધિર્ જજ્ઞે મહાત્મનઃ
ચરિષ્યે નિયતો ધર્મં ધર્મો હિ પરમા ગતિઃ

સ તુ વર્ષસહસ્રાણિ તપસ્ તપ્ત્વા મહાવને
પૂર્ણે વર્ષસહસ્રે તુ તં તં વિધિમ્ અવર્તત

જલાશી મારુતાહારો નિરાહારસ્ તથૈવ ચ
એવં વર્ષસહસ્રાણિ જગ્મુસ્ તાન્ય્ એવ વર્ષવત્

અથ પ્રીતો મહાતેજાઃ સેન્દ્રૈઃ સુરગણૈઃ સહ
ગત્વા તસ્યાશ્રમપદં બ્રહ્મેદં વાક્યમ્ અબ્રવીત્

પરિતુષ્ટો ઽસ્મિ તે વત્સ કર્મણાનેન સુવ્રત
વરં વૃણીષ્વ ભદ્રં તે વરાર્હસ્ ત્વં હિ મે મતઃ

અથાબ્રવીદ્ વૈશ્રવણઃ પિતામહમ્ ઉપસ્થિતમ્
ભગવંલ્ લોકપાલત્વમ્ ઇચ્છેયં વિત્તરક્ષણમ્

તતો ઽબ્રવીદ્ વૈશ્રવણં પરિતુષ્ટેન ચેતસા
બ્રહ્મા સુરગણૈઃ સાર્ધં બાઢમ્ ઇત્ય્ એવ હૃષ્ટવત્

અહં હિ લોકપાલાનાં ચતુર્થં સ્રષ્ટુમ્ ઉદ્યતઃ
યમેન્દ્રવરુણાનાં હિ પદં યત્ તવ ચેપ્સિતમ્

તત્કૃતં ગચ્છ ધર્મજ્ઞ ધનેશત્વમ્ અવાપ્નુહિ
યમેન્દ્રવરુણાનાં હિ ચતુર્થો ઽદ્ય ભવિષ્યસિ

એતચ્ ચ પુષ્પકં નામ વિમાનં સૂર્યસંનિભમ્
પ્રતિગૃહ્ણીષ્વ યાનાર્થં ત્રિદશૈઃ સમતાં વ્રજ

સ્વસ્તિ તે ઽસ્તુ ગમિષ્યામઃ સર્વ એવ યથાગતમ્
કૃતકૃત્યા વયં તાત દત્ત્વા તવ મહાવરમ્

ગતેષુ બ્રહ્મપૂર્વેષુ દેવેષ્વ્ અથ નભસ્તલમ્
ધનેશઃ પિતરં પ્રાહ વિનયાત્ પ્રણતો વચઃ

ભગવંલ્ લબ્ધવાન્ અસ્મિ વરં કમલયોનિતઃ
નિવાસં ન તુ મે દેવો વિદધે સ પ્રજાપતિઃ

તત્ પશ્ય ભગવન્ કં ચિદ્ દેશં વાસાય નઃ પ્રભો
ન ચ પીડા ભવેદ્ યત્ર પ્રાણિનો યસ્ય કસ્ય ચિત્

એવમ્ ઉક્તસ્ તુ પુત્રેણ વિશ્રવા મુનિપુંગવઃ
વચનં પ્રાહ ધર્મજ્ઞ શ્રૂયતામ્ ઇતિ ધર્મવિત્

લઙ્કા નામ પુરી રમ્યા નિર્મિતા વિશ્વકર્મણા
રાક્ષસાનાં નિવાસાર્થં યથેન્દ્રસ્યામરાવતી

રમણીયા પુરી સા હિ રુક્મવૈદૂર્યતોરણા
રાક્ષસૈઃ સા પરિત્યક્તા પુરા વિષ્ણુભયાર્દિતૈઃ
શૂન્યા રક્ષોગણૈઃ સર્વૈ રસાતલતલં ગતૈઃ

સ ત્વં તત્ર નિવાસાય રોચયસ્વ મતિં સ્વકામ્
નિર્દોષસ્ તત્ર તે વાસો ન ચ બાધાસ્તિ કસ્ય ચિત્

એતચ્ છ્રુત્વા તુ ધર્માત્મા ધર્મિષ્ઠં વચનં પિતુઃ
નિવેશયામ્ આસ તદા લઙ્કાં પર્વતમૂર્ધનિ

નૈરૃતાનાં સહસ્રૈસ્ તુ હૃષ્ટૈઃ પ્રમુદિતૈઃ સદા
અચિરેણૈકકાલેન સંપૂર્ણા તસ્ય શાસનાત્

અથ તત્રાવસત્ પ્રીતો ધર્માત્મા નૈરૃતાધિપઃ
સમુદ્રપરિધાનાયાં લઙ્કાયાં વિશ્રવાત્મજઃ

કાલે કાલે વિનીતાત્મા પુષ્પકેણ ધનેશ્વરઃ
અભ્યગચ્છત્ સુસંહૃષ્ટઃ પિતરં માતરં ચ સઃ

સ દેવગન્ધર્વગણૈર્ અભિષ્ટુતસ્ તથૈવ સિદ્ધૈઃ સહ ચારણૈર્ અપિ
ગભસ્તિભિઃ સૂર્ય ઇવૌજસા વૃતઃ પિતુઃ સમીપં પ્રયયૌ શ્રિયા વૃતઃ